Bu gün əvəzedicilərin çempionatında XXVII turun oyunları keçirilib. Bu turadək çempionatın lideri olan “Qəbələ” öz meydanında “İnter”i qəbul edib. Görüş qarşılıqlı hücumlar şəraitində keçsə də, meydan sahibləri ərazi üstünlüyü qazana bilib. Buna baxmayaraq, “qırmızı-qaralar” rəqibin müdafiə səddini yara bilməyib. Mükafatçılar sırasına düşmək şansını itirən paytaxt təmsilçisinin də hücumları bəhrəsiz qalıb. Nəticədə qarşılaşma qolsuz sülhlə başa çatıb.
Beləliklə, ardıcıl 3 oyundur qalib gələ bilməyən Hüseynqulu Quliyevin yetirmələri zirvəni əldən verib. Çempionatın sonuna bir tur qalmış 52 xala malik “Qəbələ” liderdən 1 xal geri qalır. Aprelin 28-də keçiriləcək son turda komandamız “Sumqayıt”ın qonağı olacaq.
| N | Klublar | O | Q | H | M | T-F | X |
| 1 | Qarabağ | 27 | 15 | 8 | 4 | 49-25 | 53 |
| 2 | Qəbələ | 27 | 16 | 4 | 7 | 51-28 | 52 |
| 3 | Neftçi | 27 | 14 | 6 | 7 | 52-26 | 48 |
| 4 | İnter | 27 | 10 | 8 | 9 | 20-19 | 38 |
| 5 | Zirə | 27 | 8 | 9 | 10 | 29-30 | 33 |
| 6 | Kəpəz | 27 | 8 | 8 | 11 | 27-37 | 32 |
| 7 | Sumqayıt | 27 | 8 | 3 | 16 | 40-58 | 27 |
| 8 | AZAL | 27 | 4 | 4 | 19 | 27-72 | 16 |
