“Qəbələ” – “Kəpəz” – 2:0
8 avqust 2016. Saat 19:00. “Dalğa Arena”, 300 tamaşaçı
Baş hakim: Fariz Yusifov
Baş hakimin köməkçiləri: Vaqif Musayev, Nahid Əliyev
Dördüncü hakim: Knyaz Əmiraslanov
Əlavə köməkçi hakimlər: Orxan Məmmədov, Rəvan Həmzəzadə
AFFA nümayəndəsi: Elbrus Abbasov
Hakim-inspektor: Xaqani Məmmədov
Sarı vərəqələr: Ürfan Abbasov, 48 (qeyri-idman hərəkəti); Tellur Mütəllimov, 52 (qeyri-idman hərəkəti); Elvin Camalov, 58 (qeyri-idman hərəkəti) // Julien Ebah, 29 (qeyri-idman hərəkəti)
Qollar: Tellur Mütəllimov, 58; Baqali Dabo, 79
Artırılan vaxt: I hissədə 2 dəq.; II hissədə 3 dəq.
Bu gün Topaz Premyer Liqasında 2016-2017-ci illər mövsümünün ilk turuna yekun vurulub. Turun son qarşılaşması “Dalğa Arena”da keçirilib. Cari mövsüm Azərbaycanı avrokuboklarda təmsil edən “Qəbələ” və “Kəpəz” Bakıda üz-üzə gəlib. UEFA Avropa Liqasında mübarizəni pley-off mərhələsində davam etdirən “qırmızı-qaralar” ilk çempionat oyununa fərqli heyətlə çıxıb. Son avrokubok matçları ilə müqayisədə Elvin Camalov, Asif Məmmədov, Ürfan Abbasov və Rafael Santos ilk dəqiqələrdən meydanda olub. Əvəzində Vitali Vernidub, Nika Kvekveskiri, Sergey Zenyov və Rikardinyo start heyətindən kənarda qalıb.
Görüş qarşılıqlı hücumlarla başlasa da, “Qəbələ” tezliklə üstünlüyü ələ alıb. İlk hissənin birinci yarısında ardıcıl hücumlar edən “qırmızı-qaralar” qapı istiqamətində dəfələrlə zərbə endirsə də, real qol vəziyyəti yaratmaqda çətinlik çəkib. “Kəpəz” isə daha çox əks-hücumlara ümid etdiyini ilk dəqiqələrdən nümayiş etdirib. Hissənin ortalarında meydan sahibləri ilk yarıdakı ən təhlükəli epizodunu yaradıb. Teo Uiks və Filip Ozobiçin cərimə meydanındakı divar paslaşmaları sonuncunun qüvvətli zərbəsi ilə nəticələnib. Gəncə təmsilçisini qoldan Tadas Simaitisin reaksiyası xilas edib. Az keçməmiş isə qolkiper kobud səhvə yol verib. O, sol cinahdan hava ötürməsinə çıxış zamanı topu əlindən buraxıb. Lakin “qırmızı-qaralar” bundan yararlana bilməyib. Ardınca “Qəbələ”nin kapitanı Rəşad Sadiqov zədələnərək, meydanı tərk edib. Onu gənc Tellur Mütəllimov əvəzləyib. Kapitan sarğısı isə təcrübəli Rafaelə keçib. “Kəpəz”in cavabı çox təhlükəli alınıb. Uzun ötürmədən sonra Dario Federiko qapıçı ilə təkbətək çıxsa da, Dmitri Bezotosnının inamlı oyunu hesabın açılmasına imkan verməyib. Sonradan meydana çıxan Mütəllimov da fərqlənmək imkanı əldə edib. Cinah ötürməsini başla qapayan futbolçuya dəqiqlik çatmayıb.
Lakin akademiyamızın yetirməsi ikinci hissədə oyunun qəhrəmanı olmağı bacarıb. Fasilədən sonra komandalar qarşılıqlı hücumlara keçib. Qonaqlar topa nəzarəti ələ almağa çalışdığı vaxtda “Qəbələ”nin əks-hücumu məhsuldar alınıb. Asif Məmmədovun uzun ötürməsindən sonra ön xətdə “qırmızı-qaralar”ın üç oyunçusu say üstünlüyü qazanıb. Komanda yoldaşından ötürmə alan Ozobiç daha əlverişli mövqedə olan Telluru qapıçı ilə üz-üzə qoyub. O isə topu ram edərək, qarşısıalınmaz zərbə ilə hesabı açıb – 1:0. Bu, onun əsas komandada ilk qolu olub. Buraxılan qoldan sonra gəncəlilər üstünlüyü ələ alaraq, daha çox hücum təşkil ediblər. Lakin real qol vəziyyəti yarada bilməyən qonaqlar yalnız bir neçə güclü zərbə ilə yadda qalıblar. Kərim Diniyevin yaxın küncə zərbəsini qolkiper dəf edib. Bezotosnı daha bir neçə dəfə inamlı oyunu ilə hesabın dəyişməsinə imkan verməyib. “Qəbələ”nin növbəti sürətli əks-hücumu təhlükəli alınıb. Meydana sonradan daxil olan Sergey Zenyovun zərbəsi tirdən dönüb. Elə bu hücumun davamı qolla nəticələnib. Mütəllimovun sağ cinahdan ötürməsindən sonra Baqali Dabo fərqlənib – 2:0. Fransalı “Qəbələ”də qol hesabını açıb. Bu qoldan sonra oyunun taleyi böyük ölçüdə həll olunsa da, qonaqlar hücumlarını davam etdiriblər. Bezotosnı və müdafiə xəttinin inamlı oyunu sayəsində hesab dəyişməyib. “Qırmızı-qaralar” isə hər əks-hücum imkanında futbolçuların sürəti hesabına rəqibi gərginlikdə saxlamağa çalışıb. Lakin matçın sonluğunda qol qeydə alınmayıb.
Beləliklə, “Qəbələ” Topaz Premyer Liqasının 2016-2017-ci illər mövsümünə “Kəpəz” üzərində 2:0 hesablı qələbəylə start verib.
“Qəbələ”
22. Dmitri Bezotosnı
3. Vojislav Stankoviç
4. Elvin Camalov
6. Rəşad Sadiqov (k)
(88. Tellur Mütəllimov, 34)
11. Asif Məmmədov
(8. Qismət Alıyev, 68)
17. Məhəmməd Mirzəbəyov
18. Baqali Dabo
19. Filip Ozobiç
27. Teo Uiks
(9. Sergey Zenyov, 54)
34. Ürfan Abbasov
44. Rafael Santos
Ehtiyat oyunçular:
33. David Pietrzikeviç
7. Nika Kvekveskiri
13. Murad Musayev
32. Rəşad Eyubov
Baş məşqçi: Roman Qriqorçuk
“Kəpəz”
88. Tadas Simaitis
18. Tural Axundov (k)
(21. Novruz Məmmədov, 82)
36. Renan Silva
25. Şəhriyar Əliyev
13. Şəhriyar Rəhimov
5. Kərim Diniyev
77. Serjio Kosta
(9. Tural Qürbətov, 75)
10. Dario Federiko
17. Nicat Qurbanov
(6. Ceyhun Cavadov, 65)
19. Orxan Əliyev
90. Julien Ebah
Ehtiyat oyunçular:
30.Davud Kərimi
15. Azad Kərimov
7. Vüqar Bəybalayev
14. Fərid Məmmədov
Baş məşqçi: Şahin Diniyev
