Misli Premyer Liqasının XIX turundan “Qəbələ” – “Sumqayıt” oyunundan (0:1) sonra “qırmızı-qaralar”ın baş məşqçisi Elmar Baxşıyevin mətbuat konfransı keçirilib. Sizi 44 yaşlı mütəxəssisin fikirləri ilə tanış edirik:
“Dinamik oyun alındı. Hava şəraitinə baxmayaraq, komandalar meydançada sürətli futbol nümayiş etdirirdilər. Düşünürəm ki, üstünlüyə sahib idik. Yaxşı imkanlarımız oldu, amma dəyərləndirə bilməmək öz sözünü dedi. Komandanın oyun planı bizi qane etdi. Nəticə baxımından istədiyimiz kimi olmadı. Müdafiəçimiz diqqətsizlik etdi və penalti ilə nəticələndi. Futbolçu qaydaları bilməlidir. İlk turdan optimal heyəti görmək istəyirəm. Lakin qırmızı vərəqələr, öz səhvimizdən buraxılan qollar olur. Meydanda komanda oyunu var idi. Bütün futbolçulara güvənirəm”.
