«Qəbələ» «Sumqayıt»la oyunun hazırlığını davam etdirir
Xəbərlər / 19 Sentyabr 2015 | 18:31248
«Qəbələ» «Sumqayıt»la oyunun hazırlığını davam etdirir

Topaz Premyer Liqasının V turunda “Sumqayıt”la qarşılaşacaq “Qəbələ” sentyabrın 21-də baş tutacaq görüşün hazırlıqlarını davam etdirir. Avropa Liqasının qrup mərhələsinin I turunun ayın 17-də keçirilən PAOK-la (Yunanıstan) matçından (0:0) sonra məşqlərinə ara verməyən komandamız bu gün Qəbələdə çalışıb. Oyunun ertəsi günü Bakıda ADBTİA stadionunda məşq edən “qırmızı-qaralar” doğma arenaya qayıtdıqdan sonra da iki qrupla hazırlıq keçib. Belə ki, PAOK-la qarşılaşmanın iştirakçıları fiziki çalışmalara üstünlük veribsə, digərləri meydanda məşq edib. “Qəbələ” sabah oyunöncəsi son məşqini keçirəcək.
Xatırladaq ki, V turun son qarşılaşması olan “Qəbələ” – “Sumqayıt” oyunu sentyabrın 21-də baş tutacaq. Bu matç komandalar arasında 13-cü görüşdür. İndiyədək 10 qələbə qazanıb, 1 heç-heçə edib, 1 dəfə məğlub olan “qırmızı-qaralar” 27 top vurub, 8-ni buraxıb. Komandamız 6 ev oyununda xal itirməyib.

Topaz Premyer Liqası, V tur
21 sentyabr (bazar ertəsi)
21:00. “Qəbələ” – “Sumqayıt”
Hakimlər: Ömər Paşayev, Vaqif Musayev, Cavanşir Yusifov, Nail Nağıyev
AFFA nümayəndəsi: Mübariz Hüseynov
Hakim-inspektor: Məhəmməd Məmmədov
Qəbələ şəhər stadionu