“Qəbələ” futbol akademiyasının komandaları növbəti oyunlarını keçiriblər. U-17 “Səbail”ə qalib gəlib – 4:1. Keçirdiyi 4 matçda 6 xal toplayan “qırmızı-qaralar” 7-ci pillədə qərarlaşıb. U-16 səfərdə “Keşlə”ni məğlub edib – 5:1. 5 turdan sonra 12 xala malik “Qəbələ” 2-ci yerdədir. “Sabah”la qarşılaşan U-15 qolsuz heç-heçə edib. İlk xal itkisi ilə üzləşən komandamız 3 turdan sonra 7 xalla 3-cüdür.

Paytaxt zonasında mübarizə aparan U-14 “Leon”u 5 cavabsız qolla üstələyib. 4 matçda 6 xal toplayan “qırmızı-qaralar” 7-ci pillədə qərarlaşıb. Şimal-Qərb və Qarabağ regionunun Qəbələ zonasında çıxış edən U-13 UGİM “Rabitəçi”ni (Yevlax) 4:1 hesabı ilə yenib. Üç turda 9 xal qazanan “Qəbələ” zonanın lideridir.

III turunun oyunları baş tutan U-12, U-11 və U-10 Liqalarının eyni zonasında isə iki təmsilçimiz qüvvəsini sınayıb. U-12 Liqada ardıcıl 3-cü qələbəsini qazanan “Qəbələ” Ağdaşın UGİM-ini 13:0 hesabı ilə məğlub edib və liderliyini möhkəmlədib. UGİM isə Oğuzun UGİM-inə qalib gəlib – 2:1.

U-11 Liqasındakı təmsilçilərimizin duelindən “Qəbələ” UGİM-in qapısından 7 cavabsız top keçirib. 3 matçda 9 xal toplayan “qırmızı-qaralar” zonanın lideridir. 3-cü qələbəsini qazanan U-10 da liderliyini davam etdirir. Komandamız bu dəfə Ağdaş UGİM-inə 13 cavabsız qol vurub. UGİM isə Oğuzun UGİM-inə uduzub – 0:3.