“Keşlə” – “Qəbələ” – 1:2
24 noyabr 2018. Saat 16:30. “ASK Arena”, 500 tamaşaçı
Baş hakim: Rəvan Həmzəzadə
Baş hakimin köməkçiləri: Elşad Abdullayev, Cavanşir Yusifov
Dördüncü hakim: Kamal Umudlu
Hakim-inspektor: Vüsal Əliyev
AFFA nümayəndəsi: Seymur Səlimli
Sarı vərəqələr: Sərtan Taşqın, 90 (qeyri-idman hərəkəti); Diallo Quydileye, 90+4 (qeyri-idman hərəkəti) // Təmkin Xəlilzadə, 11 (qeyri-idman hərəkəti); Sabien Lilay, 33 (qeyri-idman hərəkəti); Urfan Abbasov, 36 (qeyri-idman hərəkəti); Stiven Monroz, 48 (hakim qərarına etiraz); Ceyms Adeniyi, 67 (qeyri-idman hərəkəti)
Qollar: Amil Yunanov, 38 // Ceyms Adeniye, 17; Voislav Stankoviç, 20
Artırılan vaxt: I hissədə 4 dəq; II hissədə 5 dəq.
Topaz Premyer Liqasında milli komandaların oyunları ilə əlaqədar yaranan fasilə başa çatıb. XII tura “ASK Arena”da start verilib. “Qəbələ” səfərdə “Keşlə” ilə qarşılaşıb. “Qırmızı-qaralar”ın baş məşqçisi Sənan Qurbanov ötən turun “Qarabağ”la görüşü (1:3) ilə müqayisədə heyətdə iki dəyişikliklər edib. Dmitri Bezotosnı və Sabien Lilay “11-liy”ə qayıdıbsa, Aqil Məmmədovla İlqar Qurbanov start heyətdən kənarda qalıb.
Oyun qarşılıqlı hücumlarla başlayıb. Lakin komandalar uzun müddət qapılar önündə ciddi təhlükə yaratmayıb. Matçın 17-ci dəqiqəsində isə hesab açılıb. Sağ cinahdan cərimə meydanına daxil olan Lalavele Atakora rəqibin müdafiə xəttində çaşqınlıq yaradıb. Bu epizodda topu ələ keçirən Ceyms Adeniyi yaxın məsafədən vurduğu zərbə ilə hesabı açıb. Bu, hücumçunun mövsümdə 6-cı qolu olub və nigeriyalı çempionatın bombardirləri siyahısında liderliyə şərik çıxıb. Hesab açıldıqdan 3 dəqiqə sonra “Qəbələ” fərqi artırıb. Təmkin Xəlilzadənin sağ cinahdan yerinə yetirdiyi cərimə zərbəsindən sonra Vojislav Stankoviç başla dəqiq zərbə endirib – 2:0. Bu topdan sonra meydan sahibləri fəallığı artırsa da, Dmitri Bezotosnının qapısı önündə real qol vəziyyəti yarada bilməyib. 33-cü dəqiqədə isə Stiven Monroz fərqlənməyə yaxın olsa da, top qapıdan az aralı keçib. Bakılılar isə hissənin sonlarında fərqi minimuma endirməyə nail olub. “Keşlə”nin heyətində Amil Yunanov fərqlənib. Komandamız fasilə ərəfəsində 3-cü qolu vurmaq üçün bir neçə imkan qazanıb. Müdafiəçi, rəqib qapıçı ilə təkbətək çıxmağa yaxın olan Stiven Monrozun ayaqları altından topu uzaqlaşdırıb. Təmkin Xəlilzadənin sol cinahdan ötürməsindən sonra Lalavele Atakoranın yaxın məsafədən zərbəsi dirəkdən dönüb. Monroz uzatma dəqiqələrində də diqqət mərkəzinə düşüb. Lakin yenə zərbədə dəqiqlik çatmayıb.
İkinci hissəyə daha fəal başlayan “Qəbələ” əlverişli mövqedən cərimə zərbəsi qazanıb. Lakin Təmkin Xəlilzadənin zərbəsi istənilən kimi alınmayıb. Azarkeşlər hissənin sonrakı dəqiqələrində qarşılıqlı hücumlar izləyib. 63-cü dəqiqədə sağ cinahdan ötürmədən sonra Ceyms Adeniyinin baş zərbəsi yaddaqalan olub. Top dirəkdən az aralı keçib. Hissənin ikinci yarısında paytaxt təmsilçisi daha çox hücum edib. Bu da “qırmızı-qaralar”a sürətli əks-hücumlar yaratmaq imkanı yaradıb. Həmlələri daha kəsərli alınan komandamız bir neçə dəfə rəqib qapısına yol tapmağa yaxın olub. Öncə rəqib qapıçı topu Ceyms Adeniyinin ayaqları altından götürüb. Hücum zamanı say üstünlüyü qazanan “qırmızı-qaralar”ın digər həmləsində isə qapıçını da keçən Stiven Monrozun zərbəsi müdafiəçidən, Cavid Hüseynovun təkrar zərbəsi isə dirəkdən dönüb. Az sonra Ceyms Adeniyinin yaxın məsafədən zərbəsi zamanı top qapının üstündən keçib.
Beləliklə, mövsümdə ilk səfər qələbəsini qazanan “Qəbələ” paytaxtdan 3 xalla dönür.
“Keşlə”
30. Davud Kərimi
33. Tərlan Quliyev (k)
3. Denis Silva
93. Edvinas Girdvainis
(11. Bahodir Nasimov, 80)
2. Sərtan Taşqın
4. Slavik Alxasov
22. Nikola Mitroviç
90. Ebrima Sohna
(7. Vaqif Cavadov, 72)
17. Samir Məsimov
(80. Diallo Quydileye, 56)
9. Amil Yunanov
14. Andre Klennon
Ehtiyat oyunçular:
16. Şahin Zəkiyev
65. Cabir Əmirli
71. Emin Quliyev
18. Ruslan Əmircanov
10. Ruslan Nəsirli
88. Məmməd Quliyev
21. Herve Tçami
31. Georgios Georgiadis
94. Seymur Əsədov
Baş məşqçi: Tərlan Əhmədov
“Qəbələ”
22. Dmitri Bezotosnı
3. Voislav Stankoviç
4. Elvin Camalov
(8. Qismət Alıyev, 85)
14. Cavid Hüseynov (k)
(11. Asif Məmmədov, 88)
17. Ceyms Adeniyi
21. Atakora Lalavele
27. Bəhlul Mustafazadə
28. Stiven Monroz
33. Təmkin Xəlilzadə
34. Urfan Abbasov
88. Sabien Lilay
Ehtiyat oyunçular:
30. Aqil Məmmədov
35. Murad Popov
7. Roman Hüseynov
5. Rasim Ramaldanov
10. Rauf Əliyev
18. İlqar Qurbanov
32. Amin Seydiyev
Baş məşqçi: Sənan Qurbanov
