“Qəbələ” – “Zirə” – 8:1
(Ramil Həsənov, 2, 21, 53; Ehtiram Şahverdiyev, 16 (p.), 45+2, 71, 76; Ülvi İbazadə, 45+1 // Mirkamil Həşimli, 18 (p.))
Bu gün əvəzedicilərin çempionatında IX turun oyunları keçilir. “Qəbələ” I dövrənin son turunda “Zirə” ilə qarşılaşıb. Bu matçadək son 3 oyunda qələbə qazanan “qırmızı-qaralar” qarşılaşmaya fəal başlayıb. Ramin Quliyevin yetirmələrinin ilk yarıdakı üstünlüyü 5 qolla nəticələnib. Ramil Həsənov və Ehtiram Şahverdiyev hərəyə 2, Ülvi İbazadə 1 dəfə rəqib qapısına yol tapıb. Qonaqlar isə bu qollardan yalnız birinin əvəzini çıxa bilib. Fasilədən sonra “Qəbələ” daha 3 dəfə fərqlənib. Əvvəl Ramil Həsənov het-trikini rəsmiləşdiribsə, ardınca Ehtiram Şahverdiyev daha 2 qol vuraraq poker müəllifi olub. Bununla da çempionatdakı qol sayını 7-yə çatdıran Ehtiram bombardirlər siyahısında liderə çatıb.
Beləliklə, 8:1 hesabı ilə qalib gələn əvəzedicilərimiz ardıcıl 4-cü qələbəsini qazanaraq turnir cədvəlinin 4-cü pilləsində möhkəmlənib. “Zirə” ilə qarşılaşma həm də rekordlarla əlamətdar olub. Mövsümün ən böyükhesablı qələbəsini qazanan “Qəbələ” tarixinin rekordunu da təkrarlayıb. Belə ki, əvəzedicilərimiz 2008/09 mövsümündən iştirak etdiyi çempionatda ən böyük fərqli qələbəsini əldə edib. Komandamız 2013/14 mövsümünün son turunda “Sumqayıt”ı 7:0 hesabı ilə məğlub etmişdi. Həmin rekordu təkrarlayan komandamız bir oyundakı qol sayında ən yüksək göstəricisinə imza atıb. 526 gün əvvəl - 2014-cü il mayın 16-dakı oyundan fərqli bu dəfə 8 top vuran əvəzedicilərimiz tarixində ilk dəfə bir matçda bu qədər məhsuldar olub.
| 1 | Sumqayıt | 9 | 6 | 2 | 1 | 25-8 | 20 |
| 2 | Neftçi | 9 | 6 | 1 | 2 | 25-10 | 19 |
| 3 | Kəpəz | 9 | 6 | 1 | 2 | 13-7 | 19 |
| 4 | Qəbələ | 9 | 5 | 0 | 4 | 21-11 | 15 |
| 5 | Rəvan | 9 | 4 | 0 | 5 | 13-14 | 12 |
| 6 | Qarabağ | 9 | 3 | 2 | 4 | 11-10 | 11 |
| 7 | Zirə | 9 | 3 | 1 | 5 | 9-22 | 10 |
| 8 | İnter | 9 | 3 | 1 | 5 | 13-18 | 10 |
| 9 | Xəzər Lənkəran | 9 | 3 | 0 | 6 | 11-24 | 9 |
| 10 | AZAL | 9 | 2 | 0 | 7 | 9-26 | 6 |
