"Qəbələ" PFK ən böyük uğuruna 2007/08 mövsümündə nail olub. Komandamız MOİK, "Simurq" və "Bakı" kimi komandaları məğlub edərək Azərbaycan kuboku uğrunda yarışların yarımfinal mərhələsinə vəsiqə qazanıb. Bu mərhələdə iki oyunun nəticəsinə görə "Xəzər-Lənkəran"a məğlub olsa da, ölkəmizin dörd ən güclü kollektivi sırasına daxil olmağı bacarıb. Bundan başqa, 2007/08 mövsümü "Qəbələ"nin Azərbaycan Premyer Liqasında ən yaxşı çıxış etdiyi mövsüm kimi yadda qalıb - 36 xalla 6-cı yer.

Komandamızın əldə etdiyi yeganə çempionluq 2005/06 mövsümünə təsadüf edir. O vaxt "Gilan" adlanan "Qəbələ" Azərbaycan çempionatının birinci dəstəsinin qalibi olub. Komandamız keçirdiyi 30 oyunun 22-də qalib gəlib, 6 dəfə heç-heçə edib və 72 xalla bütün rəqiblərini arxada qoyub. Həmin mövsümdə futbolçularımız arıdıcıl 24 oyunda məğlub olmayaraq uğurlu və analoqu olmayan seriyaya imza atıblar.