“Qəbələ” - “Kəpəz” – 1:0
23 avqust 2015. Saat 21:00. Qəbələ şəhər stadionu, 900 tamaşaçı
Baş hakim: Orxan Məmmədov
Baş hakimin köməkçiləri: Mübariz Haşımov, Knyaz Əmiraslanov
Dördüncü hakim: Rəvan Həmzəzadə
Əlavə köməkçi hakimlər: Ömər Paşayev, Ramil Əhmədov
AFFA nümayəndəsi: Elbrus Abbasov
Hakim-inspektor: Kərim Ağayev
Sarı vərəqələr: Rafael Santos, 74 (qeyri-idman hərəkəti); Vitali Vernudub, 83 (qeyri-idman hərəkəti) // Budaq Nəsirov, 21 (qeyri-idman hərəkəti); Tural Nərimanov, 58 (qeyri-idman hərəkəti); Bəxtiyar Soltanov, 70 (qeyri-idman hərəkəti); Şəhriyar Rəhimov, 81 (qeyri-idman hərəkəti)
Qol: Ermin Zets, 6
Artırılan vaxt: I hissədə 1 dəq.; II hissədə 3 dəq.
“Qəbələ” bu gün Topaz Premyer Liqasında növbəti oyununu keçirib. “Qırmızı-qaralar” III turun qarşılaşmasında “Kəpəz”lə üz-üzə gəlib. İlk iki oyunda 4 xal toplayaraq, liderlər qrupunda qərarlaşan komandamız ev oyununa uğurlu seriyaları davam etdirmək üçün çıxıb. Premyer Liqadakı son 15 qarşılaşmanı qolsuz tərk etməyən, 14 turdur uduzmayan “Qəbələ” “Kəpəz”lə qarşılaşmadan əvvəlki 10 ev oyununda da azarkeşlərini məyus etməyib. “Qırmızı-qaralar” sonuncu dəfə 2012/13 mövsümündə qarşılaşdığı Gəncə təmsilçisi ilə 9-cu dəfə görüşüb.
Öz meydanında qərblilərə məğlub olmayan komandamız mövsümün çempionatdakı ikinci ev matçına iki dəyişikliklə başlayıb. Belə ki, ötən turun AZAL-la matçında meydana sonradan daxil olan Ermin Zets və Aleksey Antonov start “11-liy”ində yer alıb. Baş məşqçi Roman Qriqorçuk Avropa Liqasının pley-off mərhələsinin “Panatinaikos”la Yunanıstandakı vacib cavab oyunu öncəsi iki aparıcı futbolçuya qüvvəsini qorumaq imkanı verib. Məhz bu səbəbdən Sergey Zenyov və komandamızın kapitanı Dodo matça ehtiyat oyunçular skamyasında başlayıb. Bu üzdən matça kapitan kimi Ürfan Abbasov çıxıb. Klubun tarixində ən çox oyun keçirən 3-cü futbolçu olan müdafiəçi bu göstəricidə yalnız Dodo və Viktor Mendidən geri qalır. 105-ci matçına çıxan arxa xətt oyunçusu ilk dəfə kapitan sarğısı geyinib.
Matçın start fitindən öncə ali təhsil müəssisələrinə imtahan zamanı ən yüksək bal toplamış və tələbə adını qazanmış üç Qəbələ sakininə futbolçularımızın hədiyyələri təqdim olundu. Zöhrə Siracbəyli (695 bal), Təranə Şirinbəyli (695 bal) və Xəyalə Əfəndiyeva (700 bal) noutbuk və pul mükafatını müvafiq olaraq Ürfan Abbasov, Aleksey Qay və Luis Hilario Dododan aldılar.
Oyuna gəlincə, “Qəbələ” ilk dəqiqələrdən təşəbbüsə yiyələnib. Topa daha çox nəzarət edən komandamız qonaqların müdafiə xəttinə yarmaqda çətinlik çəkib. Gəncə təmsilçisinin cərimə meydanına daxil olmaq üçün “qırmızı-qaralar” cinahlardan daha çox istifadə edib. Məhz cinahdan təşkil olunan hücum zamanı matçda hesab açılıb. Cərimə meydanı daxilində olan Zets cinahdan ötürməni dəqiq zərbəylə tamamlayıb – 1:0. Bu, bosniya və herseqovinalı legionerin “Qəbələ”də ilk qolu olub. 6-cı dəqiqəyə təsadüf edən erkən qoldan sonra da komandamız üstünlüyü əldən verməyib. Lakin cərimə meydanına daxil olmağa çətinlik çəkən futbolçularımız uzaq zərbələrlə rəqib qapıçını narahat edib. Fasilədən sonra da oyunun ssenarisi dəyişməyib. “Qəbələ” daha çox top nəzarət edib, rəqibin müdafiə xəttində boşluqlar axtarmaqda davam edib. Qonaqlar isə hər imkanda sürətli əks-hücum təşkil etməyə çalışıb. “Kəpəz”in bu istəyinin qolla nəticələnməsinə isə komandamızın müdafiə xətti və qapıçı mane olub. Baş məşqçilərin əvəzetmələr hesabına hesabı dəyişmək istəyi də nəticəsiz qalıb. “Qəbələ” fərqi artırıb, milli komandaların oyunları ilə əlaqədar yaranacaq fasiləyə zirvədə yollamağa, gəncəlilər isə səfərdən xalla dönmək istəyini gerçəkləşdirə bilməyib.
Beləliklə, “Kəpəz”lə ev oyununda 1:0 hesabı ilə qalib gələn “Qəbələ” turnir cədvəlinin 2-ci pilləsində qərarlaşıb. Bu qələbəylə Premyer Liqadakı məğlubiyyətsiz oyunlar seriyasını 15-ə çatdıran “qırmızı-qaralar” qol vurduğu ardıcıl görüşlərin sayını 16-ya çatdırıb.
“Qəbələ”
22. Dmitri Bezatosnı
4. Elvin Camalov
7. Ermin Zets
(9. Sergey Zenyov, 69)
8. Məhəmməd Mirzəbəyov
11. Asif Məmmədov
15. Vitali Vernudub
19. Aleksey Qay
34. Ürfan Abbasov (k)
44. Rafael Santos
66. Samir Zərgərov
69. Aleksey Antonov
(10. Dodo, 46)
Ehtiyat oyunçular:
1. Andrey Popoviç
3. Vojislav Stankoviç
5. George Floresku
17. Qismət Alıyev
21. Arif Daşdəmirov
Baş məşqçi: Roman Qriqorçuk
“Kəpəz”
88. Tadas Simaitis
3. Tərlan Quliyev
25. Şəhriyar Əliyev
13. Şəhriyar Rəhimov
18. Tural Axundov (k)
5. Kərim Diniyev
(27. Bəxtiyar Soltanov, 67)
8. Budaq Nəsirov
10. Junior da Silva
80. Tural Rzayev
7. Juninyo
(9. Murad Ağakişiyev, 86)
19. Aleksandr Sitnik
(15. Azad Kərimov, 78)
Ehtiyat oyunçular:
1.Eyyub Əliyev
23. Tural Nərimanov
6. Ceyhun Cavadov
4. Elvin Cəbrayıllı
Baş məşqçi: Şahin Diniyev
