“Qəbələ” 2:1 “Qarabağ”
14 dekabr 2014. Saat 15:00. Qəbələ şəhər stadionu,500 tamaşaçı
Baş hakim: Fariz Yusifov
Baş hakimin köməkçiləri: Yaşar Abbasov, Nahid Əliyev
Dördüncü hakim: Rəhim Həsənov
AFFA nümayəndəsi: Şaiq Həmidov
Hakim-inspektor: Asim Xudiyev
Sarı vərəqələr: Urfan Abbasov, 45 (qeyri-idman hərəkəti); Kamran Ağayev, 68 (vaxtı uzatdığına görə); Dodo, 90+2 (vaxtı uzatdığına görə) // İlqar Qurbanov, 50 (qeyri-idman hərəkəti); Admir Teli, 80 (qeyri-idman hərəkəti)
Qollar: Bəxtiyar Soltanov, 46; Dodo, 60 // Namiq Ələsgərov, 23
Artırılan vaxt: I hissədə 1 dəq.; II hissədə 4 dəq.
Bu gün Topaz Premyer Liqasında XVI tura yekun vurulub. Öz meydanında növbəti sınağına çıxan “Qəbələ” çempionatın lideri “Qarabağ”ı qəbul edib. Rumıniyalı baş məşqçi Dorinel Muntyanunun istefasından sonra ilk matçına çıxan “qırmızı-qaralar” son duellərdə xal ala bilmədiyi ölkə çempionu ilə matça uğursuz seriyaları qırmaq üçün çıxıb. İlk dəfə Sənan Qurbanovun rəhbərliyi altında meydana çıxan komandanın heyətində ötən turla müqayisədə 3 dəyişiklik edilib. Ruslan Tağızadə və cəzalılar Cavid Hüseynovla Pavol Farkaşın yoxluğunda start “11-lik”də Elvin Camalov, Sadiq Quliyev, Bəxtiyar Soltanov yer alıb.
Qarşılıqlı hücumlarla başlaya görüşün əvvəli hər iki komandanın ötürmələrdəki səhvləri ilə yadda qalıb. Qonaqlar nisbətən fəal görünsə də, ilk real qol vəziyyətini “Qəbələ” yaradıb. 19-cu dəqiqədə sağ cinahdan ötürmə alan Ekiqo Ehiosun cərimə meydanının daxilindən qapının sol küncünü nişan alıb. Lakin ağdamlıların qapıçısı İbrahim Şehiç topa toxunmaqla küncə çıxarmağa nail olub. 3 dəqiqə sonra qonaqlar istəyinə çatıb. Kamran Ağayev onunla təkbətək çıxan Namiq Ələsgərovu qabaqlayıb topa zərbə vursa da, yarımmüdafiəçiyə çarpan top qapıya istiqamətlənib – 0:1. Matçın 29-cu dəqiqəsində “Qarabağ”ın cərimə meydanında qarışıqlıq yarananda azarkeşlər əllə oyuna görə penalti gözləsə də, Fariz Yusifov fərqli qərar verib. Buraxılan qoldan sonra üstünlüyə yiyələnən “Qəbələ” fəal olsa da fasiləyədək real təhlükə yarada bilməyib. 38-ci dəqiqədə soldan cərimə meydanına daxil olan Markinyoşun zərbəsində isə dəqiqlik çatmayıb. Dodonun təhlükəli nöqtədən vurduğu cərimə zərbəsi zamanı da top qapının üstündən keçib.
İkinci hissə qolla başlayıb. Ekiqo Ehiosun sol cinahda iki müdafiəçidən sıyrılıb qapı önünə Bəxtiyar Soltanova dəqiq ötürmə verib. Yarımmüdafiəçi baş zərbəsi ilə uzaq küncü nişan alıb – 1:1. Hesab bərabərləşəndən sonra daha da fəallaşan “Qəbələ” Ekiqonun sol cinahdakı oyunu sayəsində ardıcıl təhlükələr yaradıb. 59-cu dəqiqədə məhz onun ötürməsindən sonra qapının bir neçə metrliyində topa zərbə endirən Soltanova dublunu rəsmiləşdirmək üçün azca dəqiqlik kifayət etməyib. Cəmi bir dəqiqə sonra Ekiqonun 11 metrlik nöqtənin yaxınlığına verdiyi ötürməni Dodo dəqiq zərbə ilə tamamlayıb – 2:1. Bu qoldan sonra da meydan sahibləri bir müddət üstünlüyə sahib olub. Lakin qonaqlar əvəzetmələrlə oyunda tarazlıq yaradıb. Lakin qarşılıqlı hücumlar real qol vəziyyətinin yaranması ilə nəticələnməyib. Yalnız 88-ci dəqiqədə qapıçı meydanının xətti üzərində baş zərbəsi endirən Muarem Muarem qola yaxın olub. Lakin qonaqların makedoniyalı legioneri çərçivəyə düşməyib. 2 məhsuldar ötürmə verən Ekiqo oyuna artırılan vaxtın sonlarında əlverişli mövqedə topa yiyələnib, qapıya təhlükəli zərbə endirsə də, top dirəyin yanından ötüb.
Beləliklə, Premyer Liqadakı son 5 matçda qələbə qazana bilməyən “Qəbələ” 51 gündən sonra hesabına 3 xal yazıb. “Qırmızı-qaralar” həm də ardıcıl 7 dəfə məğlub olduğu “Qarabağ”la matçlardakı seriyanı qırıb.
“Qəbələ”
1. Kamran Ağayev (k)
4. Elvin Camalov
5. Sadiq Quliyev
8. Markus Vidal
(16. Ruslan Tağızadə, 86)
10. Dodo
(13. Murad Musayev, 90+3)
15. Ruslan Abışov
25. Adrian Ropotan
27. Bəxtiyar Soltanov
34. Urfan Abbasov
44. Rafael Santos
90. Ekiqo Ehiosun
Ehtiyat oyunçular:
30. Anar Nəzirov
11. Andrey Kristea
12. Aleksandru Benqa
21. Yazalde Pinto
99. Tellur Mütəllimov
Məşqçi: Sənan Qurbanov
“Qarabağ”
13. İbrahim Şehiç
3. Tərlan Quliyev
(25. Ansi Aqolli, 67)
6. Hacı Əhmədov
(2. Qara Qarayev, 60)
7. Namiq Yusifov (k)
(20. Riçard Almeyda, 63)
10. Muarem Muarem
18. İlqar Qurbanov
24. Admir Teli
41. Leroy Corc
55. Bədavi Hüseynov
77. Cavid Tağıyev
99. Namiq Ələsgərov
Ehtiyat oyunçular:
1. Fərhad Vəliyev
5. Maksim Medvedev
14. Rəşad Sadıqov
33. Şəhriyar Əliyev
Baş məşqçi: Qurban Qurbanov
