“Qəbələ” – “Qarabağ” – 2:0
2 oktyabr 2016. Saat 19:00. Qəbələ şəhər stadionu, 3000 tamaşaçı
Baş hakim: Rəhim Həsənov
Baş hakimin köməkçiləri: Yaşar Abbasov, Akif Əmirəli
Dördüncü hakim: Coşqun Həsənov
Əlavə köməkçi hakimlər: Fariz Yusifov, Əliyar Ağayev
AFFA nümayəndəsi: Məmmədəli Məmmədov
Hakim-inspektor: Rövşən Əhmədov
Sarı vərəqələr: Vojislav Stankoviç, 33 (qeyri-idman hərəkəti); Elvin Camalov, 75 (qeyri-idman hərəkəti); Ürfan Abbasov, 76 (qeyri-idman hərəkəti); Riçard Almeyda, 77 (qeyri-idman hərəkəti) // Dino Ndlovu, 33 (qeyri-idman hərəkəti)
Qollar: Filip Ozobiç, 11; Baqali Dabo, 14
Artırılan vaxt: I hissədə 1 dəq.; II hissədə 4 dəq.
Bu gün Topaz Premyer Liqasında I dövrəyə yekun vurulub. VII turun son qarşılaşması Qəbələdə baş tutub. Ardıcıl 4 qələbə qazanmaqla, turnir cədvəlinin 1-ci pilləsində qərarlaşan “Qəbələ” son üç mövsümün qalibi “Qarabağ”ı qəbul edib. Ağdam təmsilçisi ilə son 5 görüşdə qalib gələ bilməyən “qırmızı-qaralar” meydana bu seriyanı qırmaq və dövrəni zirvədə bitirmək iddiası ilə çıxıb. Milli komandaların oyunları ilə əlaqədar fasilə ərəfəsində keçirilən son matçda “Qəbələ”nin heyətində bəzi dəyişikliklər olub. Son çempionat qarşılaşması ilə müqayisədə Rəşad Sadiqov, Vitali Vernidub və Filip Ozobiç start heyətinə qayıdıblar. Əvəzində Sergey Zenyov, Murad Musayev və Petar Franyiç bu dəfə “11-lik”də yer almayıb.
Komandalar matça kəşfiyyatla başlayıb. Lakin qarşılıqlı hücumlardan sonra “Qəbələ” ərazi üstünlüyünü ələ alıb. Topa daha çox nəzarət edən komandamız artıq 11-ci dəqiqədə hesabı açıb. Cərimə meydanından kənarda topa yiyələnən Ozobiç rəqib qapıçının çərçivəni tərk etdiyini görərək, təxminən 25 metrdən dəqiq zərbə vurub – 1:0. Bu, xorvatiyalı yarımmüdafiəçinin “qırmızı-qaralar”ın heyətində 5-ci qolu olub. Hesabı açdıqdan sonra fəallığı azaltmayan komandamız rəqib özünə gəlməmiş 2-ci dəfə fərqlənib. Daha fəal olan sol cinahdan ötürmə zamanı Baqali Dabo baş zərbəsi ilə fərqi artırıb – 2:0. Premyer Liqanın ən yaxşı bombardiri mövsümdə 7-ci qolunu vurub. Bu fransalı hücumçunun “Qəbələ”də yubiley – 10-cu qolu olub. Buraxılan ikinci topdan sonra “Qarabağ” üstünlüyü ələ almağa çalışsa da, qol epizodu qonaqların qapısı önündə yaranıb. Sol cinahdan növbəti ötürmə zamanı uzaq dirəyin yaxınlığında olan Ozobiç qapını nişan alıb. Ağdamlıları qoldan qapı dirəyi xilas edib. Bundan sonra “Qarabağ” cüzi ərazi üstünlüyünə yiyələnsə də, Dmitri Bezotosnının fasiləyədək ciddi işi olmayıb. Əvəzində Dabo dublunu rəsmiləşdirməyə yaxın olub. Lakin fransalı Ürfan Abbasovun sağ cinahdan göndərdiyi topu tamamlaya bilməyib.
Fasilədən sonra “Qarabağ” oyunda dönüş yaratmaq üçün irəli atılıb. Daha sürətli oynayan “qırmızı-qaralar” isə qol vəziyyətləri yaratmaqda davam edib. Asif Məmmədovun sol cinahdan cərimə meydanına göndərdiyi topu 18 metrdən qapıya göndərən Ozobiç qonaqlara gərginlik yaşadıb. Amma top dirəyin yanından ötüb. Ağdamlılar isə bir neçə dəfə fərqi azaltmaq imkanı əldə edib. Əvvəl Ansi Aqollinin cinahdan ötürməsindən sonra topu çərçivəyə istiqamətləndirən olmayıb. Az sonra Bezotosnı uzaq zərbəni dəf edib. 68-ci dəqiqədə isə Məhəmməd Mirzəbəyovla Vojislav Stankoviç toqquşmaq bahasına da olsa, Mahir Mədətovun topu qapıya göndərməsinə mane olublar. Qonaqların topa nəzarət etməsindən narazı qalan Qriqorçuk oyunçu əvəzləmələri ilə oyunda dönüş yaratmağa çalışıb. Lakin daha fəal olan ağdamlılar hücumlarını davam etdirib. Düzdür, etibarlı müdafiə olunan “Qəbələ”nin sürətli əks-həmlə imkanları da yaranıb. Belə vəziyyətlərdə qonaqlar daha çox qayda pozuntusu ilə komandamızın önünü kəsib. Bir dəfə Asif, bir dəfə isə Ruslan Qurbanov bu yolla dayandırılıb. Son çempionun əldə etdiyi qol imkanlarında isə Bezotosnı inamlı oynayıb. Ukraynalı qapıçı epizodların birində onunla təkbətək çıxan rəqibi qabaqlamaq üçün cərimə meydanından kənaradək irəliləyərək, təhlükəni sovuşdurub. Ardınca isə o, Mahir Mədətovla Reynaldonun fərqlənməsinə imkan verməyib. Qarşılaşmanın sonlarında “qırmızı-qaralar” böyükhesablı qələbə qazanmaq imkanı da əldə edib. Lakin Teo Uiksin uzaq zərbəsi qeyri-dəqiq alınıb.
Beləliklə, ardıcıl 5-ci qələbəsini qazanan “Qəbələ” çempionatın I dövrəsini lider kimi başa vurub. Cari mövsüm qol buraxmayan “qırmızı-qaralar”ın “quru” seriyası 9-a çatıb. Bezotosnı isə artıq 868 dəqiqədir qapısında qol görmür.
“Qəbələ”
22. Dmitri Bezotosnı
3. Vojislav Stankoviç
4. Elvin Camalov
6. Rəşad Sadiqov (k)
(21. Roman Hüseynov, 80)
11. Asif Məmmədov
15. Vitali Vernidub
17. Məhəmməd Mirzəbəyov
18. Baqali Dabo
(10. Ruslan Qurbanov, 76)
19. Filip Ozobiç
(9. Sergey Zenyov, 63)
27. Teo Uiks
34. Ürfan Abbasov
Ehtiyat oyunçular:
33. David Pietrzikeviç
13. Murad Musayev
20. Rikardinyo
44. Rafael Santos
Baş məşqçi: Roman Qriqorçuk
“Qarabağ”
1. Boyan Şaranov
2. Qara Qarayev
6. Dino Ndlovu
(11. Mahir Mədətov, 46)
10. Muarem Muarem
(9. Reynaldo, 68)
18. İlqar Qurbanov
20. Riçard Almeyda (k)
25. Ansi Aqolli
32. Elvin Yunuszadə
55. Bədavi Hüseynov
91. Coşqun Diniyev
(8. Migel Markos Madera, 46)
99. Dani Kintana
Ehtiyat oyunçular:
13. İbrahim Şehiç
5. Maksim Medvedev
15. Rahid Əmirquliyev
21. Arif Daşdəmirov
Baş məşqçi: Qurban Qurbanov
