“Neftçi” – “Qəbələ” – 1:1
(Uqo Barqas, 30 // Murad Musayev, 40)
Əvəzedicilərin çempionatında XXII turun növbəti oyunu keçirilib. Turun ikinci oyun gününün ilk qarşılaşması “Bayıl Arena”da baş tutub. Çempionatın lideri “Qəbələ” Bakı səfərində “Neftçi” ilə qarşılaşıb. Mükafatlar uğrunda mübarizə aparan rəqiblərin görüşü qarşılıqlı hücumlar şəraitində keçib. Liderə çatmaq üçün qalib gəlmək iddiasında olan meydan sahibləri hesabı 30-cu dəqiqədə açıb. Bakılıların heyətində Uqo Barqas fərqlənib. Hüseynqulu Quliyevin yetirmələri 10 dəqiqə sonra hesabda tarazlıq yaradıb. “Qırmızı-qaralar”ın bərabərlik qoluna Murad Musayev imza atıb – 1:1. Bu, matçda vurulan son qol olub. Komandaların ikinci yarıdakı səylərinə baxmayaraq, hesab dəyişməz qalıb. Beləliklə, paytaxt səfərindən 1 xalla dönən “Qəbələ” xal hesabını 45-ə çatdırıb və liderliyini qoruyub.
