Kişi samboçuların Azərbaycan çempionatına yekun vurulub. Şağan Olimpiya Kompleksində təşkil olunan yarış iki gün davam edib. Ölkənin ən güclüsü adı uğrunda “Qəbələ” İdman Klubunun təmsilçiləri də mübarizə aparıb. Sambonun bu il Bakıda keçiriləcək Avropa Oyunlarının proqramına daxil edilməsi yarış iştirakçıları üçün stimul olub. Çünki son ölkə çempionatı mötəbər yarışda ölkəmizi təmsil edəcək idmançıların müəyyənləşməsində böyük rol oynayacaq. Milli komanda məşqçilərinin də maraqla izlədiyi çempionata marağın artması ilə yanaşı, hər çəki dərəcəsində böyük rəqabət də müşahidə olunub.
“Qəbələ” samboçuları çempionatda uğurla çıxış edib. Klubun yarışa qatılan 5 samboçusu çempionatı fəxri kürsüdə başa vurub. 90 kq çəki dərəcəsində çıxış edən Bəxtiyar Abbasov yalnız finalda uduzaraq, Azərbaycan çempionatının gümüş mükafatını qazanıb. Xal hesabı ilə uduzan samboçumuz Avropa Oyunlarında ölkəmizi təmsil etməyə əsas namizəd sayılır. Bunun üçün şansları yüksək qiymətləndirilən Abbasov qarşıdakı yarışlarda da uğurlu çıxışını davam etdirməlidir. Digər 4 samboçumuz isə ölkə çempionatını bürünc medalla başa vurub. Belə ki, Arif Şahlarov (62 kq), Sahil Paşazadə (68 kq), Soltan Ağayev (82 kq), Cəlil Şükürov (+100 kq) çempionatı 3-cü yerdə tamamlayıb.
