“Rəvan” – “Qəbələ” – 0:3
25 sentyabr 2015. Saat 20:00. “Bayıl Arena”, 430 tamaşaçı
Baş hakim: Elvin Əsgərov
Baş hakimin köməkçiləri: Namiq Hüseynov, Rahil Ramazanov
Dördüncü hakim: Mehman Mahmudov
Əlavə köməkçi hakimlər: Rəhim Həsənov, İnqilab Məmmədov
AFFA nümayəndəsi: Rauf Əmirov
Hakim-inspektor: Murad Məmmədov
Sarı vərəqələr: Samir Zərgərov, 73 (qeyri-idman hərəkəti)
Qollar: Dodo, 37; Samir Zərgərov, 58, Aleksey Qay, 78
Artırılan vaxt: I hissədə - yoxdur.; II hissədə 2 dəq.
Bu gün Topaz Premyer Liqasında VI tura start verilib. “Qəbələ” turun ilk günündə “Rəvan”la qarşılaşıb. “Qırmızı-qaralar” səfər oyununa heyətdəki bəzi dəyişikliklərlə başlayıb. Belə ki, 4 gün əvvəl “Sumqayıt”la ev qarşılaşmasında ilk “11-lik”də meydana çıxan futbolçulardan 4-ü bu dəfə heyətdə yer almayıb. Belə ki, Aleksey Antonov, Rəşad Sadiqov, Vojislav Stankoviç və Məhəmməd Mirzəbəyov “11-lik”dən kənar qalıb. Əvəzində Roman Qriqorçuk ilk dəqiqələrdən Sergey Zenyov, Vitali Vernidub, Arif Daşdəmirov və Samir Zərgərova şans verib. Oyunun ilk dəqiqələrindən daha fəal təsir bağışlayan komandamız üstünlüyü ələ alıb. “Rəvan” isə nadir əks-hücumlarla müdafiə xəttimizi narahat etməyə çalışıb. Ötən tur meydana sonradan daxil olub, fəallığı ilə seçilən Zenyov matçın əvvəlində iki dəfə hesabı açmaq imkanı əldə edib. Lakin estoniyalı hər iki imkanı boşa verib. Sağ cinahda fəallıq nümayiş etdirən Zərgərovun qapı önünə ötürməsi zamanı Dodo da hesabı açmağa yaxın olub. Lakin kapitanın baş zərbəsi alınmayıb. Meydan sahibləri isə demək olar ki, Dmitri Bezotosnıya ciddi çətinlik yaşatmaqda çətinlik çəkib. Qarşılaşmanın 35-ci dəqiqəsində Aleksey Qayın uzaq zərbəsi yadda qalıb. Bu epizodda meydan sahiblərini topu küncə çıxaran qapıçı xilas edib. Künc zərbəsindən sonra da məhz qolkiper topu uzaqlaşdırıb. Az keçməmiş komandamız istəyinə çatıb. Samir Zərgərovun cinah ötürməsindən sonra Zenyov topa toxuna bilməsə də, özünü yetirən Dodo çərçivəni dəqiq nişan alıb – 1:0. Premyer Liqanın cari mövsümündə ilk dəfə fərqlənən braziliyalı “qırmızı-qara” formada 26-cı qoluna imza atıb. Komandamızın hücumlarını davam etdirməsinə baxmayaraq, ilk yarıda hesab dəyişməyib.
İkinci hissəyə də hücumlarla başlayan “Qəbələ” daha çox sağ cinahda fəallıq göstərib. Hissənin əvvəlində “Rəvan”ın əks-hücumu yaddaqalan olub. Tural Qürbətovun təhlükəli zərbəsini Bezotosnı qaytarıb. Bakılıların təkrar zərbəsi isə alınmayıb. “Qırmızı-qaralar” hücumlarına ara vermədən rəqib qapısında təzyiqi artırıb ki, bu da nəticəsini verib. İlk qolda assistentlik edən Zərgərov bu dəfə özü fərqlənib – 2:0. Bu yarımmüdafiəçinin mövsümdə 2-ci, “Qəbələ”də 12-ci qolu olub. Meydana sonradan daxil olan Antonovla Ermin Zets də hücum xəttini xeyli gücləndirib. Görüşün 74-cü dəqiqəsində sonuncunun cərimə meydanına ötürməsini Antonov qapasa da, top qapının yanından ötüb. Sağ cinahdan növbəti hücum isə cərimə meydanındakı qarışıqlıqla nəticələnib. Zetsin zərbəsi rəqibdən dönsə də, yaxınlıqda qərarlaşan Qay ardıcıl ikinci oyunda qol sevinci yaşayıb. Mövsümdə 3-cü dəfə fərqlənən yarımmüdafiəçi çempionatın bombardirlərinə çatıb. Böyükhesablı qələbəni təmin edən “Qəbələ” qarşılaşmanın sonunadək hücumlarına ara verməyib. Amma rəqib qapısına təzyiq növbəti qol üçün yetərli olmayıb.
Beləliklə, ardıcıl 19-cu çempionat oyununda qol sevinci yaşayan “Qəbələ” mövsümdə ilk böyükhesablı qələbəsini qazanıb. Paytaxtdan 3 xalla dönən komandamız bu qələbə ilə çempionatın liderlərinə çatıb.
“Rəvan”
32. Kostyantin Maxnovskiy
21. Novruz Məmmədov (k)
(6. Vüqar Bəybalayev, 83)
16. Orxan Lalayev
2. Ruslan Tağızadə
11. Şeriff Suma
8. Məhəmməd Quliyev
92. Yamin Ağakərimzadə
99. Nicat Muxtarov
(39. Əlibəy Məmmədli, 90+2)
10. Alibobo Raxmatullayev
7. Elvin Həsənəliyev
(22. Məhəmməd Alıyev, 59)
19. Tural Qürbətov
Ehtiyat oyunçular:
1. Rəşad Əzizli
4. Kənan Müslümov
88. Roini İsmayılov
20. Kənan Manafov
Baş məşqçi: Emin Quliyev
“Qəbələ”
22. Dmitri Bezotosnı
4. Elvin Camalov
87. Ruslan Abışov
9. Sergey Zenyov
10. Dodo (k)
(7. Ermin Zets, 66)
15. Vitali Vernidub
19. Aleksey Qay
(88. Derlis Meza Kolli, 82)
21. Arif Daşdəmirov
32. Fakundo Pereyra
(69. Aleksey Antonov, 46)
34. Ürfan Abbasov
66. Samir Zərgərov
Ehtiyat oyunçular:
1. Andrey Popoviç
3. Vojislav Stankoviç
8. Məhəmməd Mirzəbəyov
25. Qismət Alıyev
Baş məşqçi: Roman Qriqorçuk
