Avropa Liqasının qrup mərhələsinin III turu çərçivəsində baş tutacaq “Qəbələ” – “Borussiya” (Dortmund, Almaniya) oyunundan bir gün əvvəl keçirilən mətbuat konfransında “qırmızı-qaralar”ın futbolçusu Aleksey Qay da iştirak edib. Ukraynalı yarımmüdafiəçinin fikirlərini sizlərlə bölüşürük:
“Borussiya” ilə vacib oyun öncəsi komandada əhval-ruhiyyə yüksəkdir. Belə matçlar öncəsi ab-havanın yaxşı olması vacib əhəmiyyət kəsb edir. Bu komanda haqda biz futbolçular öz aramızda danışmışıq. Qarşılaşacağımız komandanı yaxşı tanıyır, kimə qarşı oynayacağımızı bilirik. Rəqibin kimliyindən asılı olmayaraq, daim komanda yoldaşlarıma kömək etməyə, belə oyunlarla bağlı təcrübəmi onlarla bölüşməyə hazıram. Sabahkı matç da istisna olmayacaq. Odessada çıxış etdiyim vaxt bizə azarkeşlik edən futbolsevərlər “Qəbələ”dəki çıxışımızla da yaxından maraqlanırlar. Onlar sabahkı görüşdə də bizə azarkeşlik edəcəklər”.
