UEFA Avropa Liqasında 2018-2019 mövsümünün Əsas yolunun ilk püşkatması keçirilib. İsveçrənin Nyon şəhərindəki tədbirdə öncə I təsnifat mərhələsinin cütləri müəyyənləşib. UEFA Avropa Liqasında çıxış edəcək “Qəbələ”nin rəqibi də bəlli olub. Ardıcıl 5-ci dəfə turnirdə qüvvəsini sınayacaq komandamız yarışa I təsnifat mərhələsindən başlayacaq. “Qırmızı-qaralar” bu mərhələdə Lüksemburqun “Proqres” klubu ilə qarşılaşacaq. Komandamız ilk oyununu iyulun 12-də səfərdə keçirəcək. Cavab görüşü isə iyulun 19-da evdə baş tutacaq.
“Proqres” – “Qəbələ” cütünün qalibinin II təsnifat mərhələsindəki rəqibi də məlum olub. “Qırmızı-qaralar” ilk mərhələni uğurla adlasa, növbəti etapda “Honved” (Macarıstan) – “Rabotniçki” (Makedoniya) cütünün qalibi ilə qarşılaşacaq. Bu mərhələnin oyunları iyulun 26-da və avqustun 2-də baş tutacaq. İlk matç Macarıstan və Makedoniya klublarının görüşündə qalib gələn komandanın meydanında keçiriləcək.
