UEFA Avropa Liqasının I təsnifat mərhələsinin cavab oyunları çərçivəsində keçirilən “Samtredia” (Gürcüstan) – “Qəbələ” oyunundan (2:1) sonra “qırmızı-qaralar”ın baş məşqçisi Roman Qriqorçukun mətbuat konfransı keçirilib. Sizi ukraynalı mütəxəssisin fikirləri ilə tanış edirik:
“Qarşılaşma bizim gözlədiyimiz kimi keçdi. Vəziyyətin belə alınmasına şadam ki, bu cür oyunlarda arxayınlaşmağı dərk etdik. Buraxdığımız səhvlər isə bizim üçün üzərində çalışacağımız materialdır. “Samtredia” haqda fikrimi ilk matçdan sonra bildirmişdim. Rəqibimiz hücuma yaxşı keçməyi bacaran komanda idi. Cavab oyunundan sonra da eyni sözləri təkrarlaya bilərəm. Lakin bu fikirlə də razıyam ki, biz onlardan daha güclüyük. Növbəti rəqibin kimliyinin fərqi yoxdur. Qısa zamanda oyun səviyyəmizi qaldırmağımız daha vacibdir. Biz növbəti mərhələdə daha keyfiyyətli oyun nümayiş etdirməliyik”.
