“Anderlext” (Belçika) – “Qəbələ” - 3:1
UEFA Avropa Liqası. Qrup mərhələsi
C qrupu, I tur
15 sentyabr. Saat 21:00. Brüssel. “Konstant Vanden Stok” stadionu
Baş hakim: Harald Lexner (Avstriya)
Baş hakimin köməkçiləri: Maksimilian Kolbitş, Andreas Heydenrix (hər ikisi Avstriya)
Əlavə köməkçi hakimlər: Markus Hameter, Aleksander Harkam (hər ikisi Avstriya)
Dördüncü hakim: Andreas Staudinger (Avstriya)
Hakim-İnspektor: Lusiano Luçi (İtaliya)
UEFA nümayəndəsi: Emil Ubias (Çexiya)
Qollar: Lukaş Teodorçik, 14, Rafael Santos, 41-öz qapısına, Dieqo Kapel, 77 // Baqali Dabo, 20
Sarı vərəqələr: Uroş Spayiç, 56 // Rikardinyo, 81, Asif Məmmədov, 83
Artırılan vaxt: I hissədə 1 dəq.; II hissədə 3 dəq.
UEFA Avropa Liqasında qrup mərhələsinə start verilib. Ardıcıl ikinci mövsüm əsas raundda çıxış edən “Qəbələ” ilk oyununu səfərdə keçirib. “Qırmızı-qaralar” Belçikada “Anderlext”in qonağı olub. Komandamız pley-offun “Maribor”la Sloveniyadakı oyunu ilə müqayisədə meydana 2 dəyişikliklə çıxıb. Teo Uiks cəza, Nika Kvekveskiri zədə səbəbindən meydana çıxmayıb. Əvəzində zədədən dönən Rəşad Sadiqovla son transferlərdən olan Ruslan Qurbanov ilk dəqiqələrdən mübarizə aparıb.
Brüssel klubu hakimin start fiti ilə irəli atılaraq, üstünlüyü ələ almağa çalışıb. Meydan sahiblərinin bu təzyiqinin qarşısını alan “Qəbələ” təhlükəli əks-hücumlarla diqqət çəkib. 8-ci dəqiqədə Qurbanovun ötürməsindən sonra qapıçı ilə üz-üzə qalmağa yaxın olan Baqali Dabo cərimə meydanında büdrəyərək, yıxıldığından qol şansını qaçırıb. “Anderlext” isə tezliklə hücumlarından birini qola çevirə bilib. Uroş Spayiçin sağ cinahdan cərimə meydanına ötürməsini buraxan Sofian Hanni Lukaş Teodorçikin əlverişli mövqeyə çıxmasına şərait yaradıb. Polşalının zərbəsi qarşısıalınmaz olub. Bunadək bir neçə epizodda inamlı çıxış edən Dmitri Bezotosnı qola mane ola bilməyib. Lakin belçikalıların sevinci uzun sürməyib. Ruslanın ötürməsindən sonra cərimə meydanında qapını nişan alan Filip Ozobiçin zərbə cəhdi topun Daboya düşməsi ilə nəticələnib. Müdafiəçiyə çarpan topa qarşısıalınmaz zərbə vuran fransalı hesabda tarazlıq yaradıb. Bu qoldan sonra Baqali daha bir real imkan əldə etsə də yararlana bilməyib. Bir müddət üstün futbol oynayan meydan sahibləri qol imkanları yaratmaqda çətinlik çəkib. Əvəzində oyunu bərabərləşdirən “Qəbələ” hücuma hücumla cavab verib. Belə həmlələrin birində sürətli əks-hücum təşkil edən “Anderlext” ön xətdə say üstünlüyü qazanıb. Belçikalıların cərimə meydanındakı paslaşmasının qarşısını almağa çalışan Rafael Santos avtoqol müəllifi olub.
Fasilədən sonra topa nəzarəti əldən verməyən meydan sahibləri daha çox hücumlar təşkil edib. Lakin belçikalılar çərçivəni dəqiq nişan almaqda çətinlik çəkib. Hissənin əvvəlində Teodorçik və Anni əlverişli mövqedən hədəfə düşməyiblər. Ozobiçin qüvvətli zərbəsi yaddaqalan olsa da, ona dəqiqlik çatmayıb. İkinci hissənin ən fəallarından olan Stançu və Kipçu bir neçə dəfə qapıya zərbə endirsə də, Bezotosnının inamlı oyunu qola imkan verməyib. 74-cü dəqiqədə belçikalı futbolçu qapıçı ilə üz-üzə qalmağa yaxın olsa da, vəziyyəti düzgün qiymətləndirən ukraynalı qolkiper topa yiyələnib. Lakin “Anderlext” 3-cü qolu vurmağa müyəssər olub. Müdafiəçidən sıyrılan Stançunun qapıya paralel ötürməsini tamamlayan Dieqo Kapel topu boş qapıdan keçirib. Qoldan dərhal sonra “Qəbələ” fərqi azaltmaq imkanı qazanıb. Lakin Rafaelin zərbəsindən sonra top dirəyin yanından keçib. Brüssellilər topa nəzarət etsə də, komandamız da fərqlənmək imkanı əldə edib. Uzatma dəqiqələrində Dabonun qapıçı ilə təkbətək çıxmasına qolkiperin irəli atılıb, topa yiyələnməsi mane olub.
“Anderlext”
1. Devi Ruf
4. Serin Mboci
5. Uroş Spayiç
11. Aleksandru Kipçu
(17. Dieqo Kapel, 72)
14. Bram Neytink
18. Frank Aşamponq
31. Yuri Tilemans
(8. Stefan Baci, 18)
32. Leander Dendoker
73. Nikolae Stançu
91. Lukaş Teodorçik
(9. Hamdi Harbaui, 80)
94. Sofian Anni (k)
Ehtiyat oyunçular:
23. Frank Buks
3. Olivye Deşaxt
22. İdrisu Dumbia
41. Emmanuel-Acey Sova
Baş məşqçi: Rene Veyler
“Qəbələ”
22. Dmitri Bezotosnı
3. Vojislav Stankoviç
6. Rəşad Sadiqov (k)
9. Sergey Zenyov
(32. Rəşad Eyyubov, 90+3)
10. Ruslan Qurbanov
(11. Asif Məmmədov, 46)
15. Vitali Vernidub
(30. Petar Franyiç, 59)
17. Məhəmməd Mirzəbəyov
18. Baqali Dabo
19. Filip Ozobiç
20. Rikardinyo
44. Rafael Santos
Ehtiyat oyunçular:
33. David Pietrzikeviç
13. Murad Musayev
34. Ürfan Abbasov
88. Tellur Mütəllimov
Baş məşqçi: Roman Qriqorçuk
