İdman Araşdırmalar Mərkəzinin həyata keçirdiyi “İlin Qalibləri-2015” layihəsinin mükafatlandırma mərasimi keçirilib. Bu gün “Qafqaz Point” otelində keçirilən tədbirdə başa çatmaqda olan ilin ən yaxşılarının adları açıqlanıb və onlara mükafatlar təqdim edilib. KİV nümayəndələri arasında sorğu nəticəsində 8 nominasiya üzrə fərqlənənlər idman ictimaiyyətinin tanınmış nümayəndələri tərəfindən mükafatlandırılıblar. İdman Araşdırmalar Mərkəzinin ardıcıl 3-cü il həyata keçirdiyi layihənin qalibləri arasında “Qəbələ” İdman Klubu da yer alıb. 2014/15 mövsümünü bürünc medalla başa vuran, Avropa Liqasında 4 təsnifat mərhələsini keçərək, qrupa vəsiqə qazanan “qırmızı-qaralar” “İlin komandası” nominasiyasının qalibi olub. Mükafat klubumuzun vitse-prezidenti Fariz Nəcəfova təqdim edilib. Tədbirdə çıxış edən Nəcəfov “qırmızı-qaralar”ın ən yaxşı seçildiyi üçün respondentlərə və təşkilatçılara təşəkkür edib:
“Әgәr qazandığımız qәlәbәlәrlә xalqımızı sevindirə bilmişiksә, buna çox şadıq. Bu uğurları bizimlә birlikdə yaşayan mediaya tәşәkkür edirәm. İdmanımıza təmənnasız dәstәk olan hәr kәsә minnətdaram”.
“Qəbələ”nin tarixi uğurunda böyük əməyi olan komandamızın baş məşqçisi Roman Qriqorçukun da xidmətləri diqqətdən kənarda qalmayıb. Ukraynalı mütəxəssis “İlin baş məşqçisi” nominasiyasında bütün həmkarlarını arxada qoyub. Bu mükafat tədbirə qatılan mütəxəssisin özünə təqdim olunub. Ukraynalı çalışdırıcı mükafatlandırılmasına münasibət bildirib: “Hәr kәsә, bütün azәrbaycanlı futbol adamlarına tәşәkkür edirәm. Azәrbaycanda ən yaxşı məşqçi adına layiq çox mütəxəssis var. Buna layiq görüldüyüm üçün sevincliyәm”.
İdman Araşdırmalar Mərkəzinin daha bir mükafatını “Qəbələ”nin mətbuat katibi Anar Hacıyev qazanıb. O, 2015-ci ildəki fəaliyyətinin nəticəsində “İlin mətbuat katibi” nominasiyasının qalibi kimi təltif olunub. Mükafatlandırma mərasimində çıxış edən Hacıyev buna şad olduğunu bildirib:
“2015-ci il Azərbaycan idmanı üçün əlamətdar oldu. Arxada qoyduğumuz il həm ölkəmizin, həm də “Qəbələ”nin idmançıları üçün uğurlu alındı. Bu uğurda zərrə qədər də olsa payımız varsa, buna görə çox sevincliyik. Mükafatı qazanmaqla üzərimizə düşən məsuliyyət daha da artdı”.
Bundan başqa, “Qəbələ” İK qəzetinin əməkdaşı Mehman Süleymanov idman jurnalistləri arasında münasibətlərin möhkəmləndirilməsindəki xidmətlərinə görə mükafatlandırılıb. Təcrübəli jurnalistə "Həmrəylik Kuboku" təqdim edilib.
