QƏBƏLƏ FC

“Qəbələ” UEFA Avropa Liqasının hazırlığını davam etdirir. Türkiyənin Bolu şəhərində təşkil olunan təlim-məşq toplanışını başa vurduqdan sonra Bakıya qayıdan “qırmızı-qaralar” iki gündür paytaxtda hazırlıq keçir. Avrokubok mübarizəsinə II təsnifat mərhələsində başlayacaq komandamız məşqlərini Bakı Olimpiya Stadionunda  gerçəkləşdirib. İyulun 25-də Gürcüstanın “Dinamo” (Tbilisi) klubu ilə ilk oyuna çıxacaq Sənan Qurbanovun yetirmələri dünən günün ikinci yarısında hazırlıq keçib. Futbolçular toplu və topsuz çalışmaları yerinə yetiriblər.

Xatırladaq ki, UEFA Avropa Liqasının II təsnifat mərhələsinin “Qəbələ” – “Dinamo” oyunu Qəbələ şəhər stadionunda keçiriləcək. İyulun 25-də baş tutacaq görüş saat 19:00-da başlayacaq.