QƏBƏLƏ FC

Bu gün Topaz Premyer Liqasında II dövrəyə start verildi. “Qəbələ” milli komandaların oyunları ilə əlaqədar yaranan 2 həftəlik fasilədən sonra ilk oyununu Bakıda “İnter”ə qarşı keçirdi. Qəbələdə rəqibini 3:2 hesabı ilə məğlub edən Yuri Syominin yetirmələri bu dəfə “Şəfa”da qonaq oldu. Qarşılıqlı hücumlarla başlayan oyunun ilk 10 dəqiqəsində Nizami Hacıyev və Leonardo Da Silvanin cinah ötürmələrindən sonra qonaqlar təhlükə yaratmağa yaxın oldu. Lakin hər iki epizodda hamını qabaqlayan Səlahət Ağayev qol vəziyyətinin yaranmasına imkan vermədi. 15-ci dəqiqədə isə matçda ilk təhlükəli epizod yarandı. Təxminən 11 metrlik nöqtənin yaxnlığından güclü zərbə endirən Vaqif Cavadovun hesabı açmasına topun müdafiəçilərdən birinin ayağına toxunması mane oldu. Güclü zərbə isə küncə çıxdı. Qarşılıqlı hücumlar şəraitində davam edən ilk yarıda komandamız ilk təhlükəli vəziyyəti 33-cü dəqiqədə yaratdı. Cərimə meydanının xətti üzərində topa yiyələnən Viktor Mendi sağ cinahda boş mövqedə olan Leonardonu tapdı. Komanda yoldaşından ötürmə alan braziliyalının qapıya zərbəsi isə dirəyə tuş gəldi. 38-ci dəqiqədə isə Dieqo Kosta məharətini göstərməli oldu. Ruslan Əmircanovun sağ cinahdan ötürməsindən sonra Cavadov təxminən 12-13 metrdən yaxın küncü nişan aldı. Qapıçımız bu zərbəni dəf etməyi bacardı. Aleksandr İaşvili ilə mübarizədə qaydanı pozan Daniel Subotiç mövsümdə 2-ci sarı vərəqəsini aldı. I hissəyə əlavə olunan dəqiqədə isə serb futbolçu hesabı açdı. Mövsümdə 3-cü qolunu vuran hücumçu təxminən 30 metrdən qapının yaxın küncünü dəqiq nişan aldı. Bununla da o, həm komandanın ən məhsuldar oyunçuları Mendi ilə Leonardoya çatdı, həm də 2 matçlıq susqunluğa son qoydu. Fasilədən sonra meydan sahibləri bərabərlik qolunu vurmaq üçün irəli atılacağı gözlənilirdi. Lakin “qırmızı-qaralar” “İnter”in hücumuna hücumla cavab verdilər. 52-ci dəqiqədə Leonardonun güclü zərbəsi təhlükəli alınsa da, top çərçivədən keçmədi. 68-ci dəqiqədə qapıçı ilə üzbəüz qalan Mendi yubanmaqla imkanı qaçırdı. Az sonra isə qapıçının irəli çıxmasını görən Nizami Hacıyevin paraşüt zərbəsi ilə fərqlənməsinə dəqiqlik çatmadı. Yuri Syomin Luis Hilarionu meydana buraxmaqla matçın axarını müəyyən müddətə dəyişdi. Bunun nəticəsində qonaqlar ardıcıl 2 təhlükəli epizod yaratdı. 75-ci dəqiqədə Lorenso Ebesilionun 19 metrdən vurduğu cərimə zərbəsindən sonra topun “doqquzluğ”a düşməsinə tir mane oldu. Az sonra sol cinahdan qapı önünə ötürməni hamını qabaqlayan Mendi qapasa da, ona dəqiqlik çatmadı. 81-ci dəqiqədə “İnter” hesabı bərabərləşdirməyə yaxın oldu. Əlverişli mövqedə olan Ruslan Əmircanov çərçivəyə düşə bilmədi. Sıçrayan topa hamıdan tez çatan Baçana Sxadadze də zərbə vura bilmədi. Sonuncu cəmi 1 dəqiqə sonra isə İaşvilinin ötürməsini tamamlamğa nail olmadı. 85-ci dəqiqədə isə yüngül zədəsi olan Leonardo Lorival Assislə əvəzləndi. Matçın sonlarında böyük qüvvə ilə irəli atılan “İnter” arxa xəttdə boşluqlar verməklə diqqət çəkdi. Lakin müdafiədə etibarlı oynayan “Qəbələ” əks hücum imkanlarından yararlanmadı.

Beləliklə də “Qəbələ” Bakı səfərində də “İnter”ə 1:0 hesabı ilə qalib gəldi. Bu matçadək səfərdə keçirdiyi 11 görüşdə heç vaxt rəqibini uda bilməyən “qırmızı-qaralar” sindromu bu minimal hesablı qələbə ilə qırdı.