U-16 və U-15 liqalarında 2023/2024-cü illər mövsümünün püşkü atılıb. Tədbirdə “Qəbələ”nin komandalarının ilk rəqibləri müəyyənləşib. Hər iki liqanın birinci turunun oyunları 2-3 sentyabr tarixlərində keçiriləcək.

U-15 Liqasında komandalar A və B qrupuna bölünəcək. B qrupunun oyunları Naxçıvan Muxtar Respublikasında təşkil olunacaq. A qrupunda 15 komanda mübarizə aparacaq və oyunlar iki dövrədən ibarət olacaq. İlk yeddi yeri tutan komanda B qrupunun qalibi ilə final mərhələsində qarşılaşacaq. A qrupunda mübarizə aparan “Qəbələ” ilk turda Mingəçevirin “Ulduz” komandası ilə görüşəcək. “Qırmızı-qaralar” mövsümə evdə başlayacaq.

U-16 Liqası da A və B qrupu olmaqla üç dövrədən ibarət olacaq. A qrupunda 13 komanda mübarizə aparacaq. Burada ilk yeddi yeri tutan komanda Naxçıvan Muxtar Respublikası üzrə qalib gələcək komanda ilə final mərhələsində qarşılaşacaq. “Qəbələ” ilk turda “Səbail”lə üz-üzə gələcək. Komandamız mövsümə ev oyunu ilə start verəcək.