“Qəbələ” – “Qarabağ” – 2:2
10 avqust 2015. Saat 21:00. Qəbələ şəhər stadionu, 3200 tamaşaçı
Baş hakim: Əliyar Ağayev
Baş hakimin köməkçiləri: Zeynal Zeynalov, Rza Məmmədov
Dördüncü hakim: Yaşar Abbasov
Əlavə köməkçi hakimlər: Ömər Paşayev, Elvin Əsgərov
AFFA nümayəndəsi: Məmmədəli Məmmədov
Hakim-inspektor: Şahin Cəfərov
Sarı vərəqələr: Samir Zərgərov, 61 (qeyri-idman hərəkəti) // İlqar Qurbanov, 75 (qeyri-idman hərəkəti)
Qırmızı vərəqə: Rəşad Sadiqov, 73 (aqressiv hərəkət)
Qollar: Sergey Zenyov, 32; Samir Zərgərov, 87 // Riçard Almeyda, 62 (p.); 83
Artırılan vaxt: I hissədə - yoxdur.; II hissədə 3 dəq.
Bu gün Topaz Premyer Liqasında ilk tura yekun vurulub. “Qəbələ” güclülər dəstəsində onun üçün yubiley – 10-cu mövsümə öz meydanında “Qarabağ”la oyunla başlayıb. Ukraynalı baş məşqçimiz Roman Qriqorçuk Avropa Liqasında son oyunla müqayisədə start heyətində bəzi dəyişiklər etmişdi. Bu, ilk növbədə avrokuboklarda ehtiyatda qalan Elvin Camalovun ilk dəfə əsas heyətdə yer alması idi. Cavid Hüseynovun yoxluğunda kapitan sarğısını Dodo daşıyırdı. Yeri gəlmişkən, braziliyalı yarımmüdafiəçimiz “Qəbələ”nin heyətində Premyer Liqada 113-cü oyuna çıxmaqla yeni rekordçu oldu. Aleksey Antonovu ehtiyatda saxlayan Qriqorçuk hücumun mərkəzində Sergey Zenyovu oynadırdı. Digər yeni transferimiz Asif Məmmədov da Premyer Liqamızda “Qəbələ”nin heyətində debüt edirdi. Oyuna fəal başlayan komandamız getdikcə hücumlarının kəsərini artırırdı. Düzdür, matçın əvvəlində qapımız qarşısında yaranan qarışıqlıqdan sonra qonaqlar hesabı aça bilərdi. “Qəbələ”nin buna az sonra cavabı daha təhlükəli alındı. Ancaq 12-ci dəqiqədə Zenyovun qapıçı ilə təkbətək çıxardığı Asifin qapıya dəqiq zərbə vurmasına rəqib müdafiəçi Bədavi Hüseynov mane oldu. Daha sonra “Qəbələ”nin mərkəz müdafiəçisi Rafael Santos inamlı oynayaraq, “Qarabağ”ın hücumçusu Puponun yaxın məsafədən dəqiq zərbə vurmasına imkan vermədi. Yerinə yetirilən künc zərbəsi zamanı isə Reynaldonun baş zərbəsi qapının üstündən keçdi. Matçda hesabı açan tərəf “Qəbələ” oldu. Zenyov hələ qoladək toru silkələsə də, həmin epizodda əllə oyun qeydə alındı. 32-ci dəqiqədə Daşdəmirovun yerinə yetirdiyi cərimə zərbəsindən sonra isə Sergey komandamızın heyətində Premyer Liqada da qol hesabını aça bildi. Komandamız ikinci hissəyə əvəzetmə ilə başladı. Asifin yerinə meydana daxil olan Samir Zərgərov onun mövqeyində - yarımmüdafiənin sol cinahında yer aldı. “Qəbələ” ikinci hissənin əvvəlində qısa zaman kəsiyində Zenyovla hesabı artırmaq üçün fürsət qazandı. Ancaq estoniyalı hücumçu Dodoyla Sadiqovun ötürmələrini dəyərləndirə bilmədi. 62-ci dəqiqədə Zərgərovun cərimə meydanımızda Ansi Aqolliyə qarşı mübarizədə qayda pozuntusu qapımıza penalti zərbəsi təyin olunmasıyla nəticələndi. “Qarabağ”ın braziliyalı yarımmüdafiəçisi Riçard Almeyda zərbəni dəqiq vurdu. Bundan 12 dəqiqə sonra komandamız daha bir zərbə aldı. Dodonun əvəzlənməsindən sonra kapitanlıq sarğısını daşıyan Sadiqovun Qara Qarayevlə mübarizədə qayda pozuntusunu baş hakim Əliyar Ağayev gözlənilmədən birbaşa qırmızı vərəqəylə dəyərləndirdi. Komandamız azlıqda qaldığı vaxtda Rafaelin baş zərbəsi zamanı hesabda irəli çıxa bilərdi. Ancaq Arifin ötürməsindən sonra Santosun baş zərbəsi qapının üstündən keçdi. “Qarabağ” 83-cü dəqiqədə hesabda irəli çıxa bildi. Almeyda dəqiq zərbəylə dublunu rəsmiləşdirdi. Ancaq komandamız əzmkarlıq nümayiş etdirərək, hesabı bərabərləşdirə bildi. 86-cı dəqiqədə hücuma qoşulan Ürfanın sol cinahdan ötürməsindən sonra “Qarabağ”ın kapitanı Rəşad Sadıqovun səhvi topun Samirə düşməsiylə nəticələndi. Zərgərov dəqiq zərbəylə penalti epizodundakı səhvini düzəltdi və komandamızın mövsümə xalla başlamasına imkan yaratdı. Ukraynalı qapıçımız Dmitri Bezotosnının son dəqiqələrdə İlqar Qurbanovla Reynaldonun zərbələri zamanı inamlı oyun nümayiş etdirməsi də yaddaqalan oldu. Bununla da “Qəbələ” yeni mövsümə son 2 mövsümün çempionuyla matçda əzmkar heç-heçəylə başladı.
“Qəbələ”
22. Dmitri Bezotosnı
3. Vojislav Stankoviç
4. Elvin Camalov
6. Rəşad Sadiqov
9. Sergey Zenyov
10. Dodo (k)
(69. Aleksey Antonov, 71)
11. Asif Məmmədov
(66. Samir Zərgərov, 46)
19. Aleksey Qay
21. Arif Daşdəmirov
34. Ürfan Abbasov
44. Rafael Santos
Ehtiyat oyunçular:
33. David Pietrzikeviç
7. Ermin Zec
8. Məhəmməd Mirzəbəyov
15. Vitali Vernudub
17. Qismət Alıyev
Baş məşqçi: Roman Qriqorçuk
“Qarabağ”
13. İbrahim Şehiç
2. Qara Qarayev
9. Reynaldo
14. Rəşad Sadıqov (k)
18. İlqar Qurbanov
20. Riçard Almeyda
25. Ansi Aqolli
29. Raydell Pupon
55. Bədavi Hüseynov
67. Əl Hərbi
(22. Əfran İsmayılov, 46)
91. Coşqun Diniyev
Ehtiyat oyunçular:
1. Fərhad Vəliyev
6. Vüqar Mustafayev
10. Dani
11. Elvin Məmmədov
32. Elvin Yunuszadə
97. Mahir Mədətov
Baş məşqçi: Qurban Qurbanov
