Braziliyanın Rio-de-Janeyro şəhərində keçirilən XXXI Yay Olimpiya Oyunlarının boks yarışlarında növbəti döyüşlər keçirilib. “Qəbələ” İdman Klubunun və Azərbaycan yığmasının təmsilçisi Kamran Şahsuvarlı ikinci görüşünü keçirib. 75 kq çəki dərəcəsində çıxış edən idmançımız 1/8 finalda rusiyalı Artyom Çebotaryovla qarşılaşıb. Gərgin keçən mübarizədə Şahsuvarlı qalib gəlib. O, rəqibini 2:1 (29:28, 29:28, 28:29) hesabı ilə məğlub edib. Bununla da Kamran Rio-2016-nın 1/4 final mərhələsinə yüksəlib. İdmançımız yarımfinalın bir addımlığında Qazaxıstan boksçusu Janibek Alimxanulı ilə qarşılaşacaq. Bu döyüş avqustun 15-də baş tutacaq. Həmin görüşdə qələbə qazanan idmançı yarımfinala vəsiqə qazanmaqla mükafatlardan birini təmin edəcək.
Xatırladaq ki, Şahsuvarlı ilk döyüşdə çinli Zao Minqqanqa qalib gəlmişdi – 3:0 (30:27, 30:27, 30:27).
