«Böyük oyun üstünlüyündən yararlana bilmədik»
Xəbərlər / 24 Fevral 2018 | 18:45490
«Böyük oyun üstünlüyündən yararlana bilmədik»

Topaz Premyer Liqasının XVII turunun “Səbail” – “Qəbələ” oyunundan (2:1) sonra “qırmızı-qaralar”ın baş məşqçisi Roman Qriqorçukun mətbuat konfransı keçirilib. Sizi ukraynalı mütəxəssisin fikirləri ilə tanış edirik:

“Təəssüf ki, uduzduğumuz oyundur. Amma fikrimcə, bu matçda məğlub olmamalı idik. Bizim üçün çox pis alındı. Uğursuz şəkildə qol buraxdıq. Böyük oyun üstünlüyündən yararlana bilmədik. Nəticədə xal itkisi ilə üzləşdik. Komandaya iradım yoxdur və bu məğlubiyyəti öz səviyyəmizdən aşağı oynamaqla bağlaya bilmərəm. Biz öz səviyyəmizdə oyunumuzu göstərdik. Yalnız bu gün hücumların sonluğunda, imkanlardan istifadə zamanı ifaçılıq bacarığı çox pis idi. Amma motivasiyalı olmamağımızı, imkanlardan aşağı oynadığımız, çalışmadığımız üçün xal itirdiyimizi deməzdim. Cavid Hüseynov və Qismət Alıyevin meydanda olmamasının nəticəyə necə təsir edəcəyi barədə nəsə demək olmaz. Buna cavab vermək üçün onların meydanda olması lazımdır. Bu haqda danışmağın mənası da yoxdur. Başa düşürük ki, kimsə oynamayanda uduzmalı deyilik. Heyət elə komplektləşməlidir ki, 1-2 futbolçunu asanlıqla əvəzləyə bilək. Deməzdim ki, Baqali Dabo, Stiven Monroz, Famussa Kone üçlüyünün start heyətdə çıxdığı oyunlarda qalib gəlməyimiz kimi ənənə formalaşıb. Ötən oyun Konesiz başladıq və qalib gəldik. Bu dəfə isə uduzduq. Meydana bütün hücumçuları buraxmaq istəyərdim. Amma legioner limiti də var və bunu edə bilmərik”.