MTK (Macarıstan) – “Qəbələ” – 1:2
UEFA Avropa Liqası, II təsnifat mərhələsi, ilk oyun
14 iyul. Saat 22:30. Dyer. “Dyirmot” stadionu
Baş hakim: Boyan Pandjiç (İsveç)
Baş hakimin köməkçiləri: Stefan Hallberq, Maqnus Syoblom (hər ikisi İsveç)
Dördüncü hakim: Mohammed Al-Hakim (İsveç)
Hakim-inspektor: Oğuz Sarvan (Türkiyə)
UEFA nümayəndəsi: Valid İmamoviç (Bosniya və Herseqovina)
Qollar: Şandor Torqelle, 70 // Nika Kvekveskiri, 25, Filip Ozobiç, 63
14-cü dəqiqədə Yozef Konto penaltidən yararlana bilməyib.
Sarı vərəqələr: Daniel Gero, 26, Barnabaş Beşe, 40 // Vojislav Stankoviç, 40
Artırılan vaxt: I hissədə 1 dəq.; II hissədə 2 dəq.
“Qəbələ” UEFA Avropa Liqasının II təsnifat mərhələsində ilk oyununu keçirib. “Qırmızı-qaralar” Macarıstanın MTK klubu ilə üz-üzə gəlib. Bu ölkənin təmsilçisi ilə qarşılaşan ilk Azərbaycan klubu olan təmsilçimiz bu matçı səfərdə keçirib. Baş məşqçi Roman Qriqorçuk I təsnifat mərhələsinin “Samtredia” ilə səfər matçı ilə müqayisədə start heyətində yalnız bir dəyişiklik edib. Məhəmməd Mirzəbəyova ilk “11-lik”də şans verən mütəxəssis Ürfan Abbasovu ehtiyatda saxlayıb.
Oyun qarşılıqlı hücumlarla başlayıb. Meydan sahibləri 4-cü dəqiqədə Barnabaş Beşenin cərimə zərbəsi ilə təhlükəli epizod yaradıb. Komandamızın cavabı 3 dəqiqə sonraya təsadüf edib. Nika Kvekveskirinin künc zərbəsindən sonra Baqali Dabo topa yiyələnsə də, əlverişli vəziyyətdən çərçivəyə düşməyib. Ardınca isə Nikanın zərbəsində dəqiqlik çatmayıb. 14-cü dəqiqədə meydan sahiblərinin hücumu penalti ilə nəticələnib. Mirzəbəyovun Daniel Geroya qarşı qayda pozuntusuna görə təyin olunan 11 metrlik cərimə zərbəsini Yozef Konto yerinə yetirib. Dmitri Bezotosnı bu zərbəni qaytarıb. Bundan sonra üstünlüyə yiyələnən “Qəbələ” ardıcıl hücumlar təşkil edib. Dabonun zərbəsi müdafiəçilərdən dönübsə, Teo Uiksin fərqlənməsinə qapıçının reaksiyası imkan verməyib. 25-ci dəqiqədə Geronun qayda pozuntusuna görə təyin olunan cərimə zərbəsini Nika dəqiq yerinə yetirib. O, cərimə meydanının solundan zərbəni yaxın küncə göndərib. Bundan sonra da təşəbbüsü əldən verməyən “qırmızı-qaralar”ın heyətində Filip Ozobiç də qol imkanı əldə edib. Onun zərbəsini müdafiəçilər dəf edib. İlk yarının son 10 dəqiqəsində meydan sahibləri daha çox hücum etsə də, qol epizodu yarada bilməyib. “Qəbələ”nin əks-hücumu zamanı isə Sergey Zenyov əlverişli imkan əldə edib. Cərimə meydanında daxil olan hücumçunun uzaq küncə ünvanlandığı topu qapıçı küncə çıxarıb.
İkinci hissəyə də “qırmızı-qaralar” daha fəal başlayıb. Lakin ilk təhlükəli epizodu macarıstanlılar yaradıb. Beşenin qüvvətli zərbəsini Bezotosnı dəf edib. 60-cı dəqiqədə isə Dabonun qapı önünə ötürməsi qapıya istiqamətlənsə də, qolkiper sayıqlığı əldən verməyib. 3 dəqiqə sonra isə komandamız fərqi artırmağa nail olub. Rikardinyonun sol cinahdan cərimə meydanına ötürməsini Dabo dabanla Ozobiçə ünvanlayıb. Sonuncunun zərbəsi isə qarşısıalınmaz olub. Bundan sonra meydan sahibləri fərqlənmək imkanı əldə etsə də, Darko Nikaç dəqiq oynamayıb. 70-ci dəqiqədə Kontonun künc zərbəsindən sonra Şandor Torqelle cərimə meydanında hamıdan yüksəyə qalxaraq, başla qapını nişan alıb – 1:2. Meydan sahiblərinin hesabda tarazlıq yaratmağa yaxın olduğu epizodda isə Bezotosnı Sotmarinin zərbəsini zərərsizləşdirib. Matçın sonlarında daha çox mərkəzdə mübarizə aparan komandalar qapılar önündə qol epizodu yaratmaqda çətinlik çəkib. Lakin 90+1-ci dəqiqədə Nika cərimə meydanından kənardan qapını nişan almaq imkanı əldə edib. Legionerimizin zərbəsi istənilən kimi alınmadığından qapıçı çətinlik çəkmədən topu tutub.
Beləliklə, 2:1 hesabı ilə qalib gələn “Qəbələ” avrokuboklarda ilk səfər qələbəsini qazanıb. MTK ilə cavab oyunu iyulun 21-də Bakıda keçiriləcək.
MTK
1. Layos Heqeduş
4. Akos Baki
5. Mato Qrqiç
9. Darko Nikaç
(27. Sobolç Varqa, 65)
14. Şandor Torgelle
18. Barnabaş Beşe
19. Yozef Konto (k)
24. Patrik Poor
30. Balint Borbey
(10. Lorand Sotmari, 74)
33. Daniel Gero
(12. David Yakob, 78)
38. Adam Voşş
Ehtiyat oyunçular:
28. Federiko Qroppioni
3. Bentse Doiç
13. Adam Hrepka
21. Draqan Vukmir
Baş məşqçi: Vasilis Teodoru
“Qəbələ”
22. Dmitri Bezotosnı
3. Vojislav Stankoviç
6. Rəşad Sadiqov (k)
7. Nika Kvekveskiri
9. Sergey Zenyov
15. Vitali Vernidub
17. Məhəmməd Mirzəbəyov
18. Baqali Dabo
(11. Asif Məmmədov, 86)
19. Filip Ozobiç
20. Rikardinyo
27. Teo Uiks
Ehtiyat oyunçular:
33. David Pietrzkeviç
4. Elvin Camalov
13. Murad Musayev
34. Urfan Abbasov
44. Rafael Santos
88. Tellur Mütəllimov
Baş məşqçi: Roman Qriqorçuk
