QƏBƏLƏ FC

Bu həftə Topaz Premyer Liqasında 2016-2017-ci illər mövsümünün ikinci yarısına start veriləcək. “Qəbələ” III dövrəyə öz meydanında başlayacaq. “Qırmızı-qaralar” 2017-ci ilin ilk rəsmi matçı olacaq XV tur çərçivəsində “Sumqayıt”ı qəbul edəcək. Cari mövsüm bu rəqiblə iki dəfə üz-üzə gələn Roman Qriqorçukun yetirmələri I dövrənin ev oyununda 2:0 hesabı ilə qalib gəlib. Komandamız II dövrənin səfər matçında da 2 qol vurmağı bacarsa da, meydanı 1 xalla tərk edib.
Ümumilikdə isə komandalar indiyədək 18 dəfə qarşılaşıb. Bu matçların hamısı Premyer Liqa çərçivəsində baş tutub. 19-cu duel öncəsi “Qəbələ” böyük üstünlüyə malikdir. “Qırmızı-qaralar” 13 qələbə qazanıbsa, yalnız 1 dəfə meydandan xalsız ayrılıb. Digər 4 qarşılaşmada qalib müəyyənləşməyib. Rəqib qapısına 36 qol vuran komandamız baş tutan 18 görüşün hamısında rəqib qapısına yol tapıb. “Sumqayıt” isə cəmi 13 qol vurmağı bacarıb.
“Qəbələ”nin ev oyunlarındakı üstünlüyü isə daha böyükdür. Bütün xal itkiləri ilə səfərdə üzləşən “qırmızı-qaralar” öz meydanındakı 9 matçın hamısında qələbə qazanıb. 21 qol vurub, 4-nü buraxan komandamız son 4 ev qələbəsini quru hesabla əldə edib.

“Qəbələ” – “Sumqayıt”: Bütün oyunlar