Azərbaycanın və “Qəbələ” İdman Klubunun təmsilçisi, qarışıq döyüş növlərində (MMA) çıxış edən Bəxtiyar Abbasov bu gün növbəti döyüşünə çıxacaq. Həmyerlimiz Rusiyanın Sankt-Peterburq şəhərində təşkil olunan “Fight Nights Petersburg” çərçivəsində qüvvəsinə sınayacaq. Abbasov Rusiya təmsilçisi Qamzat Xiramaqomedovla üz-üzə gələcək. Bu döyüş Bakı vaxtı ilə saat 21:30-da başlayacaq və "Rossiya 2" telekanalı vasitəsilə canlı yayımlanacaq. 84 kq çəki dərəcəsində çıxış edən idmançımızın rəqibi “Krepost” klubunun üzvüdür. Döyüş sambosu üzrə Rusiya çempionatının mükafatçısı olan Xiramaqomedov MMA üzrə Dünya kubokunun qalibi və Avropa çempionudur. Peşəkar səviyyədə keçirdiyi hər iki qarşılaşmada qalib gələn rusiyalının bu uğurları “FIGHT NIGHTS-Krepost Selection” çərçivəsində gerçəkləşib.
Xatırladaq ki, hesabında 18 döyüşdə 14 qələbə olan Abbasov daha titullu idmançıdır. 30 yaşlı təmsilçimiz 5 ildən artıqdır peşəkar MMA döyüşlərində çıxış edir. Bəxtiyar görüşlərinin əksəriyyətini ilk raunddaca başa vurub. O, PROFC-GPG-un qalibi, pankration, sambo, döyüş sambosu, ciu-citsu, əlbəyaxa döyüş üzrə dünya çempionudur. Döyüş sambosunda Avropa çempionu olan idmançımız sambo üzrə dünya kubokunun qalibi, sambo və cüdo üzrə Azərbaycan çempionu, həmçinin idman ustasıdır. 2015-ci ildə 3-cü döyüşdə qüvvəsini sınayacaq Abbasov mart ayında ukraynalı Aleksandr Boyko, iyulda isə onun həmyerlisi Artyom Şokaloya qalib gəlib.
