“Samtredia” (Gürcüstan) – “Qəbələ” (Azərbaycan) – 2:1
UEFA Avropa Liqası, I təsnifat mərhələsi, cavab oyunu
7 iyul. Saat 19:00. Zestafoni. David Abaşidze stadionu
Baş hakim: Georgios Kizas (Yunanıstan)
Baş hakimin köməkçiləri: Çasan Koula, İoannis Sipkas ( hər ikisi Yunanıstan)
Dördüncü hakim: Aleksandros Aretopulos (Yunanıstan)
Hakim-inspektor: İqor İşenko (Ukrayna)
UEFA nümayəndəsi: Mətin Kazancıoğlu (Türkiyə)
Qollar: Budu Zivzivadze, 14 (pen.), Laşa Şerqelaşvili, 90+2 // Teo Uiks, 42
Sarı vərəqələr: Giorgi Mçedlişvili, 30, Giuli Manjqaladze, 90+3 // Vitali Vernidub, 25, Tellur Mütəllimov, 80
Artırılan vaxt: I hissədə 1 dəq.; II hissədə 3 dəq.
İlk oyun – 1:5
UEFA Avropa Liqasında I təsnifat mərhələsinin cavab oyunları keçirilib. Cari mövsümdə 2-ci matçına çıxan “Qəbələ” Gürcüstanın “Samtredia” klubu ilə cavab oyununda qüvvəsini sınayıb. Bir həftə əvvəl Bakıda rəqibini 5:1 hesabı ilə məğlub edən “qırmızı-qaralar” Zestafonidəki qarşılaşmaya da eyni heyətlə başlayıb. “11-lik”də dəyişikliyə ehtiyac duymayan baş məşqçi Roman Qriqorçuk oyunun protokolunda cüzi yenilik edib. İlk qarşılaşmada “18-lik”dən kənar qalan Elvin Camalovla Hacıağa Hacıyev matça ehtiyat oyunçular sırasında başlayıblar. Onlar Qismət Alıyevlə Ramil Hasanovu “18-lik”də əvəzləyib. “Samtredia” isə Bakıda keçirilən oyunla müqayisədə start heyətində 3 dəyişiklik edib. Giuli Manjqaladze, David Rajamaşvili və Davit Jikia bu dəfə ehtiyatda qalıblar. Əvəzində Daçi Tsobiladze, Tornike Qorqiaşvili və Giorgi Qamkrellidze start heyətində meydana çıxıblar. Bu görüş Qriqorçukun “Qəbələ”nin baş məşqçisi postunda 75-ci oyun olub.
Görüş qarşılıqlı hücumlarla başlayıb. Artıq ilk dəqiqədə oyuna qoşulan Dmitri Bezotosnı Daçi Tsobiladzenin zərbəsini dəf edib. Ardınca Nika Kvekveskiri uzaqdan qapını nişan alsa da, top müdafiəçilərə tuş gəlib. 13-cü dəqiqədə meydan sahiblərinin ən təhlükəli futbolçusu Budu Zivzivadze komandasına penalti qazandırıb. Vitali Vernidubun ona qarşı hərəkəti qayda pozuntusu kimi dəyərləndirilib. Budu bu imkandan dəqiq yararlanıb – 1:0. Bu qoldan ruhlanan Gürcüstan klubu ardıcıl bir neçə hücum da təşkil edib. Əvvəl Baçana Arabuli, ardınca Zivzivadze təhlükəli zərbə ilə diqqət mərkəzinə düşüb. Sonuncunun fərqlənməsinə Bezotosnının inamlı oyunu imkan verməyib. “Qırmızı-qaralar” buna Kvekveskirinin cərimə zərbəsindən topu qapı istiqamətinə göndərməsi ilə cavab verib. İlk yarının sonlarında daha böyük qüvvə ilə irəli atılan “Samtredia” Bezotosnını ustalığını göstərməyə məcbur edib. Ukraynalı qolkiper əvvəl Giorgi Datunaşvili, ardınca Laşa Şerqelaşvilinin zərbəsini zərərsizləşdirib. O, 39-cu dəqiqədə Giorgi Qamkrellidzenin cərimə zərbəsindən çərçivəyə göndərdiyi topu da dəf edib. “Qəbələ”nin sürətli hücumu isə qolla nəticələnib. Sergey Zenyovun ötürməsindən sonra ilk matçın qəhrəmanı Teo Uiks qarşısıalınmaz zərbə vurub – 1:1. Bu, liberiyalının mövsümdə 4-cü qolu olub. Hesabda tarazlıq yaranandan sonra Qamkrelidze və Giorgi Mçedlişvilinin zərbələri yaddaqalan olsa da, çərçivəni dəqiq nişan ala bilməyiblər.
İkinci hissəyə hər iki komanda dəyişikliklə başlayıb. Fasilədən az sonra Qamkrelidzenin zərbəsini Bezotosnı zərərsizləşdirib. Bundan sonra təşəbbüsü ələ alan “Qəbələ” avrokuboklarda ilk səfər qələbəsini qazanmaq üçün ardıcıl həmlələr təşkil edib. 62-ci dəqiqədə Zenyovun zərbəsi tirdən dönüb. Uiksin təkrar zərbəsindən sonra isə samtredialıları qoldan qapıçı xilas edib. Bundan sonra Tellur Mütəllimov qol hesabını açmağa yaxın olsa da, onun zərbəsində dəqiqlik çatmayıb. Qarşılaşmanın sonlarında Bezotosnı daha iki dəfə oyuna daxil olub. O, öncə Manjqaladze, ardınca Arabulinin zərbəsini zərərsizləşdirib. Matçın sonluğu qayda pozuntuları ilə zəngin olub. 90-cı dəqiqədə Zenyov fərqlənməyə yaxın olub. Lakin qonaqların qələbə qoluna “Samtredia”nın qapıçısı mane olub. Uzatma dəqiqələrində isə meydan sahibləri qələbə topuna sevinib. Mçedlişvilinin ötürməsindən sonra Şerqelaşvili fərqlənib – 2:1.
Beləliklə, öz meydanında 5:1 hesabı ilə qələbə qazanan “Qəbələ” II təsnifat mərhələsinə yüksəlib. Komandamızın buradakı rəqibi az sonra başa çatacaq “Aktobe” (Qazaxıstan) – MTK (Macarıstan) görüşündə müəyyənləşəcək.
“Samtredia”
12. Omar Miqineyşvili
3. Jemal Qoqiaşvili
4. Nika Sandoxadze
10. Baçana Arabuli
11. Budu Zivzivadze
15. Daçi Tsobiladze
(7. David Rajamaşvili, 75)
16. Laşa Şerqelaşvili
22. Giorgi Mçedlişvili
26. Giorgi Datunaşvili (k)
39. Tornike Qorqiaşvili
(6. Giuli Manjqaladze, 46)
77. Giorgi Qamkrellidze
(14. Davit Jikia, 63)
Ehtiyat oyunçular
30. Kaxaber Meşveliani
2. David Mtivlişvili
8. Teymuraz Markozaşvili
17. Şota Kerdzevadze
Baş məşqçi: Giorgi Tsetzadze
“Qəbələ”
22. Dmitri Bezotosnı
3. Vojislav Stankoviç
6. Rəşad Sadiqov (k)
(4. Elvin Camalov, 69)
7. Nika Kvekveskiri
9. Sergey Zenyov
15. Vitali Vernidub
(44. Rafael Santos, 46)
18. Baqali Dabo
19. Filip Ozobiç
(88. Tellur Mütəllimov, 52)
20. Rikardinyo
27. Teo Uiks
34. Ürfan Abbasov
Ehtiyat oyunçular
33. David Pietrzkieviç
17. Məhəmməd Mirzəbəyov
29. Hacıağa Hacıyev
32. Rəşad Eyyubov
Baş məşqçi: Roman Qriqorçuk
