“Rəvan” – “Qəbələ” – 0:1
21 fevral 2016. Saat 16:30. “Bayıl Arena”, 300 tamaşaçı
Baş hakim: Ömər Paşayev
Baş hakimin köməkçiləri: Vaqif Musayev, Munis Abdullayev
Dördüncü hakim: Xəlil Xəlilov
AFFA nümayəndəsi: Arif Fərəcov
Hakim-inspektor: Füzuli Nəcəfov
Sarı vərəqələr: yoxdur
Qol: Arif Daşdəmirov, 77
Artırılan vaxt: I hissədə 1 dəq.; II hissədə 3 dəq.
Bu gün Topaz Premyer Liqasında XXII tura yekun vurulub. Günün son matçında “Qəbələ” “Rəvan”la qarşılaşıb. Son iki turda minimal hesablı qələbə qazanan “qırmızı-qaralar” səfər matçına da 3 xal iddiası ilə çıxıb. İndiyədək bu rəqiblə səfərdə keçirdiyi bütün oyunlarda qalib gələn komandamız uğurlu seriyanı davam etdirməyə çalışıb. “Qəbələ”nin baş məşqçisi Roman Qriqorçuk ötən turun “Sumqayıt”la görüşü (1:0) ilə müqayisədə start heyətində heç bir dəyişiklik etməyib. Yenə eyni “11-lik”lə mübarizə aparan komandamızın heyətində Elvin Camalov 60-cı, Arif Daşdəmirov 50-ci matçına çıxıb.
İlk yarı qarşılıqlı hücumlarla başlayıb. “Qırmızı-qaralar” üstünlüyü ələ almağa çalışsa da, autsayder müdafiəyə qapanmaq fikrində olmadığını göstərib. İlk təhlükə də meydan sahiblərindən gəlib. Lakin Dmitri Bezotosnı Ramazan Abbasovun uzaq zərbəsini dəf edə bilib. Hissənin ortalarında topa nəzarəti ələ alan komandamız rəqibin müdafiə xəttini yarmaqda çətinlik çəkib. Bu üzdən oyuna cinah futbolçularının mövqelərini dəyişməyi də ciddi təsir etməyib. 23-cü dəqiqədə Rəşad Eyyubovun güclü cərimə zərbəsini qapıçı küncə çıxarıb. Kornerdən sonra qapı önündəki təhlükə də qolla nəticələnməyib. Bu dəfə qolkiper inamlı oynayıb. “Rəvan”ın növbəti həmlələri Ruslan Tağızadə və Cəmşid Məhərrəmovla gəlsə də, hesab dəyişməyib. Fasilə öncəsi Vojislav Stankoviçin cərimə zərbəsi bakılılara həyəcan yaşatsa da, dəqiq olmayıb.
İkinci hissə başlayan kimi irəli atılan komandamız qazandığı künc zərbəsini qolla tamamlamağa yaxın olub. Lakin Aleksey Qayın baş zərbəsi tirin üstündən keçib. Bu epizodun ardından da üstün futbol nümayiş etdirən “qırmızı-qaralar”ın hücumlarında kəsər çatmayıb. Düzdür, Eyyubov və Zərgərovun zərbələri yaddaqalan olub. Lakin qonaqlar hesabı açmağa müyəssər olmayıb. Oyunun axarını dəyişmək niyyətində olan Qriqorçuk ötən tur olduğu kimi yenə Asif Məmmədovu oyuna buraxıb. Matçın 66-cı dəqiqəsində isə künc zərbəsindən sonra Stankoviçin tirin altına göndərdiyi topu rəqib qapıçı çıxara bilib. Paytaxt təmsilçisinin qapısına təzyiqi artırıb, ikinci hissədə qapanan “Rəvan”ın müdafiə xəttini yarmağa çalışan “Qəbələ” istəyinə 77-ci dəqiqədə çatıb. Sağ cinahdan ötürmədən sonra mübarizə aparan oyunçulara çarpan top nəzarətsiz qalan Arif Daşdəmirova düşüb. 12 metrdən qapıya qarşısıalınmaz zərbə endirən müdafiəçi “qırmızı-qara” formada ilk qolunu vurub – 1:0. Bundan sonra da komandamız hücumlarını davam etdirib. Qriqorçuk son turlarda şans qazanmayan Ürfan Abbasovu da meydana buraxıb ki, bu matç onun Premyer Liqada 100-cü oyunu olub. Hücumlarına ara verməyən “Qəbələ” 86-cı dəqiqədə də qol vurmağa yaxın olub. Lakin Qayın zərbəsi yenə qeyri-dəqiq olub. “Rəvan” da matçın sonlarında xeyli fəallaşaraq, bərabərlik qolu üçün hücumlar təşkil edib. Lakin qarşılıqlı hücumlarla keçən sonluqda qol qeydə alınmayıb. Son saniyələrdə meydan sahiblərinin qapıçısı əvvəl Qay, ardınca Zetsin zərbəsini dəf edib, hesabın dəyişməsinə imkan verməyib.
Beləliklə, ardıcıl 3-cü oyunda 1:0 hesabı ilə qalib gələn “Qəbələ” “Rəvan”la səfər görüşlərindəki qələbə seriyasını 6-ya çatdırıb.
“Rəvan”
1. Rəşad Əzizli
15. Ceyhun Abdullayev
(9. Nuran Qurbanov, 70)
2. Ruslan Tağızadə
(11. Elnur Abdulov, 83)
17. Ramazan Abbasov (k)
8. Məmməd Quliyev
13. Cəmşid Məhərrəmov
(5. Mirkamil Haşımlı, 80)
92. Yamin Ağakərimzadə
21. Novruz Məmmədov
14. Elvin Əliyev
16. Orxan Lalayev
99. Əziz Hüseynov
Ehtiyat oyunçular:
12. Elçin Sadıqlı
7. Elvin Həsənəliyev
22. Elmin Ağayev
39. Əlibəy Məmmədli
Baş məşqçi: Bəhmən Həsənov
“Qəbələ”
22. Dmitri Bezotosni
3. Voislav Stankoviç
4. Elvin Camalov
7. Ermin Zets
8. Məhəmməd Mirzəbəyov
9. Sergey Zenyov
19. Aleksey Qay (k)
21. Arif Daşdəmirov
32. Rəşad Eyubov
(34. Urfan Abbasov, 82)
44. Rafael Santos
66. Samir Zərgərov
(11. Asif Məmmədov, 60)
Ehtiyat oyunçular:
33. David Pietrzkeviç
5. Pavel Paşayev
15. Vitali Vernidub
20. Rikardinyo
25. Qismət Alıyev
Baş məşqçi: Roman Qriqorçuk
