«Azarkeşlərimiz daha üstün Leonardo görəcəklər»
Xəbərlər / 12 Avqust 2013 | 06:39323
"Komanda əlindən gələn hər şeyi etdi. Artıq iki oyundur ki, hesabda geri olmağımıza baxmayaraq, yekunda qələbə qazanmağı bacarırıq. Bu da kollektivimizin xarakter nümayiş etdirdiyini göstərir". Bu sözləri Topaz Premyer Liqasının ilk həftəsində - "Bakı"-"Qəbələ" (1:2) matçında 2 məhsuldar ötürmə, ardından II turda - "Qəbələ"-"İnter" (3:2) qarşılaşmasında 1 qol və 1 məhsuldar ötürmə ilə "qırmızı-qaralar"ın qələbəsində böyük pay sahibi olan Leonardo Da Silva gabalafc.az-a açıqlamasında deyib. Braziliyalı futbolçu komandasının hər oyuna qələbə üçün çıxdığını vurğulayıb. Komandaya uyğunlaşma dövrünü keçdiyini söyləyən yarımmüdafiəçi, azarkeşlərin bir müddət sonra fərqli Leonardo görəcəyini bildirib:
"Komandamız hər oyuna qələbə üçün çıxır. İki turdur ki, istədiyimiz nəticəni əldə edirik. İnanıram ki, bu cür əzmlə, sona kimi mübarizə aparsaq növbəti oyunlarda da uğur qazanacağıq. O ki, qaldı mənə hazırda kollektivə uyğunlaşma dövrünü yaşayıram. Hələ ki, bacardığımın yalnız 70 faizini göstərə bilmişəm. Qarşıdakı turlarda azarkeşlərimiz fərqli və daha üstün Leonardo görəcəklər".
OXŞAR XƏBƏRLƏR
