QƏBƏLƏ FC

“Qəbələ” – “Borussiya” (Dortmund, Almaniya) - 1:3
UEFA Avropa Liqası, qrup mərhələsi, C qrupu, III tur
22 oktyabr. Saat 20:00. Bakı. “Bakcell Arena” stadionu
Baş hakim: İvan Bebek (Xorvatiya)
Baş hakimin köməkçiləri: Tomislav Petroviç, Miro Qrqiç (hər ikisi Xorvatiya)
Əlavə köməkçi hakimlər: Mariyo Strahonya, Qoran Qabrilo (hər ikisi Xorvatiya)
Dördüncü hakim: Qoran Pataki (Xorvatiya)
UEFA nümayəndəsi: Filipp Prudon (Fransa)
Hakim-inspektor: Nikolay Levnikov (Rusiya)
Qollar: Dodo, 90+3//Pyer-Emerik Obameyanq, 31, 38, 72
Sarı vərəqələr: Vojislav Stankoviç, 69, Samir Zərgərov, 86// Sokratis Papastatopoulos, 47, Sven Bender, 83
Artırılan vaxt: I hissədə 1 dəq.; II hissədə 3 dəq.

Bu gün UEFA Avropa Liqasında qrup mərhələsinin III turuna start verilib. “Qəbələ” öz meydanında Almaniyanın “Borussiya” klubu ilə qarşılaşıb. Komandamız Dortmund təmsilçisi ilə qarşılaşmaya ötən matçdakı heyətlə çıxıb. Belə ki, baş məşqçi Roman Qriqorçuk “Krasnodar”la Rusiyadakı oyunda güvəndiyi “11-liy”ə C qrupunun lideri ilə matçda da ilk dəqiqələrdən şans verib.
Qarşılaşma qonaqların hücumları ilə başlayıb. Almaniya təmsilçisi start fitindən sonra erkən qol üçün irəli atılsa da, ilk real qol epizodlarını “Qəbələ” yaradıb. “Qırmızı-qaralar” qısa zaman kəsiyində 3 dəfə fərqlənməyə yaxın olub. Əvvəl müdafiəçinin səhvindən sonra topa yiyələnən Fakundo Pereyra qapıçı ilə təkbətək çıxmaq şansını qaçırıb. O, belə top itkisini gözləmədiyindən topla yaxşı rəftar edə bilməyib. Ardınca Rikardinyonun sol cinahdan qapıçı meydanında olan Sergey Zenyova dəqiq ötürməsini sonuncu baş zərbəsi ilə tamamlasa da, çərçivəyə düşməyib. Növbəti hücum zamanı sağla cərimə meydanına daxil olub üzbəüz qaldığı qapıçının yanından topu çərçivəyə göndərib. Dodonun da qapıya istiqamətləndiyi vaxtda topu boş qapıdan Mattias Ginter çıxarıb. O, 10-cu dəqiqədə də “Borussiya”nı qoldan xilas edib. Sağ cinahdan ötürmədən sonra Dodo qapıçı ilə üz-üzə qalıb, topu onun yanından boş qapıya göndərib. Lakin bu dəfə də Ginter özünü yetirib, topu uzaqlaşdırıb. Topa nəzarət qonaqlarda olsa da, daha kəsərli hücumlar təşkil edən “Qəbələ”nin arxa xəttini daha çox Obameyanq narahat edib. Onun dəqiq zərbələrindən birində Dmitri Bezotosnı inamlı oynayıbsa, növbəti epizodda Arif Daşdəmirov qapıya ünvanlanan zərbəni zərərsizləşdirib. Komandamız isə Aleksey Qayın baş zərbəsi ilə Roman Vaydenfellerə gərginlik yaradıb. Dodonun cərimə meydanına ötürməsindən sonra Aleksey Antonovun zərbəsini isə müdafiəçilər küncə çıxarıb. Hesabı da meydanda ən fəallardan olan Obameyanq açıb. Qabonlu futbolçu 31-ci dəqiqədə cərimə meydanından kənardan vurduğu zərbə ilə “Qəbələ”nin evdə keçirdiyi avrokubok oyunlarındakı quru seriyasını qırıb – 0:1. Bu qoldan sonra da hücumlarını davam etdirən qonaqlar 7 dəqiqə sonra fərqi artırıb. Sol cinahla irəliləyən Obameyanq müdafiəçidən sıyrılıb qarşısıalınmaz zərbə ilə dublunu rəsmiləşdirib – 0:2. Dortmund təmsilçisi hücumlarına ara verməsə də, “Qəbələ” daha iki qol vəziyyəti yarada bilib. Lakin hər iki epizodda Vaydenfeller komandasını qoldan xilas edib. Təcrübəli qolkiper əvvəl Dodonun, ilk hissənin sonlarında isə Vojislav Stankoviçin zərbəsini dəf edib.
Oyunun ikinci yarısı qarşılıqlı hücumlarla başlayıb. “Borussiya” üstünlüyə yiyələnsə də, “qırmızı-qaralar” da rəqib qapısına hücumlar təşkil edib, oyunda dönüş yaratmağa çalışıb. Qriqorçuk əvəzetmə ilə orta xətti gücləndirməyə çalışsa da, Samir Zərgərovun meydana daxil olmasından sonra da “Borussiya” topa nəzarət edib. 70-ci dəqiqədə Bezotosnı onunla təkbətək çıxan Hofmannın qol vurmasının qarşısını alıb. Qapıçımız künc zərbəsindən sonra cərimə meydanının xətti üzərindən Benderin qapıya ünvanlandığı topu da qaytarmağa müvəffəq olub. Amma özünü yetirən Obameyanq topu ram edib, təkrar zərbə ilə ona mane olmaq istəyən qolkiperimizin qapısına 3-cü qolunu vurub – 0:3. “Qəbələ”nin fərqi azaltmaq istəyi Antonovla gerçəkləşməyə yaxın olub. Lakin 21 metrdən endirdiyi güclü zərbəyə dəqiqlik çatmayıb. Qarşılaşma ərzində bir neçə dəfə “qırmızı-qaralar”ı qoldan xilas edən Bezotosnı oyunun 90-cı dəqiqəsində Obameyanqın fərqlənməsinə imkan verməyib. Oyunun uzatma dəqiqələrində komandamız fərqi azaltmağa nail olub. Antonovun ilk zərbəsini qapıçı dəf etsə də, yenidən topa yiyələnən hücumçu uzaq dirəyə yaxın mövqedə qərarlaşan Dodoya dəqiq ötürmə verib. Qrup mərhələsində “Qəbələ”nin ikinci qolunun da müəllifi olan kapitan “qırmızı-qara” formada 29-cu dəfə fərqlənib – 1:3.

“Qəbələ”
22. Dmitri Bezotosnı
3. Vojislav Stankoviç
15. Vitali Vernidub
20. Rikardinyo
21. Arif Daşdəmirov
10. Dodo (k)
19. Aleksey Qay
88. Derlis Meza Kolli
(6. Rəşad Sadiqov, 83)
9. Sergey Zenyov
(7. Ermin Zets, 79)
32. Fakundo Pereyra
(66. Samir Zərgərov, 60)
69. Aleksey Antonov

Ehtiyat oyunçular:
33. David Pietrzkieviç
34. Ürfan Abbasov
4. Elvin Camalov
8. Məhəmməd Mirzəbəyov

Baş məşqçi: Roman Qriqorçuk

“Borussiya"
1. Roman Vaydenfeller
3. Jo Ho Park
(29. Marsel Şmeltser, 69)
15. Mats Hummels (k)
(26. Lukas Pişek, 63)
25. Sokratis Papastatopoulos
28. Mattias Ginter
33. Julian Veyql
7. Yonas Hofmann
8. İlkay Gündoğan
(6. Sven Bender, 63)
11. Marko Roys
23. Sindzi Kaqava
17. Pyer-Emerik Obameyanq

Ehtiyat oyunçular:
38. Roman Burki
9. Adnan Yanuzay
27. Qonzalo Kastro
20. Adrian Ramos

Baş məşqçi: Tomas Tuxel