QƏBƏLƏ FC

Azərbaycan milli komandasının oyunu ilə əlaqədar Topaz Premyer Liqasında yaranmış fasilədən sonra “Qəbələ” ilk oyununu noyabrın 19-da keçirəcək. Komandanın rəqibi Gəncənin “Kəpəz” klubu olacaq. Rəqibin ölkənin ən zəngin tarixə malik klublarından biri olmasına baxmayaraq, komandalar cəmi 7 dəfə görüşüb.

Bu da qərblilərin müəyyən müddətə fəaliyyətini dayandırması ilə bağlıdır. Bu üzdən “Qəbələ” ilə Gəncə təmsilçisi arasında ilk oyun 2 il əvvəl oktyabrın 31-də baş tutub. Həmin vaxt “Gəncə” adlanan klubla 2 dəfə təsnifat mərhələsində görüşən “Qəbələ” qolsuz heç-heçələrlə kifayətlənmişdi. Bu komandalar həmin – 2010/11 mövsümündə 7-12-ci yerlər uğrunda final mərhələsində də üz-üzə gəldi. Lakin yenə hər 2 matç heç-heçə bitdi. Yeganə fərq ondan ibarət oldu ki, Qəbələdə komandalar 1 xalı 1 qolla qazandılar.

Ötən mövsüm isə komandaların hərəsi öz meydanında qalib gəlməyi bacardı. “Qəbələ” doğma divarlar arasında  2 cavabsız qol vurmağın öhdəsindən gəlsə də, gəncəlilər evdə minimal fərqə sevindi. Baxmayaraq ki, “Qəbələ” uduzduğu səfər matçında da 2 qol vurdu. Gəncə təmsilçisi cari mövsüm də ev oyununda minimal fərqli qələbəyə sevindi.

Bununla da ölkə kubokunda heç vaxt görüşməyən komandaların çempionatdakı 7 görüşündə top fərqi tarazlaşdı – 5:5. Düzdür, qələbə sayında “Kəpəz” öndədir. Lakin qonaqların heç vaxt qalib gəlmədiyi duellərdə 2-ci qələbəni qazanıb tarazlığa nail olmaq növbəsi “Qəbələ”nin tərəfindədir. Son 3 qarşılaşmada meydan sahiblərinin qalib gəlmək ənənəsinin davamı bunun üçün yetərlidir.

2010/11	31.10.2010	Premyer Liqa	Gəncə - Qəbələ	0:0
2010/11	27.02.2011	Premyer Liqa	Qəbələ - Gəncə	0:0
2010/11	02.04.2011	Premyer Liqa	Qəbələ - Gəncə	1:1
2010/11	12.05.2011	Premyer Liqa	Gəncə - Qəbələ	0:0
2011/12	16.10.2011	Premyer Liqa	Qəbələ - Kəpəz (Gəncə)	2:0
2011/12	07.03.2012	Premyer Liqa	Kəpəz (Gəncə) - Qəbələ	3:2
2012/13	15.09.2012	Premyer Liqa	Kəpəz (Gəncə) - Qəbələ	1:0