Misli Premyer Liqasının XX turunun “Qəbələ” – “Sabah” oyunundan (0:3) sonra “qırmızı-qaralar”ın baş məşqçisi Elmar Baxşıyevin mətbuat konfransı keçirilib. Sizi 43 yaşlı mütəxəssisin fikirləri ilə tanış edirik:
“Oyun barədə çox danışmayacağam. Hakimliklə bağlı heç nə deməyəcəkdim. Amma vaxtı çatıb. Referi əlindən gələni etməyə çalışdı və bunu bacardı. Verilən qərarlar futbolçularda qıcıq yaradır, mənfi təsir edir. Ona görə də daha diqqətli olmalarını istəyərdik. Futbolçulara tövsiyə edirəm ki, buna önəm verməsinlər, ilk dəfə deyil. Toparlanmaq və irəli baxmaq lazımdır. Futbolçular aqressiv, istəkli olmalıdır. Daha da mübariz, əzmkar oynamaq lazımdır. Yaxın günlərdə heyətimizi yeni hücumameylli futbolçu ilə gücləndirəcəyimiz gözlənilir. Oyunçularım iradəlidirlər, başqa mövqedə boşluq olanda bir-birini əvəzləyiblər. Futbolçularıma inanıram”.
