“Qəbələ” – “Xəzər Lənkəran” – 6:0
4 oktyabr 2015. Saat 21:00. Qəbələ şəhər stadionu, 1500 tamaşaçı
Baş hakim: Rəhim Həsənov
Baş hakimin köməkçiləri: Azər Əsgərov, Yaşar Abbasov
Dördüncü hakim: Ziya Nəsirov
AFFA nümayəndəsi: Abbas Hüseynov
Hakim-inspektor: Asim Xudiyev
Sarı vərəqələr: Ruslan Abışov, 4 (qeyri-idman hərəkəti); Arif Daşdəmirov, 56 (qeyri-idman hərəkəti); Məhəmməd Mirzəbəyov, 87 (qeyri-idman hərəkəti) // Adrian Skarlatake, 61 (qeyri-idman hərəkəti)
Qollar: Dodo, 1; Fakundo Pereyra, 10, 79; Aleksey Qay, 45; Aleksey Antonov, 73; Ermin Zets, 89
Artırılan vaxt: I hissədə - yoxdur.; II hissədə - yoxdur.
Bu gün Topaz Premyer Liqasında VII tura yekun vurulub. Turun son qarşılaşmasında “Qəbələ” “Xəzər Lənkəran”ı qəbul edib. Komandamız matça ötən turun qarşılaşması ilə müqayisədə bir dəyişikliklə başlayıb. Mərkəz müdafiəçisi mövqeyində Vitali Vernidubun əvəzinə bu dəfə Vojislav Stankoviç ilk “11-lik”də yer alıb. “Qırmızı-qaralar” qarşılaşmaya erkən qolla başlayıb. Ölkə çempionatları tarixində ən tez vurulan qollardan birinə imza atan Dodo artıq 8-ci saniyədə hesabı açıb. Fakundo Pereyranın mərkəzlə uzun ötürməsindən sonra braziliyalı yarımmüdafiəçi qapıçı ilə üz-üzə qalaraq qonaqların qapısını dəqiq nişan alıb – 1:0. Bu onun “Qəbələ”də 28-ci, Premyer Liqada 23-cü qolu olub. Qoldan bir neçə dəqiqə sonra Arif Daşdəmirovun sağ cinahdan qapı önünə göndərdiyi topa toxunan olmayıb. 10-cu dəqiqədə komandamız ikinci dəfə qonaqları məyus edib. Bu dəfə Fakundonun özü fərqlənib. Samir Zərgərovun sağ cinahdan ötürməsindən sonra cərimə meydanında topa yiyələnən Aleksey Qay onu 11 metrlik nöqtədə olan Pereyraya ünvanlayıb. Sonuncunun zərbəsi qarşısıalınmaz olub. Argentinalı bununla “Qəbələ”də qol hesabını açıb. Ardınca isə Zenyovun cərimə meydanı kənarından vurduğu topu qapıçı tirin altından çıxarıb. İkinci qoldan sonra meydanda nisbi sakitlik yaranıb. Qarşılıqlı hücumlar real qol vəziyyətləri ilə əlamətdar olmasa da, hissənin sonlarında hesab dəyişib. Sergey Zenyovun sağ cinahla irəliləyib qapı önünə hava ötürməsini uzaq dirəyin yanında olan Aleksey Qay tamamlayıb. Mövsümdə 4-cü qolunu vuran ukraynalı çempionatın bombardirləri siyahısında vahid liderliyə yüksəlib.
“Qəbələ”də 8-ci qolunu vuran Qayın fərqi 3-ə çatdırması ikinci hissənin ssenarisinə də təsir edib. Belə ki, hesabın qənaətbəxş olması komandamızın üzvlərini nisbətən sakitləşdirib. Bu üzdən qarşılıqlı hücumlarla başlayan ikinci hissənin əvvəllərində qapılar önündə təhlükə yaranmayıb. Düzdü, epizodların birində Zərgərov qapıçı ilə üz-üzə qalıb. Yarımmüdafiəçimiz yerə yıxılsa da, qayda pozuntusu qeydə alınmayıb. Topa nəzarəti əlində saxlayan “Qəbələ” qarşılaşmanın sonlarında təzyiqi bir az da artırıb, növbəti qollarını vurub. Əvvəl meydana sonradan daxil olan Aleksey Antonov fərqlənib. Mərkəzlə irəliləyən hücumçu əvvəl dəqiq ötürmə ilə Zenyovu qapıçı ilə üz-üzə qoyub. Qapıçı estoniyalının zərbəsini dəf etsə də, Antonov təkrar zərbə ilə fərqi 4-ə çatdırıb. Ardınca əlverişli mövqedə olan Fakundo qol şansını qaçırıb. Amma az keçməmiş argentinalı dublunu rəsmiləşdirib. Sol cinahdan ötürməni tamamlayan cənubi amerikalı hesabı 5:0-a çatdırıb. 89-cu dəqiqədə isə Ermin Zets 6-cı qolu vurub.
Beləliklə, 6:0 hesabı ilə qalib gələn “Qəbələ” rekordlara imza atıb. Mövsümün ən böyükhesablı qələbəsini qazanan komandamız 10 illik tarixinin rekordlarını təkrarlayıb. Bu nəticə “qırmızı-qaralar”ın Premyer Liqada ən böyükhesablı qələbəsidir. Komandamız 2007/08 mövsümündə, 2007-ci il noyabrın 11-də Sumqayıtda “Gənclərbirliyi”ni də eyni hesabla məğlub etmişdi. Həmin nəticəni təkrarlayan komandamız evdə ən böyükhesablı çempionat qələbəsini əldə edib. Ümumiyyətlə bütün yarışlarda Qəbələdə ən fərqli qələbə isə 2006/07 mövsümündə “Şahdağ”la (Quba) 2006-cı il oktyabrın 16-dakı kubok matçında qeydə alınmışdı – 6:0. “Xəzər Lənkəran”la matçda həmin rekord da təkrarlanıb.
“Qəbələ”
22. Dmitri Bezotosnı
3. Vojislav Stankoviç
4. Elvin Camalov
9. Sergey Zenyov
(7. Ermin Zets, 78)
10. Dodo (k)
(69. Aleksey Antonov, 65)
19. Aleksey Qay
21. Arif Daşdəmirov
32. Fakundo Pereyra
34. Ürfan Abbasov
(8. Məhəmməd Mirzəbəyov, 46)
66. Samir Zərgərov
87. Ruslan Abışov
Ehtiyat oyunçular:
1. Andrey Popoviç
6. Rəşad Sadiqov
15. Vitali Vernidub
25. Qismət Alıyev
Baş məşqçi: Roman Qriqorçuk
“Xəzər Lənkəran”
1. Orxan Sadıqlı
8. Elşən Rzazadə
11. Kazım Kazımlı
(5. Fərid Əsədov, 83)
12. İlyas Səfərzadə
(7. Sadio Tounkara, 61)
14. Rahid Əmirquliyev (k)
18. Tural Cəlilov
27. Adrian Skarlatake
42. Kamran Abdullazadə
(32. Zaman Mirzəzadə, 80)
72. Elvin Mirzəyev
97. Elnur Cəfərov
99. Mahsum Qəmbərli
Ehtiyat oyunçular:
25. Tərlan Qasımzadə
16. İbrahim Qədirzadə
44. Yusif Həsənov
9. Orxan Əliyev
Baş məşqçi: Yunis Hüseynov
