“Qəbələ” – “İnter” – 1:1
09 noyabr 2015. Saat 16:00. Qəbələ şəhər stadionu. 1500 tamaşaçı
Baş hakim: Rəhim Həsənov
Baş hakimin köməkçiləri: Munis Abdullayev, Kamran Bayramov
Dördüncü hakim: Rəvan Həmzəzadə
AFFA nümayəndəsi: Əsgər Əmirəliyev
Hakim-inspektor: Şahin Cəfərov
Sarı vərəqələr: Məhəmməd Mirzəbəyov, 36 (qeyri-idman hərəkəti); Ürfan Abbasov, 68 (qeyri-idman hərəkəti); Vojislav Stankoviç, 71 (sistematik qayda pozuntusuna görə); Elvin Camalov, 79 (qeyri-idman hərəkəti); Arif Daşdəmirov, 90+3 (qeyri-idman hərəkəti) // Səlahət Ağayev, 77 (qeyri-idman hərəkəti); Abbas Hüseynov, 90+4 (oyunun bərpasını ləngitdiyinə görə)
Qollar: Aleksey Antonov, 30 // Dieqo Martins, 35
Artırılan vaxt: I hissədə - 2 dəq.; II hissədə - 4 dəq.
Bu gün Topaz Premyer Liqasında XII tura yekun vurulub. Milli komandaların oyunları ilə əlaqədar fasilə ərəfəsində son matç Qəbələdə baş tutub. “Qırmızı-qaralar” turun mərkəzi qarşılaşmasında “İnter”i qəbul edib. Komandamız ötən turun “Kəpəz”lə oyunu ilə müqayisədə start heyətində 4 dəyişiklik edib. Dmitri Bezotosnı, Ürfan Abbasov, Derlis Meza Kolli və Vaqif Cavadovun yoxluğunda start “11-liy”ə Andrey Popoviç, Dodo, Fakundo Pereyra və Məhəmməd Mirzəbəyov daxil edilib. Oyunun keçirildiyi tarix 9 Noyabr Azərbaycan Respublikasının Dövlət Bayrağı Gününə təsadüf etdiyindən “Qəbələ” meydana xüsusi pankartla çıxıb. Burada “Bayraq mənliyimdir, bayraq kimliyim, Bayraq – öz yurduma öz hakimliyim” ifadəsi əks olunub.
Qarşılaşma “Qəbələ”nin hücumları ilə başlayıb. Daha fəal olan “qırmızı-qaralar” üstünlüyə yiyələnsə də, qonaqların sıx müdafiə xətti qol imkanlarının yaranmasının qarşısını alıb. Komandamızın ilk real qol vəziyyətində Sergey Zenyov hesabı aça bilərdi. Lakin Arif Daşdəmirovun cinah ötürməsini qapayan estoniyalı çərçivəyə düşə bilməyib. Daha çox əks-hücumlara ümid edən “İnter”in cavabı da təhlükəli alınıb. Dieqo Martinsin güclü zərbəsini qolkiper tutub. Oyunun ilk yarısı Zenyovun zədələnərək əvəzlənməsi ilə diqqət çəkib. Onu Samir Zərgərov əvəzləyib. Fakundo Pereyranın künc zərbəsindən sonra Dodo hesabı açmağa yaxın olsa da, onun başla toxunuşundan sonra top qapının üstündən keçib. “Qəbələ” 30-cu dəqiqədə hesabı açıb. Aleksey Antonov 18 metrdən qarşısıalınmaz zərbə ilə topu tirin altına göndərib – 1:0. Mövsümdə 5-ci qolunu vuran ukraynalı çempionatın bombardirləri siyahısında 1-ci yerə şərik olub. Qonaqlar 5 dəqiqə sonra cavab qolunu vurub. Mərkəzlə irəliləyən Nizami Hacıyev təxminən 20 metrdən gücü zərbə endirib. Andrey Popoviçin qaytardığı topa hamıdan tez çatan Martins hesabda tarazlıq yaradıb – 1:1. Hücumlarını davam etdirən “Qəbələ” 39-cu dəqiqədə yenidən önə keçməyə yaxın olub. Fakundonun cərimə meydanında ötürməsindən sonra Antonovun yaxın məsafədən effektli zərbəsində dəqiqəlik çatmayıb. Fasiləyədək komandalar hərəyə daha bir təhlükəli epizod yarada bilib. Qonaqların cərimə zərbəsi yaddaqalan olub. Nizaminin cərimə meydanının xətti üzərindən göndərdiyi top canlı səddə tuş gəlib. Komandamızın cavabı isə Dodonun cinah ötürməsi ilə gəlib. Lakin rəqib qapıçı futbolçularımızı qabaqlamağa nail olub.
İkinci hissə də qarşılıqlı hücumlarla başlayıb. 47-ci dəqiqədə Popoviç cərimə meydanını tərk edərək, onunla üz-üzə qalmağa yaxın olan Limam Seydinin qabaqlamaqla təhlükəni sovuşdurub. Antonovun 25 metrdən qapıya göndərdiyi zərbə isə qüvvətli alınsa da, dirəyin yanından ötüb. Bir neçə dəqiqə sonra qapıya paralel ötürməni də futbolçularımızdan heç biri tamamlaya bilməyib. “Qəbələ”nin cərimə meydanına daxil olub, müdafiəçilərdən sıyrılan Seydi sürüşərək yıxıldığı üçün zərbə endirə bilməyib. Ardınca qapıçının sayıqlığını uzaq zərbə ilə yoxlayan Elvin Camalov da çərçivəyə düşə bilməyib. Qayın cərimə meydanına ötürməsindən sonra Antonov topu qapıya göndərsə də, dəqiq olmayıb. Popoviç isə 82-ci dəqiqədə bacarığını nümayiş etdirib. Əvvəl Martinsin qapıya ünvanlandığı topu dəf edən qolkiper təkrar zərbəni də tutmağı bacarıb. Hakimin final fitinə 5 dəqiqə qalmış “Qəbələ” təhlükəli nöqtədən cərimə zərbəsi yerinə yetirib. Amma Zərgərovun zərbəsi qapının üstündən keçib. Komandamız oyunun son dəqiqələrini də hücumda keçirsə də, qonaqların müdafiə xəttini yarıb, hesabı dəyişə bilməyib.
Beləliklə, “Qəbələ” üçü son dörd oyunda olmaqla, mövsümdə 4-cü dəfə heç-heçəylə kifayətlənib. Bu bərabərlikdən sonra xal hesabını 22-yə çatdıran komandamız turnir cədvəlinin 2-ci pilləsində qərarlaşıb.
“Qəbələ”
1. Andrey Popoviç
3. Vojislav Stankoviç
4. Elvin Camalov
8. Məhəmməd Mirzəbəyov
(34. Ürfan Abbasov, 46)
9. Sergey Zenyov
(66. Samir Zərgərov, 27)
10. Dodo (k)
19. Aleksey Qay
21. Arif Daşdəmirov
32. Fakundo Pereyra
(6. Rəşad Sadiqov, 90)
69. Aleksey Antonov
87. Ruslan Abışov
Ehtiyat oyunçular:
33. David Pietrzikeviç
5. George Floresku
25. Qismət Alıyev
44. Rafael Santos
Baş məşqçi: Roman Qriqorçuk
“İnter”
1. Səlahət Ağayev (k)
5. Denis Silva
6. Laşa Salukvadze
(4. Laşa Kasradze, 71)
8. Nizami Hacıyev
(30. Abbas Hüseynov, 90)
9. Limam Seydi
(77. Emilian Vila, 82)
14. Zurab Xizanişvili
15. Stepan Polyak
22. İlkin Qırtımov
23. Dieqo Martins
24. Fuad Bayramov
88. Abdulla Abatsiyev
Ehtiyat oyunçular:
96. Elşən Poladov
10. Elnur Abdullayev
17. Mirsahib Abbasov
18. Mansur Nəhavəndi
Baş məşqçi: Zaur Svanadze
