“Qəbələ” – PAOK (Yunanıstan) – 0:0
UEFA Avropa Liqası, qrup mərhələsi, C qrupu, I tur
17 sentyabr. Saat 22:00. Bakı. “Bakcell Arena” stadionu
Baş hakim: Xavyer Estrada (İspaniya)
Baş hakimin köməkçiləri: Migel Martines, Teodoro Sobrino (hər ikisi İspaniya)
Əlavə köməkçi hakimlər: Alexandro Ernandes, Santyaqo Xayme (hər ikisi İspaniya)
Dördüncü hakim: Dieqo Barbero Sevilya (İspaniya)
UEFA hakim-inspektoru: Vladimir Antonov (Moldova)
UEFA nümayəndəsi: Miroslav Rişka (Polşa)
Sarı vərəqələr: Qari Rodriges, 31, Gerogios Tsavellas, 45, Dodo, 69, Aleksey Antonov, 90
Artırılan vaxt: I hissəyə 2 dəq.; II hissəyə 4 dəq.
UEFA Avropa Liqasında qrup mərhələsinə start verilib. Tarixində ilk dəfə avrokubokların əsas raunduna yüksələn “Qəbələ” Yunanıstan təmsilçisi PAOK-la qarşılaşıb. Cari mövsüm qitə miqyaslı turnirlərdə öz meydanında qol buraxmayan “qırmızı-qaralar” 5-ci ev matçına çıxıb. Komandamız son avrokubok qarşılaşması ilə müqayisədə görüşə 1 dəyişikliklə başlayıb. Digər Yunanıstan klubu “Panatinaikos”la pley-offun cavab oyununda ilk “11-lik”də yer alan Rəşad Sadiqov ehtiyatda qalıb. Əvəzində yeni transferlərdən olan Derlis Meza Kolli debüt oyununa start heyətində çıxıb.
Qarşılıqlı hücumlarla başlayan oyunun ilk dəqiqələrində hər iki komanda üstünlüyə yiyələnmək üçün çalışıb. İlk təhlükə qonaqlardan gəlib. Kitsiunun sağ cinahdan ötürməsindən sonra Pelkas əlverişli mövqedə olsa da, fərqlənə bilməyib. Ardınca üstünlüyə yiyələnən “Qəbələ” ardıcıl bir neçə hücum təşkil edib. 10-cu dəqiqədə Rikardinyonun 22 metrdən zərbəsini rəqib qapıçı qaytarıb. Arif Daşdəmirovun cərimə zərbəsindən sonra da qonaqların qapısı önündə gərginlik yaşanıb. 19-cu dəqiqədə isə PAOK-un futbolçusu qapıçı ilə təkbətək çıxsa da, arxadan özünü yetirən Vojislav Stankoviç topu onun ayaqlarının altından uzaqlaşdırıb. Rodrigesin zərbəsini isə Dmitri Bezotosnı küncə çıxarıb. Bundan sonra irəli atılan “qırmızı-qaralar” Yunanıstan təmsilçisinin cərimə meydanında yaranan qarışıqlıqdan istifadə edə bilməyib. Bundan sonra da hücumlara davam edən “Qəbələ”nin ön xətt oyunçuları Aleksey Antonov, Ermin Zets, Sergey Zenyov və Dodo rəqibin müdafiə xəttini gərginlikdə saxlasa da, real qol vəziyyəti yarada bilməyib. Fasilə öncəsi “Qəbələ” hesabı açmağa yaxın olub. Cərimə meydanına daxil olmaq istəyən Zenyova qarşı kobudluğa görə 19 metrdən cərimə zərbəsi təyin olunub. Rikardinyonun təhlükəli zərbəsi tirin üstündən keçib.
Fasilədən sonra daha bir yeni transfer Fakundo Pereyra “qırmızı-qara” formada ilk avrokubok qarşılaşmasına çıxıb. İkinci hissəyə də “qırmızı-qaralar” daha fəal başlayıb. 52-ci dəqiqədə Zenyov real qol imkanını qaçırıb. Dodonun sağ cinahdan ötürməsindən sonra qapıçı meydanında olan estoniyalı çərçivəni dəqiq nişan ala bilməyib. Qonaqların cavabı da təhlükəli alınıb. Dimitar Berbatovun dəqiq ötürməsindən sonra əlverişli mövqedə qərarlaşan Makın təhlükəli zərbəsini Bezotosnı dəf edib. Qarşılaşmanın 68-ci dəqiqəsində isə yunanıstanlıların qapıçısı komandasını xilas edib. Aleksey Qayın sol cinaha ötürməsindən sonra Zenyovun qapı önünə göndərdiyi top müdafiəçiyə toxunub qapıya istiqamətlənib. Qolkiperin qaytardığı topu qapamağa çalışan Antonovla Dodonu qabaqlayan qapıçı ikinci dəfə komandasını xilas edib. Bir neçə dəqiqə sonra Qay yaxın məsafədən qapıya zərbə endirsə də, Olsen topa yiyələnib. Ardınca Pereyranın 20 metrdən endirdiyi qüvvətli zərbə təhlükəli alınsa da, top dirəyin yanından ötüb. Komandamızın kapitanı Dodo oyunun 83-cü dəqiqəsində zədələnərək meydanı tərk edib. Bundan sonra da daha çox hücum edən “Qəbələ” rəqibin müqavimətini qıra bilməyib. Hissənin sonlarında əvvəl Zenyov, ardınca Antonov qola yaxın olsa da, hesab açılmayıb. Estoniyalının qarşısını müdafiəçilər almağı bacarıbsa, künc zərbəsindən sonra ukraynalı başla çərçivəni dəqiq nişan ala bilməyib. Son saniyələrdə isə Bezotosnı Makın yaxın məsafədən zərbəsini dəf edib. Bununla da qarşılaşma qolsuz heç-heçəylə nəticələnib. “Qəbələ” evdə ardıcıl 5-ci quru oyununu keçirməklə məğlubiyyətsizlik seriyasını 6-ya çatdırıb.
Qeyd edək ki, “Qəbələ”nin yer aldığı C qrupunda keçirilən digər oyunda “Borussiya” (Dortmund, Almaniya) və “Krasnodar” (Rusiya) qarşılaşıb. Bu görüşdə meydan sahibləri əzmkar qələbə qazanıb – 2:1.
“Qəbələ”
22. Dmitri Bezotosnı
3. Vojislav Stankoviç
15. Vitali Vernidub
20. Rikardinyo
21. Arif Daşdəmirov
88. David Meza Kolli
10. Dodo (k)
(66. Samir Zərgərov, 83)
19. Aleksey Qay
9. Sergey Zenyov
69. Aleksey Antonov
7. Ermin Zets
(32. Fakundo Pereyra, 46)
Ehtiyat oyunçular:
33. David Pietrzkeviç
4. Elvin Camalov
6. Rəşad Sadiqov
8. Məhəmməd Mirzəbəyov
70. Vaqif Cavadov
Baş məşqçi: Roman Qriqorçuk
PAOK
25. Robin Olsen
15. Migel Vitor
20. Rikardo Koşta
31. Gerogios Tsavellas
70. Stelios Kitsiu
6. Aleksandros Tsiolis
11. Robert Mak
24. Qari Rodriges
52. Erik Sabo
(9. Jairo da Silva, 85)
77. Dmitrias Pelkas
(7. Eyal Qolasa, 76)
33. Stefanos Atasiniadis (k)
(10. Dmitar Berbatov, 59)
Ehtiyat oyunçular:
71. Panagiotis Qlikos
13. Stelios Malezas
22. Dmitris Konstantinidis
21. Çaris Çarisis
Baş məşqçi: İqor Tudor
