“Qarabağ” – “Qəbələ” – 1:1
19 dekabr 2015. Saat 18:00. Tofiq İsmayılov adına Suraxanı qəsəbə stadionu, 2100 tamaşaçı
Baş hakim: Əliyar Ağayev
Baş hakimin köməkçiləri: Zeynal Zeynalov, Rza Məmmədov
Dördüncü hakim: Munis Abdullayev
Əlavə köməkçi hakimlər: Rəhim Həsənov, İnqilab Məmmədov
AFFA nümayəndəsi: Rauf Əmirov
Hakim-inspektor: Xaqani Məmmədov
Sarı vərəqələr: Riçard Almeyda, 71 (qeyri-idman hərəkəti)
Qollar: Əfran İsmayılov, 79 // Ermin Zets, 4
Qolla nəticələnməyən penalti: Dodo, 69
Artırılan vaxt: I hissədə 1 dəq.; II hissədə 3 dəq.
Bu gün Topaz Premyer Liqasında XVIII tura start verilib. “Qəbələ” mövsümün ilk yarısının son turunda çempionatın lideri “Qarabağ”la qarşılaşıb. “Qırmızı-qaralar” 2015-ci ilin son qarşılaşmasını səfərdə keçirib. Komandamız matça ötən turla müqayisədə iki dəyişikliklə başlayıb. Sergey Zenyov və Ürfan Abbasov start heyətindən kənarda qalıb. Onların əvəzinə Arif Daşdəmirov və Ermin Zets ilk dəqiqələrdən meydana çıxıb.
Komandalar matça kəşfiyyatsız başlayaraq, ilk dəqiqələrdən hücuma keçib. Qarşılıqlı hücumlar oyunun əvvəlində təhlükəli vəziyyətlərin yaranması ilə nəticələnib. Cavid Tağıyev ilk dəqiqədə müdafiəçiləri arxada qoyub, əlverişli mövqe yaxalasa da, zərbəsi qapıdan yan keçib. “Qəbələ” isə ilk real qol imkanını qaçırmayıb. Sol cinahla irəliləyən Rikardinyonun ötürməsini qapıçı meydanında, uzaq dirəyin önündə qərarlaşan Ermin Zets qapayıb – 1:0. Buraxılan qoldan sonra fəallaşan “Qarabağ” topa nəzarət edib, üstünlüyə yiyələnib. Rəqibin hücumlarının qarşısını alan “qırmızı-qaralar” əks-həmlələrdə fərqi artırmağa çalışıb. 29-cu dəqiqədə hesabı bərabərləşdirməyə yaxın olan Samuel Armenterosun zərbəsi Ruslan Abışova toxunaraq, qapının yanından keçib. Miçelin qüvvətli zərbəsini isə Andrey Popoviç tutub. Fasilə öncəsi komandamız fərqi artırmağa yaxın olub. Zetsin zərbəsi Miçeldən dönüb.
Fasilədən sonra da oyunun ssenarisi dəyişməyib. Son iki mövsümün çempionu məğlubiyyətdən qaçmaq üçün böyük qüvvə ilə irəli atılıb. Qapıçımız əvvəl Dani Kintana, ardınca Armenterosun zərbəsini zərərsizləşdirib. Ardıcıl hücumlar təşkil edən meydan sahiblərini əks-hücumda tutan komandamız hissənin ortalarında penalti imkanı qazanıb. Riçard Almeydanın Aleksey Qaya qarşı kobudluğuna görə təyin olunan 11 metrlik cərimə zərbəsini Dodo yerinə yetirib. Lakin “Qəbələ”nin kapitanı fərqi artırmaq imkanını qaçırıb. Onun zərbəsini İbrahim Şehiç qaytarıb. Qarşılıqlı hücumlarla davam edən oyunun 80-ci dəqiqəsində isə meydan sahibləri fərqlənib. Daninin cinah ötürməsini Əfran İsmayılov tamamlayıb – 1:1. Bundan sonra hər iki komanda qələbə qolu vurmağa çalışsa da, hesab dəyişməyib. Son dəqiqələrdə meydan sahiblərinin qolunun qarşısını qapı tiri alıb.
Beləliklə, mövsümə “Qarabağ”la heç-heçə (2:2) ilə başlayan “Qəbələ” qış fasiləsinə eyni komandayla sülhlə yollanıb – 1:1.
“Qarabağ”
13. İbrahim Şehiç
5. Maksim Medvedev
8. Migel Madera
(70. Marinaldo Çiçero, 72)
10. Dani
14. Rəşad Sadıqov (k)
18. İlqar Qurbanov
20. Riçard Almeyda
55. Bədavi Hüseynov
77. Cavid Tağıyev
(22. Əfran İsmayılov, 72)
90. Samuel Armenteros
(2. Qara Qarayev, 87)
91. Coşqun Diniyev
Ehtiyat oyunçular:
1. Fərhad Vəliyev
6. Vüqar Mustafayev
32. Elvin Yunuszadə
97. Mahir Mədətov
Baş məşqçi: Qurban Qurbanov
“Qəbələ”
1. Andrey Popoviç
4. Elvin Camalov
6. Rəşad Sadiqov
7. Ermin Zets
(9. Sergey Zenyov, 77)
10. Dodo (k)
(32. Fakundo Pereyra, 84)
19. Aleksey Qay
20. Rikardinyo
21. Arif Daşdəmirov
44. Rafael Santos
69. Aleksey Antonov
87. Ruslan Abışov
Ehtiyat oyunçular:
33. David Pietrzkeviç
3. Voislav Stankoviç
8. Məhəmməd Mirzəbəyov
25. Qismət Alıyev
70. Vaqif Cavadov
Baş məşqçi: Roman Qriqorçuk
