Bu gün UEFA Avropa Liqasının qrup mərhələsinin püşkatma mərasimi keçirilib. Monakoda baş tutan tədbirdə tarixində ilk dəfə bu mərhələyə yüksələn “Qəbələ”nin növbəti rəqibləri bəlli olub. Püşkün nəticələrinə əsasən, “qırmızı-qaralar” C qrupunda yer alıb. Roman Qriqorçukun yetirmələri 1/16 finala vəsiqə uğrunda “Borussiya” (Dortmund, Almaniya), PAOK (Yunanıstan) və “Krasnodar” (Rusiya) klubları ilə mübarizə aparacaq. Dairəvi sistemlə iki dövrədə keçiriləcək qrup mərhələsinin oyunlarına sentyabrın 17-də start veriləcək. Komandamız növbəti matçlarını oktyabrın 1-də, 22-də, noyabrın 5-də, 26-da və dekabrın 10-da keçirəcək. Xatırladaq ki, “Qəbələ” I təsnifat mərhələsində Gürcüstanın “Dinamo” Tiflis klubunu (1:2, 2:0), II təsnifat mərhələsində Serbiyanın “Çukariçki” komandasını (0:1, 2:0), III təsnifat mərhələsində Kipr “Apollon”unu (1:1, 1:0), pley-offda Yunanıstan “Panatinaikos”unu (0:0, 2:2) mübarizədən kənarlaşdırıb.
