“Qəbələ” 2:3 “Simurq”
23 noyabr 2014. Saat 17:15. Qəbələ şəhər stadionu, 1000 tamaşaçı
Baş hakim: Vüsal Əliyev
Baş hakimin köməkçiləri: Elman Musayev, Rza Məmmədov
Dördüncü hakim: Mahir Məmmədov
AFFA nümayəndəsi: Şaiq Həmidov
Hakim-inspektor: Əhmədağa Cabbarov
Sarı vərəqələr: Ruslan Tağızadə, 22 (qeyri-idman hərəkəti); Adrian Ropotan, 53 (qeyri-idman hərəkəti) // Draqan Çeran, 57 (qeyri-idman hərəkəti); İlkin Qırtımov, 65 (qeyri-idman hərəkəti)
Qollar: Ekiqo Ehiosun, 40; Bəxtiyar Soltanov, 90+2 // Marko Stanoyeviç, 7; Draqan Çeran, 79; 83
Artırılan vaxt: I hissədə 1 dəq.; II hissədə 3 dəq.
Bu gün Topaz Premyer Liqasında XIII tura start verilib. “Qəbələ” öz meydanında “Simurq”u qəbul edib. Zədəli oyunçuların olmasından əziyyət çəkən “qırmızı-qaralar”ın baş məşqçisi Dorinel Muntyanu heyətdə bəzi taktiki dəyişikliklərə əl atıb. Son illər dayaq yarımmüdafiəçisi kimi çıxış edən Ruslan Abışov 1 oyunluq cəzası başa çatandan sonra meydana mərkəz müdafiəçisi kimi qayıdıb. Hər iki komandanın meydana qələbə üçün çıxdığı elə ilk dəqiqələrdən hiss olunub. Matçın əvvəlinə qonaqlar kəskin hücumlarla başlayıb. Artıq 2-ci dəqiqədə Draqan Çeran Kamran Ağayevlə üz-üzə qalıb. Lakin “Qəbələ”nin qapıçısı bu dueldən qalib ayrılıb. Qonaq futbolçunun təkrar zərbəsini isə müdafiəçilər uzaqlaşdırıb. Cəmi 5 dəqiqə sonra Marko Stanoyeviç təxminən 27 metrdən təyin olunan cərimə zərbəsi ilə doqquzluğu dəqiq nişan alıb – 0:1. Buraxılan qoldan sonra “Qəbələ” böyük qüvvə ilə irəli atılıb. Ön xətdə Ekiqo Ehiosun xüsusi fəallığı ilə diqqət çəkib. Epizodların birində onun təxminən 10 metrdən endirdiyi güclü zərbəni Pavel Kapsa küncə çıxarıb. Düzdür, əks-hücum şansları yaranan “Simurq” Stanoyeviçlə Rəşad Eyyubovun əlverişli imkan əldə etdiyi vaxt hesabı artıra bilərdi. Lakin Kamran bu dəfə də meydan sahiblərini xilas edib. Ardınca isə Ehiosunun fəallığı bəhrəsini verdi. Cərimə meydançasının daxilində topu saxlayan legioner geri – Dodoya ötürmə verdi. Sonuncu topu saxlayan zaman özünü yetirən Ekiqo qarşısıalınmaz zərbə ilə uzaq küncü nişan alıb – 1:1.
İkinci hissənin əvvəli də qonaqların hücumları ilə yadda qalıb. 55-ci dəqiqədə Kamran ardıcıl iki dəfə bacarığını nümayiş etdirib. Öncə Stanoyeviçin uzaq zərbəsini dəf edən qapıçı təkrar zərbəyə də reaksiya verə bilib. “Qəbələ”nin cavabı Cavid Hüseynovla gəlsə də, Kapsa da onun zərbəsi qarşısında etibarlı oyun göstərib. Qarşılıqlı hücumlar şəraitində davam edən qarşılaşma da hər iki komanda xal itirmək istəmədiyini nümayiş etdirib. Meydan sahiblərinin heyətində Dodonun fəallığı diqqət çəkib. Oyunun ən yaxşılarından olan Stanoyeviç isə növbəti qolun ötürməsini verib. Sol cinahla irəliləyib qapı önünə ötürmə verən legioner Çeranın fərqlənməsində rol oynayıb – 1:2. Az keçməmiş qonaqlar 3-cü qolu vurub. Bu dəfə Çeran özü irəliləyərək əlverişli mövqedən qapını dəqiq nişan alıb – 1:3. Bundan sonra oyunu xilas etmək istəyən “qırmızı-qaralar” qollardan birinin əvəzini çıxıb. Matçın uzatma dəqiqələrində Cavid Hüseynovun künc zərbəsini tamamlayan Bəxtiyar Soltanov həm fərqi azaldıb, həm də “Qəbələ”də qol hesabını açıb – 2:3.
“Simurq”la qarşılaşmalarda sonuncu dəfə 2012/13 mövsümündə uduzan “Qəbələ”nin uğurlu seriyası qırılıb. Son 5 görüşdə 3 qələbə və 2 heç-heçəsi olan “qırmızı-qaralar” 569 gün əvvəl – 2013-cü il mayın 3-də zaqatalalılara məğlub olmuşdu. Həmin oyunda “Simurq” 2:0 hesabı ilə qalib gəlmişdi
Qeyd edək ki, “qırmızı-qaralar” noyabrın 29-da baş tutacaq XIV turun oyununda səfərdə “Neftçi” ilə görüşəcək.
“Qəbələ”
1. Kamran Ağayev (k)
8. Markus Kunya
(27. Bəxtiyar Soltanov, 79)
10. Dodo
11. Andrey Kristea
(21. Yazalde Pinto, 58)
14. Cavid Hüseynov
15. Ruslan Abışov
16. Ruslan Tağızadə
25. Adrian Ropotan
44. Rafael Santos
88. Müşfiq Teymurov
90. Ekiqo Ehiosun
(4. Elvin Camalov, 68)
Ehtiyat oyunçular:
30. Anar Nəzirov
5. Sadiq Quliyev
26. Pavol Farkaş
99. Tellur Mütəllimov
Baş məşqçi: Dorinel Munteanu
“Simurq”
1. Pavel Kapsa
2. İlkin Qırtımov (k)
5. Vadim Abdullayev
6. Samir Zərgərov
8. Patrik Osiako
10. Rəşad Eyyubov
(13. Əli Gökdemir, 65)
11. Draqan Çeran
(9. Lukas Tresnak, 90+1)
18. Tural Axundov
20. İdan Vaytsman
26. Benjamin Lambot
88. Marko Stanoyeviç
(15. Stepan Polyak, 84)
Ehtiyat oyunçular:
35. Amil Ağacanov
3. Adam Banaş
25. Oruc Balaşlı
33. Kənan Müslümov
Baş məşqçi: George Çixradze
