QƏBƏLƏ FC

Şənbə günü Unibank Premyer Liqasının yeni mövsümünə start veriləcək. İlk turda “Qəbələ” səfərdə “Simurq”la üz-üzə gələcək. Qarşılaşma öncəsi hazırlıqlarını doğma məkanda davam etdirən komandamız sabah Zaqatalaya yollanacaq. Zədəli olan Amil Yunanov komandaya yardım edə bilməyəcək. 

Matç öncəsi komandanın baş məşqçisi qarşıdakı mövsüm və açılış oyunu barədə fikirlərini gabalafc.az-la bölüşüb. 

“Yeni mövsümə start veririk. 2012-2013 futbol ilinin maraqlı və mübarizə şəraitində keçəcəyinə inanıram. Fasilə dövründə bütün çempionat iştirakçıları imkanlarını maksimum səfərbər edərək ən yaxşı heyətlərini qurmağa çalışdılar. Bu mövsüm iştirakçıların çox hissəsi əvvəlcə ilk altılıq, daha sonra isə Avrozonaya düşmək üçün mübarizə aparacaqlar. Bir çox komanda çempionluğa iddialıdır. Bu da 12 komandalıq çempionatda mübarizənin gərgin və çətin keçəcəyini göstərir. Bizim də yüksək hədəflərimiz var və bu hədəflərə uyğun transferlər edərək güclü heyət formalaşdırmışıq. Hazırlıq dövründən də maksimum yararlanmışıq”.

Kavlak “Simurq”un yeni mövsümün ən təhlükəli komandalarından olduğunu, amma Zaqataladan uğurlu nəticə ilə dönəcəklərinə inandığını söyləyib:

“Simurq” yeni mövsümün ən təhlükəli komandalarından biridir. Yoxlama oyunlarında fiziki göstəriciləri yüksək olan və rəqibə oynamaq imkanı verməyən bir komanda olduqlarını sübut ediblər. Azərbaycan çempionatında son iki mövsümdür ki, asan oyun anlayışı qalmayıb. “Simurq”la oyun da çətin oyun olacaq. Rəqibimiz evdə mütləq qələbə qazanmaq istəyəcək. Biz də səfərdə sadəcə qələbə qazanmağı planlaşdırırıq. Zaqatalada mövsümə uğurlu start verəcəyimizə inanıram".