Kişi boksçular arasında Azərbaycan çempionatına yekun vurulub. Bakıdakı Boks Mərkəzində təşkil olunan yarışda “Qəbələ”nin iki idmançısı mükafatçılar sırasında yer alıb.
80 kq çəki dərəcəsində mübarizə aparan Kamran Şahsuvarlı yarışa 1/8 finaldan başlayıb. Elmar Abdullayev, Elşad Şahbazov və Cəbrayıl Yelikovu eyni – 5:0 hesabı ilə məğlub edən boksçumuz finala yüksəlib. Həlledici qarşılaşmada Murad Allahverdiyevə eyni hesabla uduzan Şahsuvarlı Azərbaycan çempionatının gümüş medalını qazanıb.
Namiq Yarəliyev isə 54 kq çəkidə fərqlənib. 1/8 finalda Nicat Abıdovu 5:0, 1/4 finalda İsa Gəncəliyevi 3:1 hesabı ilə məğlub edən boksçumuz Elşən Qəribova tam üstünlüklə qalib gəlib. Finalda Ruslan Qədirova 0:5 hesabı ilə uduzan Namiq Azərbaycan çempionatının gümüş medalına yiyələnib.
Xatırladaq ki, yarışda ölkənin müxtəlif şəhər və rayonlarının klublarını, həmçinin idman cəmiyyətlərini təmsil edən yarışda 38 komandanın 146 boksçusu qüvvəsini sınayıb.
