QƏBƏLƏ FC

Əvəzedicilər çempionatının XV tutunda “Qəbələ” doğma divarlar arasında “Bakı”ya 1:0 hesabilə qalib gəldi. Bu qələbə ilə arxada qoyduğumuz 14 tur ərzində məğlubiyyət acısı dadmayan paytaxt təmsilçisinin uğurlu seriyasına son qoyuldu. Matçdan sonra gabalafc.az-la fikirlərini bölüşən “Qəbələ”nin əvəzedicilərdən ibarət komandasının baş məşqçisi Luis Araqon “Bakı” ilə matçın çətin olacağını bildiklərini, amma öncədən qələbəyə inandıqlarını bildirdi:

“Rəqibimiz öncədən göstərdiyi oyunla və qazandığı qələbələrlə hansı səviyyədə olduğunu nümayiş etdirmişdi. Çətin və gərgin oyun olacağını bilirdik. “Bakı” ilə ilk oyun da maraqlı alınmışdı. Lakin həmin oyunda məğlubiyyətlə barışmalı olmuşduq. Bu matçda komandanın hər bir üzvü qələbəyə inanırdı və nəticədə biz istədiyimizi əldə etdik.”

İspaniyalı mütəxəssis hər keçən gün yetirmələrinin inkişaf etdiyini və görmək istədikləri sistemə uyğunlaşdıqlarını söylədi:

“İlk gündən məqsədimiz komanda oyunu nümayiş etdirmək, meydançada komanda şəklində hərəkət etməkdir. Heyətdəki futbolçular artıq bunu gözəl başa düşür və verdiyimiz tapşırıqları yerinə yetirmək üçün bacarıqlarını və güclərini ortaya qoyurlar. Son oyun da göstərdi ki, biz komanda oyunu oynayırıq və belə oyun sayəsində istədiyimiz nəticələri əldə edə bilərik. “Qəbələ” Futbol Akademiyasında da futbolçulara eyni fəlsəfə aşılanır. Bu da gənc futbolçuların komandamıza uyğunlaşması problemini aradan qaldırır”.