AZAL – “Qəbələ” – 0:4
5 aprel 2015. Saat 17:00. AZAL Arena, 500 tamaşaçı
Baş hakim: Əliyar Ağayev
Baş hakimin köməkçiləri: Zeynal Zeynalov, Rza Məmmədov
Dördüncü hakim: Munis Abdullayev
AFFA nümayəndəsi: Mübariz Hüseynov
Hakim-inspektor: Məhəmməd Məmmədov
Sarı vərəqələr: Novruz Məmmədov, 21 (qeyri-idman hərəkəti); Ruslan Məcidov, 40 (qeyri-idman hərəkəti); Valeriy Kutsenko, 51 (sistematik qayda pozuntusu) // Cavid Hüseynov, 45 (qeyri-idman hərəkəti); Rafael Santos, 47 (qeyri-idman hərəkəti); Rikardinyo, 66 (qeyri-idman hərəkəti); Ruslan Abışov, 79 (qeyri-idman hərəkəti)
Qollar: Cavid Hüseynov, 24, 41 (p.); Viktor Mendi, 26; Ekiqo Ehiosun, 86
Artırılan vaxt: I hissədə - yoxdur.; II hissədə 2 dəq.
Bu gün Topaz Premyer Liqasında XXVIII turun oyunları keçirilib. IV dövrənin ilk matçında AZAL-ın qonağı olan “Qəbələ” 17 gündən sonra meydana çıxıb. Martın 18-də səfərdə “İnter”ə qalib gələn (2:1) “qırmızı-qaralar” qarşılaşmaya eyni “11-lik”lə başlayıb. Ardıcıl 4 görüşdə qalib gələn Roman Qriqorçukun yetirmələri bu seriyanı 5-ə çatdırmaq iddiasını ilk dəqiqələrdən nümayiş etdirib.
Qarşılaşmada ilk hücumu AZAL təşkil etsə də, hesabı açmağa “Qəbələ” daha yaxın olub. Ruslan Fomin ötürməni sinəsi ilə ram etdikdən sonra Bəxtiyar Soltanov qapını nişan alıb. Lakin meydan sahiblərini qapı dirəyi xilas edib. Üstünlüyü ələ alan “qırmızı-qaralar” ardınca bir neçə təhlükəli vəziyyət də yarada bilib. 9-cu dəqiqədə Cavid Hüseynovun ötürməsindən sonra Aleksey Qayın qapıya endirdiyi dəqiq zərbənin qarşısını qolkiper alıb. Az keçməmiş ukraynalı yarımmüdafiəçi həmyerlisi Fominin ötürməsini tamamlayıb. Lakin bu dəfə top qapı dirəyinin yanından keçib. Meydan sahiblərinin cavabı da özünü gözlətməyib. Təmkin Xəlilzadənin zərbəsi qapı tirinə tuş gəlib. Bir müddət meydanda tarazlıq yaranıb, qarşılıqlı hücumlar müşahidə olunub. 24-cü dəqiqədə sağ cinahdan qapı önünə hava ötürməsini qapıçı uzaqlaşdırsa da, top Cavidin yanına düşüb. Hüseynov cərimə meydanı daxilindən çərçivəni dəqiq nişan alıb. Qola mane olmaq istəyən müdafiəçi başı ilə topa toxunsa da, qola mane ola bilməyib – 1:0. Qoldan sonra meydan sahibləri özünə gəlməmiş komandamız yenidən fərqlənib. Sağ cinahla irəliləyib qapıçı meydanı yaxınlığına ötürmə verən Qay Mendini tapıb. Seneqallı isə belə imkanı əldən verməyib – 2:0. Bundan sonra meydan sahibləri irəli atılıb, üstünlüyə yiyələnsə də, növbəti qolu da “Qəbələ” vurub. Qaya qarşı kobudluğa görə təyin edilən penalti zərbəsini Cavid dəqiq yerinə yetirib – 3:0. Dublunu rəsmiləşdirən yarımmüdafiəçi mövsümdə 5-ci dəfə 11 metrlik nöqtədən fərqlənib.
Komandamız ikinci hissəyə əvəzetmə ilə başlayıb. İki qol vuran Cavidə istirahət verən Qriqorçuk Rəşad Sadiqovu meydana buraxıb. AZAL ikinci hissəyə daha fəal başlayıb. Amma bakılılar etibarlı oyunu ilə diqqət çəkən Dmitri Bezotosnının qapısına yol tapa bilməyib. Əvəzində “Qəbələ” 4-cü qoluna yaxın olub. Amma qapıçı ilə üz-üzə qalan Mendinin zərbəsi dirəyə tuş gəlib. Hissənin ortalarında üstünlüyə yiyələnən “qırmızı-qaralar” paytaxt təmsilçisinin qapısı önündə bir neçə dəfə təhlükə yarada bilib. Epizodların birində Fominin baş zərbəsini qapıçı küncə çıxarmağa nail olub. Hakimin final fitinə 13 dəqiqə qalmış Sadiqov qola yaxın olsa da, yarımmüdafiəçi Rikardinyonun ötürməsini dəqiqə zərbəylə tamamlaya bilməyib. Təsəlli qolu vurmaq üçün böyük qüvvə ilə irəli atılan bakılıların arxa xəttində yaranan boşluqlar “Qəbələ”nin fərqlənməsi üçün bir neçə imkan yaradıb. Bunların birində Fominə az dəqiqlik çatmayıb. 86-cı dəqiqədə isə komandamız 4-cü qol istəyini reallaşdıra bilib. Meydana sonradan daxil olan Ekiqo Ehiosun cərimə meydanı daxilindən qarşısıalınmaz zərbə endirib – 4:0. Legionerin 1 dəqiqə sonra dublunu rəsmiləşdirməsinə isə AZAL-ın qapıçısı imkan verməyib.
Beləliklə, 4 cavabsız qolla qələbə qazanan komandamız 4-cü pilləyə yüksəlib.
AZAL
1. Ruslan Məcidov
4. Laşa Kasradze
15. Oskars Klava
21. Novruz Məmmədov (k)
13. Şəhriyar Rəhimov
3. Xuan Fransisko
7. Təmkin Xəlilzadə
(10. Nicat Qurbanov, 63)
8. Seymur Əsədov
(5. Kərim Diniyev, 69)
17. Viktor İqbekoyi
20. Freddi Mombonqo
25. Valeriy Kutsenko
Ehtiyat oyunçular:
85. Kamal Bayramov
22. Eltun Yaqublu
9. Aydın Qasımov
23. Aleksandr Şemonayev
55. Fərid Hacıyev
Baş məşqçi: Tərlan Əhmədov
“Qəbələ”
22. Dmitri Bezotosnı
4. Elvin Camalov
9. Viktor Mendi
(90. Ekiqo Ehiosun, 71)
14. Cavid Hüseynov
(6. Rəşad Sadiqov, 46)
15. Ruslan Abışov (k)
18. Ruslan Fomin
19. Aleksey Qay
20. Rikardinyo
27. Bəxtiyar Soltanov
34. Ürfan Abbasov
(16. Ruslan Tağızadə, 81)
44. Rafael Santos
Ehtiyat oyunçular:
30. Anar Nəzirov
5. Sadiq Quliyev
25. Adrian Ropotan
32. Mixail Sivakov
Baş məşqçi: Roman Qriqorçuk
