“Qəbələ” – “Maribor” (Sloveniya) – 3:1
UEFA Avropa Liqası, pley-off mərhələsi, ilk oyun
18 avqust. Saat 21:00. Bakı. “Dalğa Arena” stadionu
Baş hakim: Aleksey Kulbakov (Belarus)
Baş hakimin köməkçiləri: Vitali Malyutin, Oleq Maslyanko (hər ikisi Belarus)
Dördüncü hakim: Denis Şerbakov (Belarus)
Hakim-inspektor: Sergey Zuyev (Rusiya)
UEFA nümayəndəsi: Bakar Jordaniya (Gürcüstan)
Qollar: Sergey Zenyov, 37, Baqali Dabo, 50, 52 // Markos Tavares, 17
Sarı vərəqələr: Marko Şuler, 29, Blaz Vrhoveç, 58
Artırılan vaxt: I hissədə 1 dəq.; II hissədə 3 dəq.
“Qəbələ” UEFA Avropa Liqasında növbəti oyununu keçirib. “Qırmızı-qaralar” ardıcıl ikinci mövsüm yüksəldiyi pley-off mərhələsinin ilk qarşılaşmasında Sloveniyanın “Maribor” klubunu qəbul edib. Ardıcıl 3 ev qələbəsi qazanan komandamız son avrokubok matçı ilə müqayisədə meydana 1 dəyişikliklə çıxıb. Zədəli Rəşad Sadiqovun yoxluğunda Rafael Santos start heyətində yer alıb. Yarımmüdafiəçinin kapitan sarğısını da braziliyalı taxıb. O, mərkəz müdafiəçisi mövqeyində yer aldığından Vitali Vernidub dayaq yarımmüdafiəçisi kimi meydana çıxıb.
Oyun kəşfiyyatsız başlayıb. İlk dəqiqədən irəli atılan “Qəbələ” üstünlüyü ələ alıb. Qazanılan ilk künc zərbəsi də qapı önündə təhlükə yaranması ilə nəticələnib. Ardınca da hücumlarını davam etdirən “qırmızı-qaralar” həm sağ, həm sol cinahla rəqib qapısına həmlələr təşkil edib. Rəqib qapıçı əvvəl Məhəmməd Mirzəbəyovun cinah ötürməsini zərərsizləşdirib. Ardınca Nika Kvekveskirinin mərkəz, Rikardinyonun soldan qapıya qüvvətli zərbəsi yaddaqalan olub. Birinci halda top qapıdan yan keçibsə, ikinci epizodda qolkiper topu dəf edib. Tədricən meydanda tarazlıq yaradan qonaqların matçın əvvəlindəki əks-hücumlarının da sayı artıb. “Maribor” 15-ci dəqiqədə hesabı açmağa nail olub. Damyan Boharın zərbəsini Dmitri Bezotosnı dəf etsə də, nəzarətsiz qalan Markos Tavares hesabı açıb – 0:1. Qoldan sonra sloveniyalılar topa nəzarət etsə də, “qırmızı-qaralar” oyunun axarını dəyişə bilib. 24-cü dəqiqədə Sergey Zenyov, 3 dəqiqə sonra Nika Kvekveskirinin uzaq zərbələri diqqət çəkib. Az sonra soldan hava ötürməsini başla qapayan Vernidub qapını dəqiq nişan alsa da, qonaqların qapıçısı komandasını qoldan xilas edib. Ukraynalının 25 metrdən endirdiyi uzaq zərbəsi də qonaqlara həyəcan yaşadıb. 37-ci dəqiqədə isə “Qəbələ” bərabərlik qolunu vurub. Cərimə meydanına hava ötürməsini başla saxlayan Zenyov Baqali Daboya ötürmə verib. Hücumçuya qarşı kobudluq olsa da, top Teo Uiksdə qaldığından oyun dayandırılmayıb. Liberiyalının ötürmə verdiyi Zenyov qarşısıalınmaz zərbə vurub – 1:1. Hesab bərabərləşdikdən sonra “Maribor” fəallığı artırıb. Dare Vrşiçin iki zərbəsi təhlükəli alınıb. Fasilə ərəfəsində Boharın sol cinahdan ötürməsini təxminən 10 metrdən Miliboye Novakoviç tamamlasa da, Bezotosnının reaksiyası qola imkan verməyib.
İlk yarıda olduğu kimi ikinci hissəyə də fəal başlayan “Qəbələ” rəqibi təzyiq altına salıb. Elə bunun nəticəsidir ki, fasilədən az keçməmiş Dabo komandamızın heyətində avrokuboklardakı qol hesabını açıb. Rikardinyonun uzun ötürməsini əvvəl Kvekveskiri Zenyova, estoniyalı isə Baqaliyə göndərib. Qapıçı ilə üz-üzə qalan fransalı imkanı qaçırmayıb – 2:1. Sloveniya təmsilçisi özünə gəlməmiş Dabo dublunu rəsmiləşdirib. Baqali Nikanın künc zərbəsindən sonra Stankoviçin başla ötürməsi zamanı yaranan qarışıqlıqda hamıdan cəld tərpənib – 3:1. Bundan sonra topa nəzarət qonaqların tərəfinə keçsə də, “Maribor” qol imkanları yarada bilməyib. Buna “Qəbələ”nin arxa xətt oyunçularının inamlı çıxışı imkan verməyib. Növbəti təhlükəli epizodu da “qırmızı-qaralar” yaradıb. Sergeyin komanda yoldaşına ötürməsi zamanı sloveniyalı müdafiəçilərdən birinə çarpan top “Maribor”un qapısına getsə də, dirəyin yanından keçib. Az sonra Filip Ozobiçin çərçivəyə düşməyən zərbəsi təhlükəli alınıb. 82-ci dəqiqədə Zenyov qapıçının başı üzərindən göndərdiyi topla dubl müəllifliyinə yaxın olub. Lakin qolkiper son anda topu tirin üstündən küncə çıxarıb. Meydana sonradan daxil olan Asif Məmmədov da qol vurmaq imkanı əldə etsə də, onun yaxın məsafədən zərbəsini müdafiəçilər zərərsizləşdirib. Zenyovun Uiksin ötürməsini başla qapadığı epizodda ona qeyri-dəqiqlik çatmayıb. Müdafiəyə çəkilən “Maribor”un son dəqiqələrdə fərqi azaltmaq istəyi boşa çıxıb. Əks-hücum zamanı Novakoviç Bezotosnı ilə üz-üzə qalsa da, ukraynalı qola imkan verməyib.
Beləliklə, “Qəbələ” “Maribor”la ilk oyunda 3:1 hesablı əzmkar qələbə qazanıb. Bununla da “qırmızı-qaralar” avrokuboklarda ardıcıl 4-cü ev qələbəsini qazanıb.
“Qəbələ”
22. Dmitri Bezotosnı
3. Vojislav Stankoviç
7. Nika Kvekveskiri
9. Sergey Zenyov
15. Vitali Vernidub
(4. Elvin Camalov, 90)
17. Məhəmməd Mirzəbəyov
18. Baqali Dabo
19. Filip Ozobiç
(11. Asif Məmmədov, 80)
20. Rikardinyo
27. Teo Uiks
(32. Rəşad Eyubov, 90+2)
44. Rafael Santos (k)
Ehtiyat oyunçular:
33. David Pietrzkieviç
8. Qismət Əliyev
13. Murad Musayev
34. Ürfan Abbasov
Baş məşqçi: Roman Qriqorçuk
“Maribor”
33. Yasmin Handanoviç
3. Erik Yanza
4. Marko Şuler
5. Blaz Vrhoveç
6. Aleks Pihler
9. Markos Tavares (k)
(14. Sanni Omoreqi, 80)
11. Milivoye Novakoviç
22. Dare Vrişiç
(20. Qreqor Bayde, 72)
35. Rodriqo Defendi
39. Damyan Bohar
(8. Sintayehu Solelix, 72)
44. Denis Sme
Ehtiyat oyunçular:
69. Matko Obradoviç
7. Amar Rahmanoviç
28. Mitya Viler
70. Aleş Mertelj
Baş məşqçi: Darko Milaniç
