«Qəbələ»dən 5 qələbə
Xəbərlər / 3 Oktyabr 2014 | 16:53226
Aşağı yaş qruplarından olan komandalar üçün AFFA tərəfindən təşkil olunan liqalarda növbəti oyunlar keçirilib. Son bir həftədə bütün liqalarda qarşılaşmalar baş tutub. U-14, U-13, U-12 və U-11 liqalarında 2014/15 mövsümünə start verilib. Bu yaş qruplarında ilk turun görüşləri keçirilib. Ardınca isə U-19, U-17, U-16 və U-15 liqalarında mövsümün II turu baş tutub. Bütün yaş qruplarında təmsil olunan “Qəbələ”nin komandaları da bu oyunlarda qüvvəsini sınayıb. “Qırmızı-qaralar” 8 yaş qrupundan ikisində istirahət edibsə, meydana çıxan 6 komanda 5 qələbə qazanıb və yalnız 1 matçda uduzub. Bu qələbələrin 4-ü böyükhesablı olduğundan top fərqində də üstünlük diqqət çəkir – 26:2.
Paytaxt zonasında çıxış edən U-14 komandası ilk turda “Neftçi” PFK ilə görüşüb. Bu qarşılaşma bakılıların minimal hesablı qələbəsi ilə başa çatıb – 1:0. “Qəbələ” II turda AZAL-la görüşəcək.
U-13 komandası Şimal-Qərb və Qarabağ regionunun Qəbələ zonasında ilk oyununu “Rabitəçi”yə qarşı keçirib. Yevlax təmsilçisini 6:0 hesabı ilə məğlub edən “Qəbələ” II turda “Simurq”u sınağa çəkəcək.
U-12 Liqasında da zona oyunları böyükhesablı qələbə ilə başlayıb. Qax UGİM-ini 6:0 məğlub edən “Qəbələ” növbəti matçında Yevlaxın UGİM-i ilə görüşəcək.
U-11 Liqasında “Qəbələ” ilk turda istirahət edib. Komanda II turda İsmayıllı UGİM-i ilə matçda mübarizəyə başlayacaq.
II turunun oyunları keçirilən U-19 liqasında “qırmızı-qaralar” istirahət edib. III turda “Xəzər Lənkəran”ı qəbul edəcək komanda hazırda 1 oyundan sonra 3 xalla 6-cı pillədədir.
U-17 komandası öz meydanında “Kəpəz”i böyük hesabla məğlub edib – 7:0. İki matçda 11 cavabsız qol vuran “Qəbələ” turnir cədvəlinin 1–ci pilləsində qərarlaşıb. III turda “qırmızı-qaralar” “Vətən”in qonağı olacaq.
“Qəbələ” U-16 Liqasında da ardıcıl 2-ci qələbəsini qazanıb. Səfərdə “Neftçi” İK İB üzərində 4:0 hesablı qələbə qazanan komanda 2 oyunda 6 xal qazanan 4 kollektiv sırasındadır. Top fərqinə görə “Qəbələ” 2-ci sıradadır. Komanda növbəti turda AZAL-ı qəbul edəcək. Onu da qeyd edək ki, AFFA-nın İntizam Komitəsi “Simurq”la I turun oyununun nəticəsini ləğv edib. 2:0 hesabı ilə qalib gələn “Qəbələ”yə texniki qələbə (3:0) verilib. Buna rəqibin heyətində cəzalı futbolçunun çıxış etməsi səbəb olub.
U-15 səfərdə “Neftçi”ni 3:1 hesabı ilə məğlub edib. İkinci qələbə ilə 1-ci pillədə qərarlaşan “qırmızı-qaralar” növbəti turda liderlik duelinə çıxacaq. “Qəbələ” eyni xal topladığı, top fərqində üstələdiyi “Əlincə”ni öz meydanında sınağa çəkəcək.
OXŞAR XƏBƏRLƏR
