“İnter” – “Qəbələ” - 0:1
07 fevral 2016. Saat 17:40. “İnter Arena”, 500 tamaşaçı
Baş hakim: Rəhim Həsənov
Baş hakimin köməkçiləri: Akif Əmirəli, Cavanşir Yusifov
Dördüncü hakim: Nail Nağıyev
AFFA nümayəndəsi: Mübariz Hüseynov
Hakim-inspektor: Məlik Həsənov
Sarı vərəqələr: Sezar Meza Kolli, 55 (qeyri-idman hərəkəti); Vüqar Nadirov, 89 (qeyri-idman hərəkəti) // Rəşad Sadiqov, 9 (qeyri-idman hərəkəti); Rafael Santos, 44 (qeyri-idman hərəkəti)
Qol: Ermin Zets, 18
Artırılan vaxt: I hissədə 1 dəq.; II hissədə 3 dəq.
Bu gün Topaz Premyer Liqasında XX tura yekun vurulub. Turun son qarşılaşmasında “Qəbələ” “İnter”lə qarşılaşıb. “Qırmızı-qaralar” səfər matçına 3 xal iddiası ilə çıxıb. Ötən mövsümün mükafatçılarının qarşılaşmasına komandamız 3 dəyişikliklə başlayıb. XIX turun “Kəpəz”lə səfər görüşündə start heyətində yer alan Andrey Popoviç, Sergey Zenyov və Vadim Abdullayev bu dəfə “11-lik”dən kənar qalıb. Əvəzində Dmitri Bezotosnı, Elvin Camalov və Rəşad Eyyubov ilk dəqiqələrdən meydana çıxıb.
Oyunun ilk yarısı qarşılıqlı hücumlarla başlasa da, “Qəbələ” üstünlüyə yiyələnməyi bacarıb. Komandamız daha fəal oynasa da, ilk real qol vəziyyətini meydan sahibləri yaradıb. Matçın əvvəlində Sezar Meza Kollinin ötürməsindən sonra Nizami Hacıyev iti bucaq altında qapını nişan alıb. Lakin top dirəyin yanından ötüb. Güclü külək komandaların oyununa ciddi təsir edib. 14-cü dəqiqədə “İnter” müdafiəçiləri bu üzdən topu itirsə də, nə Ermin Zets, nə də Dodo zərbə vura bilib. Komandamızın növbəti təhlükəli hücumu qolla nəticələnib. Sol cinahdan irəliləyib, qapıya paralel ötürmə verən Dodonun göndərdiyi topa ilk yetişən Eyyubov olub. Onun zərbəsi tirdən dönüb. Zetsin təkrar zərbəsi isə qarşısıalınmaz alınıb – 1:0. Bakılıların daha çox əks-hücumlara güvəndiyi hissənin sonunadək üstünlüyə yiyələnən “qırmızı-qaralar” hesabı artırmaq imkanlarından yararlana bilməyib. Eyyubovun güclü cərimə zərbəsini Giorgi Lomaya dəf edib. 38-ci dəqiqədə Zets ardıcıl 2 dəfə qapını nişan alıb. Amma hər iki epizodda bakılıların qapıçısı inamlı oynayıb. Məhəmməd Mirzəbəyovun qüvvətli zərbəsində isə dəqiqlik çatmayıb. Fasilə ərəfəsində isə Bezotosnı “Qəbələ”ni qoldan xilas edib. Meydan sahiblərinin yaxın məsafədən baş zərbəsinə reaksiya verən qolkiper qola imkan verməyib.
İkinci hissənin ilk dəqiqəsində də ukraynalı qapıçı diqqət mərkəzinə düşüb. Əvvəl səhvə yol verən Dmitri Sezarın yaxın məsafədən zərbəsini zərərsizləşdirib. Fasilədən sonra topa nəzarət “İnter”in tərəfinə keçsə də, “Qəbələ”nin hücumları daha kəsərli alınıb. Künc zərbələrindən biri zamanı komandamız qola yaxın olub. Aleksey Qayın baş zərbəsi futbolçulardan birinə çarpdıqdan sonra tirə dəyib. Meydan sahiblərinin cavabı uzaq zərbə ilə gəlib ki, Bezotosnı yenə inamlı oynayıb. Hissənin ortalarında oyunu tarazlaşdıran qonaqlar paytaxt təmsilçisinin hücumuna hücumla cavab verib. Lakin qarşılıqlı hücumlar qol vəziyyətinin yaranması ilə nəticələnməyib. Yalnız 85-ci dəqiqədə Abbas Hüseynovun ötürməsindən sonra 13 metrdən qapını nişan ala bilməyən Sezar diqqət mərkəzinə düşüb.
Beləliklə, mövsümdə 8-ci qələbəsini qazanaraq, xal hesabını 31-ə çatdıran “Qəbələ” turnir cədvəlinin 4-cü pilləsinə yüksəlib.
“İnter”
79. Giorgi Lomaya (k)
3. Denis Silva
6. Laşa Salukvadze
7. Nika Kvekveskiri
8. Nizami Hacıyev
14. Zurab Xizanişvili
(4. Laşa Kasradze, 14)
17. Vüqar Nadirov
22. İlkin Qırtımov
(10. Elnur Abdullayev)
23. Sezar Meza Kolli
24. Fuad Bayramov
(9. Qara Qarayev, 82)
30. Abbas Hüseynov
Ehtiyat oyunçular:
96. Elşən Poladov
2. Sərtan Taşkın
12. Ruslan Əmircanov
20. Yuri Fomenko
Baş məşqçi: Zaur Svanadze
“Qəbələ”
22. Dmitri Bezotosnı
3. Vojislav Stankoviç
4. Elvin Camalov
6. Rəşad Sadiqov
7. Ermin Zets
8. Məhəmməd Mirzəbəyov
10. Dodo (k)
19. Aleksey Qay
21. Arif Daşdəmirov
32. Rəşad Eyubov
44. Rafael Santos
Ehtiyat oyunçular:
33. David Pietrzkeviç
11. Asif Məmmədov
15. Vitali Vernidub
20. Rikardinyo
25. Qismət Alıyev
34. Ürfan Abbasov
66. Samir Zərgərov
Baş məşqçi: Roman Qriqorçuk
