2 qələbə, 4 heç-heçə
Xəbərlər / 17 Oktyabr 2014 | 21:05232
Aşağı yaş qruplarından olan komandalar üçün AFFA tərəfindən təşkil olunan liqalarda növbəti oyunlar keçirilib. Son bir həftədə U-14, U-13, U-12 və U-11 liqalarında 2014/15 mövsümünün III, U-19, U-17, U-16 və U-15 liqalarında isə IV turunun matçları keçirilib. “Qəbələ”nin meydana çıxan 7 komandasından ikisi qalib gəlib. Dördü heç-heçə edib və yalnız biri uduzub.
Paytaxt zonasında çıxış edən U-14 komandası “İnter”lə qarşılaşıb. Məhsuldar keçən oyun 2:2 hesabı ilə nəticələnib. Mövsümdə ilk heç-heçəsini edən “Qəbələ” 3 turdan sonra 4 xalla 7-ci pillədə qərarlaşıb. “Qırmızı-qaralar”ın növbəti rəqibi çempionatın lideri “Bakı” olacaq.
U-13 komandası Şimal-Qərb və Qarabağ regionunun Qəbələ zonasında keçirilən III urda istirahət edib. İlk iki turda qol buraxmadan böyük hesabla qalib gələn “qırmızı-qaralar” IV turda Balakən UGİM-i ilə qarşılaşacaq. 2 oyundan sonra hesabında 6 xal olan “Qəbələ” 1 matç az keçirdiyi liderdən 1 xal geri qalır.
U-12 komandası ilk xal itkisi ilə üzləşib. “Simurq”la heç-heçə (1:1) “Qəbələ”nin xal hesabın 7-yə çatdırıb. 3 turdan sonra zonanın lideri olan “qırmızı-qaralar” növbəti matçda “Daşqın”la görüşəcək.
U-11 Liqasında “Qəbələ” ikinci oyununda da yüksək məhsuldarlıq göstərib. Oğuzun UGİM komandasını 15:1 hesabı ilə məğlub edən “qırmızı-qaralar” 27 qol vurduğu 2 matçda 6 xal toplayıb. 2-ci pillədə qərarlaşan “Qəbələ” növbəti turda “Simurq”la görüşəcək.
U-19 liqasında “Qəbələ” ilk məğlubiyyətini alıb. Səfərdə “Sumqayıt”a 2:3 hesabı ilə uduzan “qırmızı-qaralar” 3 oyunda 6 xal toplayıb və 5-ci pillədə qərarlaşıb. Komanda V turda AZAL-ı qəbul edəcək.
U-17 komandası qələbə seriyasını davam etdirən “Qəbələ” AZAL-ı 2:0 hesabı ilə məğlub edib. 4 turda 12 xal toplayan komanda çempionatın vahid lideridir. Növbəti tirda “qırmızı-qaralar” “Xəzər Lənkəran”la görüşəcək.
U-16 Liqasında çempionatın liderləri üz-üzə gəlib. Ardıcıl 3 qələbə qazanan “Xəzər Lənkəran”la “Qəbələ”nin görüşündə hesab açılmayıb. Səfər heç-heçəsindən sonra “qırmızı-qaralar” tio fərqinə görə 2-ci pillədə qərarlaşıb. Komanda növbəti turda “Qarabağ”ı qəbul edəcək.
Səfərdə “Şahdağ”la qolsuz heç-heçə edən U-15 komandası mövsümdə ilk xalını itirib. 4 oyunda 10 xal toplayan “Qəbələ” vahid liderliyini davam etdirir. Komanda növbəti turda ən yaxın izləyicisi “Bakı”nı qəbul edəcək.
Qeyd edək ki, bu həftə U-17 Azərbaycan kubokunun da püşkü atılıb. 1/8 final mərhələsindən azad olan “Qəbələ” yarışa dekabrda baş tutacaq 1/4 finaldan başlayacaq. “Qırmızı-qaralar” 1/8 finalda üz-üzə gələcək “Qarabağ” – “Xəzər Lənkəran” cütünün qalibi ilə qarşılaşacaq.
OXŞAR XƏBƏRLƏR
