“Qəbələ” – “Səbail” – 3:0
12 avqust 2018. Saat 19:00. Qəbələ şəhər stadionu, 600 tamaşaçı
Baş hakim: Əliyar Ağayev
Baş hakimin köməkçiləri: Rza Məmmədov, Zeynal Zeynalov
Dördüncü hakim: Orxan Məmmədov
AFFA nümayəndəsi: Şaiq Həmidov
Hakim-inspektor: Əhmədağa Cabbarov
Sarı vərəqələr: Urfan Abbasov, 27 (qeyri-idman hərəkəti)
Qollar: Asif Məmmədov, 23; Urfan Abbasov, 63; Ceyms Adeniyi, 82
Artırılan vaxt: I hissədə 1 dəq.; II hissədə 3 dəq.
Topaz Premyer Liqasının 2018/19 mövsümünün ilk turunun ikinci oyun gününə start verilib. Günün ilk qarşılaşması Qəbələ şəhər stadionunda baş tutub. “Qəbələ” öz meydanında “Səbail”lə qarşılaşıb. “Qırmızı-qaralar” UEFA Avropa Liqasının “Proqres”lə Lüksemburqdakı oyunu ilə müqayisədə matça 4 dəyişikliklə başlayıb. Baş məşqçi Sənan Qurbanov bu dəfə Vojislav Stankoviç, Elvin Camalov, Lalavele Atakora və Bəhlul Mustafazadəyə ilk dəqiqələrdən şans verib. Onlar Rasim Ramaldanov, Rauf Əliyev, Cavid Hüseynov və Stiven Monrozu əvəzləyib.
Matçın ilk hissəsi qarşılıqlı hücumlarla başlayıb. Qısa kəşfiyyatla kifayətlənən komandalar yüksək tempə üstünlük veriblər. Meydanın mərkəzindən daha çox qapılar önündə oynayan tərəflər real qol vəziyyəti yaratmaqda çətinlik çəkiblər. İlk qol epizodu 8-ci dəqiqədə yaranıb. Təmkin Xəlilzadənin təxminən 22 metrdən endirdiyi cərimə zərbəsini rəqib qapıçı “doqquzluq”dan çıxarıb. Rəqibin cavabı özünü gözlətməyib. Edqar Paşekonun zərbəsindən sonra Dmitri Bezotosnının topu ram edə bilməməsi gərginlik yaratsa da, özünü yetirən Vojislav Stankoviç təhlükəni sovuşdurub. Hissənin ortalarında Təmkinin ötürməsindən sonra Lalevele Atakora qola yaxın olub. Lakin legionerin 12 metrdən endirdiyi zərbəni qolkiper dəf edib. Bir dəqiqə keçməmiş hesab açılıb. Görüşün ən fəallarından olan Təmkinin sol cinahla reydindən sonra Ceyms Adeniyi qapı xəttinin üstündən çərçivəyə paralel ötürmə verib. Asif Məmmədovun topa toxunuşu “Qəbələ”nin mövsümdəki ilk qolunu gerçəkləşdirməyə yetərli olub. Hesab açılandan sonra qonaqlar xeyli fəallaşıb. Lakin “qırmızı-qaralar”ın pressinq nümayiş etdirməsi “Səbail”in hücumlarının böyüməsinə imkan verməyib. Komandamızın sürətli həmlələri də ciddi təhlükə ilə nəticələnməyib.
İkinci hissə qolla başlamağa yaxın olub. Öncə Atakoranın ötürməsindən sonra Təmkinin zərbəsi alınmayıb. Ardınca Lalavele iki əlverişli qol imkanını boşa verib. Yarımmüdafiəçi Təmkinlə Ceymsin ötürmələrini cərimə meydanı daxilindən qola çevirə bilməyib. Məğlubiyyətdən qaçmağa çalışan paytaxt təmsilçisinin hücuma meylləri “qırmızı-qaralar”ın sürətli həmlələri üçün imkan yaradıb. Növbəti belə epizod qolla başa çatıb. Adeniyidən ötürmə alan Atakora topu Ürfan Abbasovun önünə atıb. Komandamızın kapitanı cərimə meydanı daxilindən qarşısıalınmaz zərbə endirib – 2:0. Buraxılan qoldan sonra da hücumlarını davam etdirən bakılıların həmlələri qapı önünə hava ötürmələri və bir neçə qeyri-dəqiq baş zərbəsi ilə yadda qalıb. “Qəbələ” isə daha bir dəfə azarkeşlərini sevindirib. Düzdür, Atakoranın qapıçı ilə üz-üzə çıxardığı Adeniyi bu dueldən məğlub ayrılıb. Lakin uzaqlaşdırılan topa yiyələnən İlqar Qurbanovun cinahdan ötürməsini məhz Ceyms tamamlayıb – 3:0. Sonuncu qolun müəllifini əvəzləyən Rauf Əliyev də matça fəal daxil olub. Onun bir neçə zərbəsi yaddaqalan olsa da hesab dəyişməyib.
Beləliklə, “Qəbələ” yeni mövsümə böyükhesablı qələbə ilə başlayıb – 3:0.
“Qəbələ”
22. Dmitri Bezotosnı
3. Voislav Stankoviç
4. Elvin Camalov
(8. Qismət Alıyev, 89)
11. Asif Məmmədov
17. Ceyms Adeniyi
(10. Rauf Əliyev, 81)
18. İlqar Qurbanov
21. Lalavele Atakora
27. Bəhlul Mustafazadə
33. Təmkin Xəlilzadə
(7. Roman Hüseynov, 88)
34. Urfan Abbasov (k)
88. Sabien Lilay
Ehtiyat oyunçular:
35. Murad Popov
5. Rasim Ramaldanov
26. Faiq Hacıyev
32. Amin Seydiyev
99. Abbas Ağazadə
25. Əmrah Zülfüqarlı
Baş məşqçi: Sənan Qurbanov
“Səbail”
1. Emil Balayev
4. Perilyo Enrike
7. Fəhmin Muradbəyli
(18. Aqşin Qurbanlı, 67)
11. Ruslan Qurbanov
13. Şəhriyar Rəhimov
14. Rahid Əmirquliyev (k)
16. İqor Korotetski
(27. Emil Martinov, 55)
22. Edqar Paçeko
28. Kevin Kubemba
33. Tome Kitanovski
(26. Kamal Qurbanov, 82)
99. Jarjue Maudo
Ehtiyat oyunçular:
50. Fərhad Vəliyev
25. Elxan Əhmədov
21. Murtuz Abakarov
17. Elçin Rəhimli
5. Vüqar Bəybalayev
88. Orxan Qurbanlı
70. Urfan İsmayılov
Baş məşqçi: Aftandil Hacıyev
