“Çukariçki” (Serbiya) – “Qəbələ” (Azərbaycan) – 1:0
UEFA Avropa Liqası, II təsnifat mərhələsi, ilk oyun
16 iyul. Saat 23:30. Belqrad. “Çukariçki” stadionu
Baş hakim: Radu Petresku (Rumıniya)
Baş hakimin köməkçiləri: Ovidiu Artene, Vladimir Urzixa (hər ikisi Rumıniya)
Dördüncü hakim: Marsel Birsan (Rumıniya)
UEFA nümayəndəsi: Joze Gilyerme Aquiar (Portuqaliya)
Hakim-inspektor: Plarent Koterja (Albaniya)
Sarı vərəqələr: Georgi Floresku, 21, Rafael Santos, 25, Ürfan Abbasov, 61, Rayko Brezamçiç, 69, Vitali Vernidub, 74, Cavid Hüseynov, 80
Qol: Nikola Stoilkoviç, 53-pen.
Artırılan vaxt: I hissədə 1 dəq., II hissədə 3 dəq.
UEFA Avropa Liqasında II təsnifat mərhələsinə start verilib. Mövsümdə 3-cü oyununu keçirən “Qəbələ” Serbiyanın “Çukariçki” klubu ilə qarşılaşıb. “Qırmızı-qaralar” bu matçı səfərdə keçirib. Komandamızın baş məşqçisi Roman Qriqorçuk son oyunla müqayisədə start heyətində heç bir dəyişiklik etməyib. Buna görə də komandamız oyuna Qəbələdə Tiflis “Dinamo”su ilə qarşılaşmadakı“11-lik”lə başlayıb.
Görüşə daha fəal başlayan meydan sahibləri ərazi üstünlüyünə yiyələnib. Daha çox əks-hücum təşkil etmək imkanı yaranan “Qəbələ” 4-сü dəqiqədə serbiyalıların qapısı önündə gərginlik yaradıb. Rikardinyo cinahla reyd edib, topu Cavid Hüseynova ötürüb. Kapitanın ötürməsindən sonra Sergey Zenyovun zərbəsi tirin üstündən keçib. “Çukariçki”nin hücumlarının qarşısını alan “qırmızı-qaralar”ın yarımmüdafiə xəttinin üzərinə daha çox iş düşüb. Bu da Georgi Floreskunun sarı vərəqə ilə cəzalanması ilə nəticələnib. Ardıcıl 3-cü matçda xəbərdarlıq alan rumıniyalı bununla da cəzalı duruma düşüb. Hissənin ortalarında meydan sahibləri qola yaxın olsa da, Slavolyub Srniçin zərbəsindən sonra Rafael Santos inamlı oynayıb. Serbiyalıların ən fəallarından olan Brezançiçin təhlükəli cərimə zərbəsindən sonra top tirin üstündən ötüb. Sağ cinahdan ötürmə zamanı qapıçı ilə üz-üzə qalan Stoljkoviçin zərbəsini isə Dmitri Bezotosnı dəf edib. Oyunun axarını dəyişməyə qərar verən Qriqorçuk Floreskunu Dodo ilə əvəzləyib. Braziliyalı meydana daxil olduqdan az sonra rəqibin cərimə meydanında təhlükəli zərbə vurmağa yaxın olsa da, topa toxuna bilməyib. “Çukariçki” fasilə öncəsi fərqlənməyə yaxın olub. Qapı önünə asma zamanı Bezotosnı da səhvə yol versə də, Rikardinyo topu uzaqlaşdırıb.
İkinci hissəyə komandalar qol vəziyyətlərinin az olduğu ilk yarı ilə müqayisədə daha fəal başlayıb. “Çukariçki”nin ilk həmləsi ardıcıl bir neçə təhlükə ilə diqqət çəkib. Lakin “Qəbələ”nin arxa xətt oyunçuları imanlı çıxış edib. “Qırmızı-qaralar”ın cavabı da yaddaqalan olub. İkinci hissədə meydana daxil olan Arif Daşdəmirov Cavidin ötürməsindən sonra cərimə meydanı daxilində təhlükə yaradıb. O, üzərinə şığıyan qapıçının yanından yaxın dirəyin önünə ötürmə verib. Lakin müdafiəçilər topa toxunmağa çalışan Aleksey Qayı qabaqlaya bilib. “Çukariçki”nin hücumu isə penalti ilə nəticələnib. Rafael cərimə meydanına daxil olan Slavolyub Srniçin qarşısını kobudluqla alıb. Stoilkoviçin zərbəsinin istiqamətini düz müəyyənləşdirən Bezotosnı topa toxunsa da, qola mane ola bilməyib. Qoldan bir neçə dəqiqə sonra Slavolyubun güclü zərbəsini qolkiperimiz tuta bilib. “Qəbələ”nin əks-hücumu zamanı Dodonun cərimə meydanına ötürməsinə rəqib qapıçı daha tez çatıb. Matçın 74-cü dəqiqəsində sarı vərəqə alan Vitali Vernidub da cəzalı duruma düşüb. Meydan sahiblərinin növbəti təhlükəsi zamanı Stoilkoviçin 22 metrdən endirdiyi güclü zərbədən sonra top tirin üstündən keçib. “Qəbələ”nin cavab hücumu zamanı Cavidin ötürməsini tamamlayan Rikardinyoya dəqiqlik çatmayıb.
Beləliklə, cavab oyununu iyulun 23-də keçirəcək “Qəbələ” səfərdə minimal hesabla məğlub olub – 0:1. Mövsümün ilk iki oyununda rəqib qapısına yol tapan “qırmızı-qaralar” Serbiyadan qolsuz dönür.
“Çukariçki”
12. Nemanya Stevanoviç
4. Lukas Plasentin
22. Filip Stoykoviç
23. Bojan Ostojiç
31. Rayko Brezançiç (k)
6. Draqolyub Srniç
8. Branislav Yankoviç
24. Petar Bojiç
(19. Saşa Yovanoviç, 90+1)
9. Nikola Stoilkoviç
(30. Nenad Mirosavlyeviç, 85)
11. Andriya Pavloviç
(7. Stanişa Mandiç, 67)
14. Slavolyub Srniç
Ehtiyat oyunçular
1. Nikola Petriç
5. Marko Ranceloviç
20. Reqan Obenq
25. Dejan Boljeviç
Baş məşqçi: Vladan Miloyeviç
“Qəbələ”
22. Dmitri Bezotosnı
15. Vitali Vernidub
20. Rikardinyo
34. Ürfan Abbasov
44. Rafael Santos
5. Georgi Floresku
(10. Dodo, 36)
6. Rəşad Sadiqov
14. Cavid Hüseynov (k)
19. Aleksey Qay
9. Sergey Zenyov
(11. Asif Məmmədov, 88)
69. Aleksey Antonov
(21. Arif Daşdəmirov, 46)
Ehtiyat oyunçular:
1. Andrey Popoviç
3. Vojislav Stankoviç
8. Məhəmməd Mirzəbəyov
66. Samir Zərgərov
Baş məşqçi: Roman Qriqorçuk
